2 Chronicles 27

¹Na rĩrĩ, Jothamu aarĩ wa mĩaka mĩrongo ĩĩrĩ na ĩtano hĩndĩ ĩrĩa aambĩrĩirie gũthamaka; agĩthamaka mĩaka ikũmi na ĩtandatũ kũu Jerusalemu; nake nyina etagwo Jerusha, mwarĩ wa Zadoku.

²Nake agĩĩka maũndũ marĩa monagwo marĩ mega nĩ Jehova, o ta ũrĩa maũndũ mothe maatariĩ marĩa ithe Uzia ekaga; no rĩrĩ, ndaigana gũtonya hekarũ ya Jehova. Nao andũ a bũrũri wake no maatũũrire mekaga maũndũ moru.

³Ũcio nĩwe waakire kĩhingo kĩa mwena wa igũrũ wa nyũmba ya Jehova, ningĩ rũthingo-inĩ rũa Ofeli igũrũ agĩgwaka mĩako mĩingĩ.

⁴O na ningĩ agĩaka matũũra bũrũri ũrĩa wĩ irĩma nyingĩ wa Juda, o nakuo mũtitũ-inĩ agĩgwaka ihingo nũmu irĩ hinya mũno, o na mĩthiringo ya nyũmba ndaya na igũrũ.

⁵O na ningĩ akĩhũrana na mũthamaki wa ciana cia Amoni, akĩmatoria biũ. Nacio ciana icio cia Amoni igĩkĩmũhe taranda igana cia betha mwaka o ro ũcio, o na kori ngiri ikũmi cia ngano, o na kori ngiri ikũmi cia cairi. O naguo mwaka wa kerĩ, o na wa gatatũ, ciana icio cia Amoni ikĩmũhe indo o ta icio.

⁶Tondũ ũcio Jothamu agĩkĩgĩa na hinya, nĩ ũndũ nĩaarũmĩrĩire Jehova Ngai wake wega mĩthiĩre-inĩ yake.

⁷Na rĩrĩ, ciĩko iria ingĩ cia Jothamu, o na mbaara ciothe iria aarũire, o na mĩthiĩre yake-rĩ, atĩrĩrĩ, maũndũ macio nĩmaandĩkĩtwo ibuku-inĩ rĩa athamaki a Isiraeli o na Juda.

⁸Nake aarĩ wa mĩaka mĩrongo ĩĩrĩ na ĩtano hĩndĩ ĩrĩa aambĩrĩirie gũthamaka, agĩgĩthamaka mĩaka ikũmi na ĩtandatũ Jerusalemu.

⁹Nake Jothamu agĩgĩkoma hamwe na maithe, nao andũ makĩmũthika itũũra rĩa Daudi; nake Ahazu, mũrũwe, agĩthamaka ithenya rĩake.