2 Chronicles 30

¹Na rĩrĩ, Hezekia agĩkĩrekeria Aisiraeli othe o na Ajuda andũ, o na akĩandĩkĩra Aefiraimu na Amanase marũa, nĩ getha moke nyũmba ya Jehova kũu Jerusalemu, nĩguo makarĩe Bathaka ya Jehova Ngai wa Isiraeli.

²Nĩ ũndũ mũthamaki, o na anene ake, hamwe na kĩrĩndĩ gĩothe kĩrĩa kĩarĩ kũu Jerusalemu, nĩmaaciranĩire marĩe Baĩhaka mweri wa kerĩ.

³Nĩ gũkorũo matiahotire kũmĩrĩa ihinda rĩayo kĩũmbe, nĩ ũndũ athĩnjĩri-Ngai matieamũrĩte aingĩ a kũigana, kana andũ magĩkorũo monganĩte kũu Jerusalemu.

⁴Naguo ũndũ ũcio ũkĩonwo nĩ mũthamaki o na kĩrĩndĩ kĩu gĩothe atĩ nĩwagĩrĩire gwĩkwo.

⁵Tondũ ũcio magĩgĩtua watho wa atĩ ũhoro ũhunjanĩrio kũu Isiraeli guothe, kuuma Biri-shiba o nginya Dani, atĩ andũ moke Jerusalemu marĩĩre Bathaka ya Jehova, Ngai wa Isiraeli, kuo; nĩ ũndũ n��haathirĩte matukũ maingĩ matamĩrĩĩte o ta ũrĩa kwandĩkĩtwo.

⁶Tondũ ũcio atwari marũa magĩgĩthiĩ namo moimĩte he mũthamaki, o na anene ake, Isiraeli o na Juda guothe, o ta ũrĩa gwathanĩtwo nĩ mũthamaki, akoiga atĩrĩ, Inyuĩ ciana cia Isiraeli, garũrũkĩrai Jehova, Ngai wa Iburahimu, na Isaaka, o na Isiraeli, nĩ getha acokerere matigari manyu ma andũ arĩa mehonokirie moko-inĩ ma athamaki a Ashuri.

⁷Na mũtigatuĩke ta maithe manyu, na ariũ a ithe wanyu, arĩa maagararire watho wa Jehova, Ngai wa maithe mao, o nginya akĩmatiga, agĩtũma matũũra mao matuĩke maganjo, o ta ũũ mũkuona.

⁸Na rĩrĩ, rĩu tigai kũũmia ciongo, o ta ũrĩa maithe manyu maaciũmĩtie; no rĩrĩ, wĩheanei he Jehova, mũtonye handũ hake harĩa haamũre, o hau atuĩte haamũre tene na tene, na mũtungatagĩre Jehova, Ngai wanyu, nĩ getha marakara make manene mũno magarũrũke mamweherere.

⁹Nĩ ũndũ mũngĩcokerera Jehova-rĩ, ariũ a ithe wanyu, o na ciana cianyu, nĩmakaiguĩrũo tha nĩ andũ arĩa maamatahire, nao nĩmagacoka bũrũri ũyũ; nĩ gũkorũo Jehova, Ngai wanyu, nĩakinyagĩria andũ wega wake, na akaiyũrũo nĩ tha, na mũngĩmũcokerera ndakamũhutatĩria ũthiũ wake.

¹⁰Tondũ ũcio atwari marũa magĩgĩthiĩ makĩgeraga itũũra o itũũra kũndũ guothe bũrũri wa Efiraimu na Manase, o nginya Zebuluni; no rĩrĩ, andũ a matũũra macio nĩmaamathekereire nĩ kũmamena, makĩmanyarara.

¹¹No o na gwatuĩka ũguo-rĩ, andũ amwe a Aasheri na Amanase o na Azebuluni nĩmenyihirie, magĩgĩthiĩ magĩkinya Jerusalemu.

¹²O nakuo Juda-rĩ, Ngai nĩaatũmire andũ akuo magĩe na ngoro o ro ĩmwe, nĩ getha meke o ta ũrĩa gwathanĩtwo nĩ mũthamaki, o na anene, na ũndũ wa uuge wa Jehova.

¹³Nakuo kũu Jerusalemu gũgĩkĩgomana andũ aingĩ, mweri wa kerĩ, nĩguo makarĩe gĩathĩ kĩu kĩa mĩgate ĩtarĩ mĩimbie; nao maarĩ kĩrĩndĩ kĩingĩ mũno.

¹⁴Nao makĩarahũka, makĩeheria igongona iria ciarĩ kũu Jerusalemu, o na igongona ciothe cia gũcinĩra ũbumba, nao magĩthiĩ nacio magĩciikia karũũĩ ga Kidironi.

