Acts 20

¹NAYO ngũĩ ĩo yathira-rĩ, Paulo akĩrekania atĩ arutwo magetwo, akĩmahe ũhoro wa kũmomĩrĩria, akĩmoigĩra ũhoro, agĩthiĩ Makedonia.

²Na aarĩkia gũtuĩkanĩria ng’ongo ciakuo, akĩheaga andũ mohoro maingĩ ma kũmomĩrĩria, agĩcoka agĩthiĩ Ũyunani.

³Na aanina mĩeri ĩtatũ kuo, nao Ayahudi maagĩkorũo marĩkanĩire mamwĩke ũndũ na wara hĩndĩ ĩrĩa aatigairie hanini athiĩ Suriata na marikabu-rĩ, agĩgĩtua atĩ no acokere Makedonia.

⁴Na agĩthiĩ-rĩ, magĩtwarana na Sopatiro mũrũ wa Puro, mũndũ wa Beroia, na andũ a Thesalonike, aa Arisitariko na Sekundo; na Gaio, mũndũ wa Deribe, na Timotheo; o na andũ a Asia, aa Tukiko na Terofimo.

⁵No rĩrĩ, andũ acio nĩmaathiagĩte na mbere, magĩkorũo matwetereire Teroa.

⁶Namo matukũ maathira marĩa maarĩagwo mĩgate ĩtarĩ mĩĩkĩre ndawa ya kũimbia, tũkiuma Filipi, tũhaicĩte marikabu, tũkĩmakora kũu Teroa thutha wa matukũ matano; tũgĩikara kuo mĩthenya mũgwanja.

⁷Naguo mũthenya wa kwambĩrĩria kiumia-rĩ, twakorũo tũũnganĩte nĩ ũndũ wa kwenyũranga mũgate, Paulo, tondũ nĩendete kũroka gũthiĩ, akĩmahe ũhoro magĩcokanĩria nao, akĩraihia ũhoro o nginya ũtukũ gatagatĩ.

⁸Na rĩrĩ, nĩkwarĩ matawa maingĩ maakanaga thĩinĩ wa nyũmba ya igũrũ ĩrĩa twonganĩte.

⁹Na mwanake wetagwo Eutuko nĩaaikarĩire ndirica-inĩ, akĩũmĩrũo mũno nĩ toro: nake Paulo aaraihia makĩria ũhoro ũcio aaheanaga, mwanake ũcio akĩgũa thĩ, oimĩte nyũmba ĩo yarĩ igũrũ rĩa iria ingĩ igĩrĩ, tondũ wa ũguo omĩiruo nĩ toro. Nao andũ maamuoya, makĩmũkora arĩ mũkuũ.

¹⁰Nake Paulo agĩikũrũka, akĩĩgũithia harĩ we, akĩmũhĩmbĩria, akiuga atĩrĩ, Tigai gũtangĩka, arĩ o muoyo.

¹¹Nake aacoka kũhaica rĩngĩ, akĩenyũranga mũgate, agĩcoka kũrĩa irio, agĩkĩrĩrĩria gũtereta nao hĩndĩ ndaya, o nginya gũgĩkĩa, agĩgĩtigana nao agĩthiĩ.

¹²Nao makĩrehe kamwana kau karĩ muoyo, makĩnyamarũrũo ngoro mũno.

¹³Ĩndĩ ithuĩ nĩtwathiagĩte na mbere, tũgĩtonya marikabu, tũgĩthiĩ Aso, tũkĩenda kuoera Paulo kuo: nĩ gũkorũo ũguo nĩguo aarĩkanĩire na ithuĩ, tondũ we mwene nĩendete gũthiĩ na magũrũ.

¹⁴Na twacemania nake kũu Aso, tũkĩmuoya marikabu-inĩ, tũgĩthiĩ tũgĩkinya Mitulene.

¹⁵Na twoima hau, mũthenya ũyũ ũngĩ tũgĩkinya harĩa haaringaine na Kio; na mũthenya ũyũ ũngĩ wa ĩtatũ tũgĩkinya Samo, na thutha wa ũguo tũkĩroka gũkinya Mileto.

¹⁶Nĩ gũkorũo Paulo nĩonete arĩ wega athiage na mbere na marikabu ahĩtũke Efeso, ndakae gũikario kũu Asia: tondũ nĩaahiũhaga, nĩ getha, kwahoteka, agakorũo akinyĩte Jerusalemu mũthenya ũrĩa wa Bendegothito.

¹⁷Na rĩrĩa aarĩ Mileto akĩrekania Efeso agĩĩta athuri a kanitha moke harĩ we.

