Acts 12

¹NA rĩrĩ, ta hĩndĩ ĩo Herode ũrĩa mũthamaki agĩitĩka kũnyarira andũ amwe a kanitha.

²Akĩũragithia Jakubu mũrũ wa nyina na Johana na rũhiũ.

³Na rĩrĩa onire atĩ ũguo ekire nĩũgũkenia Ayahudi, agĩcoka akĩnyitithia Petero o nake. Namo matukũ macio maarĩ ma kũrĩa mĩgate ĩtarĩ mĩĩkĩre ndawa ya kũimbia.

⁴Na aarĩkia kũmũnyitithia, akĩmũikia korokoro-inĩ, akĩmũneana kwĩ athigari ikundi inya arĩa maarangaga camu ana ana, mamũrangĩre; na nĩendete atĩ gĩathĩ kĩa Bathaka gĩathira amũrute hau amũrehe mbere ya kĩrĩndĩ.

⁵Tondũ wa ũguo Petero agĩikario korokoro-inĩ, no andũ a kanitha nĩmaamũhoyagĩra Ngai na kĩyo.

⁶Na rĩrĩa Herode aatigairie hanini amũrute, ũtukũ o ro ũcio Petero agĩkorũo akomete gatagatĩ ga athigari erĩ, ohetwo na mĩnyororo ĩĩrĩ: na nĩkwarĩ andũ a kũrangĩra korokoro kĩhingo-inĩ.

⁷Na atĩrĩrĩ, mũraika wa Mwathani akĩmuumĩrĩra, akĩrũgama harĩ we, naguo ũtheri ũkĩara kanyũmba karĩa aarĩ. Nake akĩgũtha Petero mwena, akĩmwarahũra akĩmwĩra atĩrĩ, Ũkĩra narua. Nayo mĩnyororo ĩrĩa ohetwo nayo moko ĩkĩgathũka ĩkĩgũa thĩ.

⁸Nake mũraika akĩmwĩra atĩrĩ, Wĩhotore, na wĩohe iratũ ciaku. Nake agĩĩka o ũguo. Agĩcoka akĩmwĩra atĩrĩ, Wĩhumbe nguo yaku, ũnũmĩrĩre.

⁹Nake Petero akiuma nja, akĩmũrũmĩrĩra, na ndaamenyaga atĩ ũndũ ũcio wĩkagwo nĩ mũraika nĩ wa ma, no kwĩgereria egeragĩria atĩ nĩ kĩoneki onete.

¹⁰Na maarĩkia kũhĩtũka arangĩri arĩa a mbere o na arĩa a kerĩ, magĩkinya kĩhingo-inĩ gĩa kĩgera kĩrĩa gĩa kuumĩra itũũra-inĩ; nakĩo gĩkĩmahingũkĩra kĩo kĩene, magĩkiuma nja magĩthiĩra njĩra o ĩmwe; na kahinda o kau mũraika akĩmũtiga, agĩthiĩ.

¹¹Na rĩrĩa Petero eiguire, akiuga atĩrĩ, Rĩu ndĩ kũmenya na ma atĩ Mwathani nĩareketie mũraika wake, aka’honokia kũrĩ Herode na kũrĩ maũndũ marĩa kĩrĩndĩ kĩa Ayahudi gĩtanyĩte kuona.

¹²Na rĩrĩ, aarĩkia gwĩciria ũhoro ũcio, agĩthiĩ kwa Mariamu, nyina wa Johana ũrĩa wetagwo rĩĩtwa rĩngĩ Mariko, nakuo nĩkuo andũ aingĩ monganĩte makahoya Ngai.

¹³Na rĩrĩa aaringaringire kĩhingo gĩa thome, mũirĩtu wetagwo Roda agĩũka kũmenya ũrĩa wĩ ho.

¹⁴Nake aamenya atĩ mũgambo ũcio waaria nĩ wa Petero, ndaigana kũhingũra kĩhingo nĩ ũndũ wa ũrĩa aakenete, no gũcoka agĩcoka na thĩinĩ ateng’erete, akĩheana ũhoro atĩ Petero arũgamĩte thome-inĩ.

¹⁵Nao makĩmwĩra atĩrĩ, Wee nĩ kũgũrũka ũgũrũkĩte! Nowe akiuga agwatĩirie atĩ ũguo nĩguo. Nao makiuga, Nĩ mũraika wake.

¹⁶Nowe Petero agĩikara o akĩringaringaga kĩhingo: nao maarĩkia kũhingũra makĩmuona, makĩgegeara mũno.

¹⁷Nake aarĩkia kũmakiria na guoko, agĩcoka akĩmahe ũhoro wa ũrĩa Mwathani aamurutithirie korokoro-inĩ. Akĩmera atĩrĩ, Ĩrai Jakubu na ariũ a Ithe witũ maũndũ macio. Agĩkĩmatiga agĩthiĩ kũndũ kũngĩ.

¹⁸Na rĩrĩ, kwarĩkia gũkĩa, athigari makĩgĩa na inegene mũno, makĩũrania harĩa Petero agĩthiĩte.

¹⁹Na rĩrĩa Herode aarĩkirie kũmũcaria, akĩmwaga-rĩ, agĩcoka gũtuĩria ũhoro ũcio kũrĩ andũ arĩa maamũrangagĩra, agĩathana atĩ moragwo. Nake agĩtherera oimĩte Judea, agĩthiĩ Kaisarea agĩikara kuo.

²⁰Na rĩu-rĩ, Herode nĩaatũire arakarĩire andũ a Turo na Sidoni mũno: nao magĩũka harĩ we marĩ na ngoro ĩmwe, na maarĩkia kũrĩkanĩra na Blasito, ũrĩa mũrori wa nyũmba ĩrĩa aaraaraga, atuĩke wa mwena wao, makĩhoya hagĩe thayũ, nĩ ũndũ wa ũrĩa bũrũri wao watũũragio nĩ bũrũri wa mũthamaki ũcio.

²¹Na gũgĩtuĩka atĩrĩ, atĩ mũthenya ũrĩa wararĩirio, Herode akĩĩhumba nguo ciake cia ũthamaki, agĩikarĩra gĩtĩ kĩrĩa gĩa ũthamaki, akĩheana ũhoro kũrĩ o.

²²Nao andũ acio makĩanĩrĩra makiuga, Nĩ mũgambo wa ngai, ti wa mũndũ!

²³Na kahinda o kau akĩringwo nĩ mũraika wa Mwathani, nĩ ũndũ ndaigana gũtũma Ngai agoocwo: agĩkĩrĩo nda nĩ njoka, agĩtuĩkana.

²⁴No rĩrĩ, Ũhoro wa Ngai ũgĩikara o ũkĩongererekaga, na ũkĩingĩhaga.

²⁵Nao Baranaba na Saulu, maarĩkia kũhingia ũtungati ũrĩa maatũ-mĩirũo, makiuma Jerusalemu makĩinũka, na magĩthiĩ na Johana ũrĩa wetagwo rĩĩtwa rĩngĩ Mariko.