¹⁵Magĩgĩthĩnja Bathaka mũthenya wa ikũmi na ĩna mweri wa kerĩ; nao athĩnjĩri-Ngai o na Alawii magĩgĩconoka, makĩĩamũra magĩĩtheria, magĩgĩtwara indo cia mahaki ma njino kũu nyũmba ya Jehova.

¹⁶Nao magĩkĩrũgama handũ hao o ta ũrĩa mũtugo wao watuĩtwo, o na ta ũrĩa watho wa Musa, mũndũ wa Ngai, watariĩ; athĩnjĩri-Ngai magĩkĩminjaminja thakame ĩrĩa maamũkĩrĩte manengeretwo nĩ Alawii.

¹⁷Nĩ ũndũ kwarĩ andũ aingĩ kĩrĩndĩ-inĩ kĩu mateamũrĩte, na tondũ ũcio, Alawii nĩo maaheirũo wĩra wa gũthĩnja nyamũ cia Bathaka nĩ ũndũ wa mũndũ o mũndũ ũrĩa ũtetheretie, nĩ getha mamaamũrĩre Jehova mamatherie.

¹⁸Nĩ ũndũ kĩrĩndĩ kĩingĩ kĩa andũ, naguo ũguo nĩ ta kuuga andũ aingĩ a Efiraimu, na Manase, na Isakaru, na Zebuluni, matietheretie, no nĩmaarĩire Bathaka ĩo matekũrũmĩrĩra ũhoro wayo ũrĩa wandĩkĩtwo. Nĩ ũndũ Hezekia nĩaamahoeire, akiuga atĩrĩ, Jehova ũrĩa mwega aroetĩkĩra kuohera mũndũ o wothe

¹⁹ũrĩa ũroretie ngoro yake ũrongoria-inĩ wa Ngai, o we Jehova, Ngai wa maithe, o na aakorũo nĩ mũndũ ũteamũrĩte agetheria o ta ũrĩa rĩĩtheria rĩkoniĩ handũ harĩa haamũre rĩtariĩ.

²⁰Nake Jehova agĩkĩigua Hezekia, akĩohera andũ acio.

²¹Nacio ciana cia Isiraeli, icio ciarĩ kũu Jerusalemu hĩndĩ ĩo, ikĩrĩa gĩathĩ kĩu kĩa mĩgate ĩtarĩ mĩimbie mĩthenya mũgwanja irĩ na gĩkeno kĩnene mũno, nao Alawii, o na athĩnjĩri-Ngai, makagoocaga Jehova mũthenya o mũthenya makĩmũinagĩra na inanda iria cianũkaga mũno.

²²Nake Hezekia agĩkĩhe Alawii othe arĩa maarĩ ogĩ na ũtungati ũcio wa Jehova ndeto cia kũmomĩrĩria. Nakĩo gĩathĩ kĩu gĩgĩkĩrĩo mĩthenya ĩo yothe mũgwanja, gũkĩrutagwo magongona ma ũiguano, o na Jehova, Ngai wa maithe mao, agĩcokagĩrio ngatho.

²³Nakĩo kĩrĩndĩ kĩu gĩothe gĩgĩciranĩra atĩ gĩikare gĩathĩ-inĩ kĩu mĩthenya ĩngĩ mũgwanja; nakĩo gĩgĩikara mĩthenya ĩngĩ mũgwanja gĩathĩ-inĩ gĩkenete mũno.

²⁴Nĩ ũndũ Hezekia, mũthamaki wa Juda, nĩaaheete kĩrĩndĩ kĩu ndegwa ngiri ĩmwe cia kũrutwo igongona, o na mbũri ngiri mũgwanja; o nao anene makĩhe kĩrĩndĩ kĩu ndegwa ngiri ĩmwe, o na mbũri ngiri ikũmi; o nakĩo gĩkundi kĩnene gĩa athĩnjĩri-Ngai gĩkĩĩamũra.

²⁵Nakĩo kĩrĩndĩ kĩu gĩothe kĩa Juda, kĩĩ hamwe na athĩnjĩri-Ngai o na Alawii, o na kĩrĩndĩ gĩothe kĩrĩa kĩoimĩte Isiraeli, o na andũ a kũngĩ arĩa moimĩte bũrũri wa Isiraeli hamwe na arĩa maatũire kũu Juda, magĩgĩkena.

²⁶Na tondũ ũcio gũkĩgĩa gĩkeno kĩnene mũno kũu Jerusalemu; nĩ ũndũ kuuma o ihinda rĩa Suleimani, mũrũ wa Daudi, mũthamaki wa Isiraeli, gũtirĩ kwoneka ũndũ ta ũcio kũu Jerusalemu.

²⁷Hĩndĩ ĩo athĩnjĩri-Ngai acio Alawii magĩgĩũkĩra makĩrathima andũ; naguo mũgambo wao ũkĩiguwo nĩ Ngai, o narĩo ihoya rĩao rĩgĩkinya kũu gĩikaro-inĩ gĩake gĩtheru, o kũu igũrũ matu-inĩ.