¹⁸Nao maakinya, akĩmera atĩrĩ, Inyuĩ nĩmũũĩ ũhoro wa mĩthiĩre ĩrĩa ndaikaraga nayo matukũ mothe marĩa ndaikaire na inyuĩ, kuuma o mũthenya ũrĩa ndaambire gũkinya na ikinya rĩakwa gũkũ Asia:

¹⁹mũgakĩmenya ũrĩa ndaikaraga ngĩtungatĩra Mwathani ndĩĩnyihĩtie mũno na ngĩitaga maithori, na ũrĩa ndaageragio na magerio nĩ ũndũ wa ũrĩa Ayahudi maanjohagĩria manjĩke ũũru:

²⁰ningĩ atĩ ndirĩ ndatithia ta ndĩ na guoya ngĩmũheaga ũhoro o na ũrĩkũ wa kũmũguna, na ngĩmũrutagĩra maũndũ harĩa andũ makoragwo monganĩte o na kwanyu mĩciĩ,

²¹o na atĩ ndanoimbũrĩra Ayahudi o na Ayunani ũhoro wa kwĩrira mbere ya Ngai, na gwĩtĩkia Mwathani witũ Jesu Kristo.

²²Na atĩrĩrĩ, rĩu ndathiĩ Jerusalemu, ngĩiguaga ta ndĩ muohe ngoro-inĩ yakwa, na ndikũmenya maũndũ marĩa makangora ndĩ kuo,

²³tiga atĩrĩ, atĩ matũũra-inĩ marĩa mothe ’thiaga-rĩ, Roho Mũtheru nĩanyonagia atĩ ũhoro wa kuohwo na wa kũnyarirũo nĩguo ũnjetereire.

²⁴No rĩrĩ, atĩ niĩ mwene ndũũre muoyo ndikuona ta arĩ bata, ingĩkĩhota gũkinyia njĩra gĩturi ĩrĩa ndonereirio ’thiagĩre, na ’hote kũhingia ũtungatĩri ũrĩa ndaheirũo nĩ Mwathani Jesu, nĩguo wa kũhunjanagĩria Ũhoro-ũrĩa-Mwega wa Wega wa Ngai, ndĩ mũira waguo.

²⁵Na rĩrĩ, rĩu nĩnjũĩ atĩ inyuĩ inyuothe, o inyuĩ ndacangacangaga kwanyu ngĩheanaga ũhoro wa ũthamaki wa Ngai, mũtigacoka kũnyona ũthiũ rĩngĩ.

²⁶Tondũ wa ũguo nĩnguuga na ma o ũmũthĩ ũyũ, atĩ ndirĩ hingo ingĩcokererũo nĩ thakame ya mũndũ o wothe angĩũra.

²⁷Nĩ gũkorũo ndirĩ ndatithia ta ndĩ na guoya ngĩmũmenyithia maũndũ mothe marĩa Ngai aatũire aciragĩra gwĩka.

²⁸Wĩmenyagĩrĩrei inyuĩ ene, o na mũmenyagĩrĩre andũ othe a rũũru rũrĩa Roho Mũtheru aamũtuire arori aruo, nĩ getha mũrĩithagie kanitha wa Mwathani, ũrĩa egũrĩire na thakame yake mwene.

²⁹Nĩnjũĩ atĩ ndarĩkia gũthiĩ ndĩmũtige, andũ matariĩ ta njũi ndĩani nĩmarĩtonya thiritũ-inĩ yanyu, na maticayagĩre rũũru rũu.

³⁰Ningĩ gatagatĩ-inĩ kanyu nĩharĩũkĩra andũ mekwaria maũndũ ma ũtũrĩka, nĩ getha magucagĩrĩrie arutwo mamarũmagĩrĩre.

³¹Hakĩrĩ ũguo-rĩ, ikaragai mwĩhũgĩte, mũkĩririkanaga atĩ ihinda rĩa mĩaka ĩtatũ ndirĩ ndatiga kũmũtaara o mũndũ o mũndũ mũthenya o na ũtukũ, ngĩitaga maithori.

³²Naguo rĩu ndamũtigĩra Ngai, na ndamũtigĩra Ũhoro ũrĩa wa Wega wake, arĩ guo ũngĩhota gũtũma mũikarage mũrũmĩte ta nyũmba yakĩtwo wega, na mũgaĩrũo igai hamwe na arĩa othe maamũrĩtwo magatherio.

³³Ndirĩ ndacumĩkĩra betha kana thahabu kana nguo cia mũndũ o na ũrĩkũ.

³⁴Inyuĩ nĩmũũĩ atĩ ndatũire ndutaga wĩra na moko maya makwa nĩ ũndũ wa mabata makwa mwene, na nĩ getha ngatungatagĩre andũ arĩa angĩ twarĩ nao.

³⁵Maũndũ-inĩ mothe-rĩ, nĩndamuonagĩrĩria ũrĩa mwagĩrĩirũo nĩ gwĩka, atĩ mũteithagie andũ arĩa maagĩte hinya mũkĩĩnogagia nĩ ũndũ wao, na mũririkanage ciugo cia Mwathani Jesu iria oigire we mwene atĩ, Kũheana nĩkuo kũrehage gĩkeno kũrĩ kũheo.

³⁶Na aarĩkia kwaria ũguo, agĩturia ndu, akĩhoya hamwe nao othe.

³⁷Magĩkĩrĩra mũno othe, makĩhĩmbĩria Paulo ngingo makĩmũmumunyaga,

³⁸makĩgĩa na kĩeha mũno makĩria nĩ ũndũ wa ciugo icio aaririe, atĩ matigacoka kũmuona ũthiũ rĩngĩ. Na makĩmuumagaria makĩmũkinyia marikabu-inĩ.