2 Chronicles 4

¹Ningĩ agĩthondekithia kĩgongona gĩa gĩcango, naguo ũraihu wakĩo ũgĩtuĩka mĩkono mĩrongo ĩĩrĩ, o naguo wariĩ wakĩo ũgĩtuĩka mĩkono mĩrongo ĩĩrĩ o ro ũguo, o nakuo kũraiha na igũrũ gwakĩo gũgĩtuĩka mĩkono ikũmi.

²Ningĩ agĩthondekithia itangi rĩrĩa rĩĩtagwo karia ga gĩcango gĩtweketio rĩa mĩkono ikũmi kuuma mwena ũmwe o nginya mwena ũrĩa ũngĩ, narĩo rĩarĩ gĩthiũrũrĩ; ningĩ kũraiha na igũrũ kwarĩo kuuma o gĩtinainĩ kwarĩ mĩkono ĩtano; narĩo rĩgĩthimwo gĩthiũrũrĩ kĩarĩo-rĩ, rĩarigicĩirio rũrigi rũa mĩkono mĩrongo ĩtatũ.

³Nakuo na mũhuro warĩo mĩena-inĩ kwarĩ tũmĩhianano twa ndegwa twarĩthiũrũrũkĩirie mbarĩ ciothe, o ikũmi tũkagĩa mũkono-inĩ ũmwe, tũkarigicĩria karia kau mbarĩ ciothe. Natuo tũmĩhianano tũu twa ndegwa icio twekĩrĩtwo mĩhari ĩĩrĩ, tũtwekanĩirio na karia kau rĩrĩa gaatwekirio.

⁴Ningĩ karia kau kaaigĩrĩirũo igũrũ rĩa ndegwa ikũmi na igĩrĩ, ithatũ ciacio igakĩrora gathigathini, na ithatũ ikarora ithũĩro, nacio ingĩ ithatũ ikarora gũthini, o nacio iria ingĩ ithatũ ikarora irathĩro; nako karia kau gagakĩigĩrĩrũo igũrũ rĩacio, nacio ciĩga ciacio ciothe cia na thutha ciarĩ na kũu thĩinĩ wako.

⁵O naguo ũtungu wa gĩcango gĩako waiganaine na rũhĩ kwarama, nayo mĩthia yako yathondeketwo o ta mĩthia ya gĩkombe, ĩĩyunĩte o ta mĩthia ya itoka; nako kaaiganagĩra maĩ ma mbathi ngiri ithatũ.

⁶Ningĩ agĩthondekithia inyũngũ ikũmi, ithano agĩciiga mwena wa guoko kwa ũrĩo, nacio iria ingĩ ithano agĩciiga mwena wa guoko kwa ũmotho, nĩguo ithambagĩrio indo; nacio indo iria ciarutagwo wĩra wa mahaki ma njino nacio, nĩcio ciathambagĩrio thĩinĩ wacio. No rĩrĩ, karia kau ga gĩcango-rĩ, nĩ athĩnjĩri-Ngai methambagĩra ho.

⁷Ningĩ agĩthondekithia mĩtĩ ikũmi ya kũigĩrĩrũo matawa ya thahabu, o ũrĩa mũthondekere wayo watuĩtwo; nake agĩkĩmĩigithia kũu hekarũ thĩinĩ, ĩtano guoko kwa ũrĩo, na ĩtano guoko kwa ũmotho.

⁸Ningĩ agĩthondekithia metha ikũmi, agĩciigithia hekarũ-inĩ thĩinĩ, ithano mwena wa ũrĩo, na ithano mwena wa ũmotho; o na agĩthondekithia mbakũri igana rĩmwe cia thahabu.

⁹Thutha wa ũguo agĩthondekithia nja ya athĩnjĩri-Ngai, o na nja ĩrĩa nene, na mĩrango yayo, nayo mĩrango yacio akĩmĩhumbithia igũrũ guothe na gĩcango.

¹⁰Nako karia kau agĩkaigithia mwena wa ũrĩo wa nyũmba ĩo, o mwena wa irathĩro karorete gũthini.

¹¹Ningĩ Huramu agĩthondeka nyũngũ, na ihakũri o na mbakũri. Nake Huramu agĩkĩrĩkia wĩra wothe ũrĩa aarutĩire mũthamaki, Suleimani, wa kũu nyũmba ya Ngai;

¹²nacio indo iria aathondekithirie nĩ itugĩ cierĩ, na inyamũ iria igĩrĩ irĩ mũnduru, o na ciongo iria ciarĩ itugĩ-inĩ icio igũrũ; o na mĩnyamũ ĩĩrĩ ĩrĩa yatumanĩtio ta rũgara ya kũhumba inyamũ icio irĩ mũnduru ciongo-inĩ icio ciarĩ itugĩ-inĩ icio igũrũ;

¹³o na makomamanga macio magana mana marĩa maarĩ mĩnyamũ-inĩ ĩo ĩĩrĩ ĩtumanĩtio ta rũgara, gũgĩkĩgĩa mĩhari ĩĩrĩ ya makomamanga ĩĩkĩrĩtwo inyamũ-inĩ icio cierĩ itumanĩtio ta rũgara, gĩa kũhumba kũndũ kũu kwĩrĩ kwĩ mũnduru gwa ciongo icio ciarĩ itugĩ-inĩ icio igũrũ;

¹⁴ningĩ agĩthondeka inyamũ ihaana ta ngari, na inyũngũ cia kũigĩrĩrũo inyamũ icio igũrũ;

¹⁵na karia kau hamwe na ndegwa icio ikũmi na igĩrĩ cia kũgĩa mũhuro wako.

¹⁶Ningĩ nyũngũ, na ihakũri, na njibe cia mĩthece ĩtatũ, na indo ciaho ciothe, Huramu ũcio mũũhĩgĩrĩru wĩra ũcio biũ agĩthondekera mũthamaki, Suleimani; agĩgĩthondeka indo icio cia nyũmba ya Jehova na gĩcango gĩakengaga mũno.

¹⁷Nake mũthamaki aatwekithagĩria indo icio werũ-inĩ wa Jorodani, handũ haarĩ rĩũmba gatagatĩ ga Sukothu na Zereda.

¹⁸Ũguo nĩguo Suleimani aathondekithirie indo icio ciothe, agĩciingĩhia mũno mũno; nĩ gũkorũo ũritũ wa gĩcango kĩu ndwatuĩrĩkire ũmenyũo ũrĩa ũigana.

¹⁹O nacio indo iria ingĩ ciothe cia kũigwo nyũmba ya Ngai-rĩ, Suleimani agĩcithondekithia, hamwe na kĩgongona kĩrĩa gĩa thahabu, na metha cia mĩgate ĩrĩa yaigagwo mbere ya Jehova,

²⁰na mĩtĩ ya kũigĩrĩrũo matawa hamwe na matawa mayo, nĩ getha maakanage nyumĩrĩra ya handũ harĩa hatheru mũno, o ta ũrĩa mũtugo wamo watuĩtwo; agĩcithondekithia na thahabu ĩrĩa therie mũno;

²¹namo mahũa, na matawa, o na mĩĩhato ya thahabu, ciathondeketwo na thahabu ĩrĩa thuranĩre;

²²natuo tũmĩĩhato twa mũrarĩ wa ndambĩ, na mbakũri, na iciko, o na ngĩo cia mwaki, ciarĩ cia thahabu ĩrĩa therie mũno; narĩo itonyero-inĩ rĩa nyũmba-rĩ, mĩrango ĩrĩa ya thĩinĩ mũno ya handũ harĩa hatheru mũno, o na mĩrango ya nyũmba, naguo ũguo nĩ ta kuuga ya hekarũ, yarĩ ya thahabu.