Acts 28

¹NA twakĩrĩkia kũhonoka-rĩ, tũkĩmenya atĩ gĩthama kĩu gĩĩtagwo Melita.

²Nao acenji akuo magĩtũgegia nĩ ũrĩa maatũtugire mũno, nĩ gũkorũo nĩmaatwakĩirie mwaki, na magĩtũgwata ithuothe ũgeni tondũ wa mbura ĩrĩa yoiraga, o na tondũ wa heho.

³No rĩrĩ, Paulo aarĩkia kũũngania gakundi ga tũkũ, agĩtwĩkĩra riiko, hakiuma nduĩra nĩ ũndũ wa ũrugarĩ wa mwaki, ĩkĩmũrũma guoko ĩcuhĩte nakuo.

⁴Nao acenji mona nyamũ ĩo ĩcunjurĩte guoko-inĩ gwake, makĩĩrana atĩrĩ, Ti-itherũ mũndũ ũyũ nĩ mũũragani, na o na aakorũo ahonokire iria-inĩ-rĩ, We ũrĩa ũrĩhanagĩria na kĩhooto ndetĩkĩrĩte atũũre muoyo.

⁵Nowe Paulo akĩribaribĩra nyamũ ĩo mwaki-inĩ, na ndaigana kuona ũũru.

⁶Nao magĩeterera, megereirie atĩ hihi nĩegũcoka kũimba, o na kana agũe thĩ o rĩmwe arĩ mũkuũ. No maaikara hĩndĩ ndaya metereire o ũguo, na matione ũndũ o na ũmwe wamũkora, makĩĩricũkwo, makĩmũtua ngai.

⁷Na rĩrĩ, hakuhĩ na hau nĩhaarĩ ithaka cia mũndũ ũrĩa mũnene wa gĩthama kĩu, wetagwo Publio. Nake nĩaatũgwatire ũgeni, agĩtũtuga wega mĩthenya ĩtatũ ta tũrĩ arata ake.

⁸Na gũgĩtuĩka atĩrĩ, atĩ ithe wa Publio agĩkorũo akomete e mũrũaru mũrimũ wa kũhiũha mwĩrĩ na kũharũo gatema. Nake Paulo agĩtonya harĩ we, akĩhoya Ngai, akĩmũigĩrĩra moko, akĩmũhonia.

⁹Na gwekwo ũguo, o nao andũ arĩa angĩ maarĩ na mĩrimũ gĩthama-inĩ kĩu magĩũka makĩhonio.

¹⁰Nao andũ akuo magĩtũhe iheo nyingĩ cia gũtuonia ũrĩa matũtĩĩte: na rĩrĩa twaitĩkire gũthiĩ na marikabu, magĩtwĩkĩrĩra indo iria twarĩ na bata nacio thĩinĩ wayo.

¹¹Na mĩeri ĩtatũ yathira-rĩ, tũgĩthiĩ tũhaicĩte marikabu ya Isikanderia, ĩrĩa yaikarĩte gĩthama-inĩ kĩu kĩmera kĩa heho, naruo rũũri rũrĩa yekĩrĩtwo rũarĩ rũa kuuga ũũ, “Tũhĩĩ twa Mahatha.”

¹²Na twakinya Surakusa, tũgĩikara kuo mĩthenya ĩtatũ.

¹³Na twoima kũu tũgĩthiĩ tũkĩrigicũkaga tũgĩkinya itũũra rĩĩtagwo Regio. Na thutha wa mũthenya ũmwe gũkĩgĩa rũhuho ruumĩte gũthini, naguo mũthenya ũyũ ũngĩ tũkĩroka gũkinya Puteoli.

¹⁴Nĩkuo twonanire na ariũ a Ithe witũ amwe, nao magĩtũringĩrĩria tũikaranie nao matukũ mũgwanja: ũguo noguo tũgĩgĩcoka tũgĩkinya Roma.

¹⁵Nao ariũ a Ithe witũ arĩa maarĩ kuo, rĩrĩa maaiguire ũhoro witũ, magĩũka gũtũthagania o nginya kĩng’ang’a-inĩ kĩrĩa gĩĩtagwo Kĩng’ang’a kĩa Apio, o na handũ hetagwo Nyũmba Ithatũ cia Ageni. Nake Paulo onana nao agĩcokeria Ngai ngatho, agĩikara omĩrĩirie.

¹⁶Na twakinya Roma, Paulo akĩheo rũtha aikarage handũ mwanya, marĩ hamwe na mũthigari ũrĩa wamũrangagĩra.

¹⁷Na gũgĩkinya atĩrĩ, matukũ matatũ maathira, agĩĩta arĩa maarĩ atongoria a Ayahudi macemanie nake. Nao maarĩkia kũgomana, akĩmera atĩrĩ, Ariũ a Ithe witũ, niĩ-rĩ, o na gwatuĩka gũtirĩ ũndũ mũũru ndekĩte andũ a rũrĩrĩ ruitũ, o na kana wa kũregana na irĩra cia maithe maitũ-rĩ, nĩndaneanirũo kũrĩ Aroma, ngĩrutwo Jerusalemu ndĩ muohe.

¹⁸Nao maarĩkia gũtuĩria ũhoro wakwa, makĩenda kũndekia, nĩ ũndũ wa kwaga ũndũ wa gũtũma njũragwo.

¹⁹No rĩrĩa Ayahudi maakararirie ituĩro rĩu, ngĩigua atĩ no kinya njokie cira riiko, ũgacirũo nĩ Kaisari: ĩndĩ ti atĩ ndarĩ na ũndũ wa gũthitaka andũ a rũrĩrĩ rũakwa naguo.

²⁰Ũndũ ũcio nĩguo watũmire ndĩmũthaithe mũũke tuonane na twaranĩrie. Nĩ gũkorũo kĩĩrĩgĩrĩro kĩrĩa gĩtũire kĩĩrĩgagĩrĩrũo nĩ Aisiraeli nokĩo gĩtũmĩte njikarage ndĩ muohe na mũnyororo ũyũ.

²¹Nao makĩmwĩra atĩrĩ, Ithuĩ tũtirĩ twona marũa moimĩte Judea me na ũhoro waku, o na kana hagĩũka gũkũ mũndũ o na ũmwe wa ariũ a Ithe witũ atũhe ũhoro waku kana agũcuke.

²²No rĩrĩ, tũkwenda kũigua harĩ wee ũrĩa ũgwĩciria. Tondũ ha ũhoro wa thiritũ ĩo, nĩtũũĩ atĩ nĩĩthahagĩrĩrio kũndũ guothe.

²³Nao maarĩkia gwathana gĩathĩ nake, magĩũka gĩkundi kĩnene kũrĩ we handũ harĩa aaikaraga; agĩgĩtinda kuuma rũcinĩ kinya hwaĩ-inĩ akĩmataũragĩra ũrutani ũcio, akamoimbũragĩra ũhoro wa ũthamaki wa Ngai, akamaringagĩrĩria metĩkie ũhoro wa Jesu, akĩheanaga ihooto ciumĩte watho-inĩ wa Musa, o na mabuku-inĩ ma anabii.

²⁴Na amwe ao magĩĩtĩkia mohoro marĩa maaheanirũo, na amwe makĩaga gwĩtĩkia.

²⁵Na rĩrĩa maagire kũiguanĩra ũhoro ũcio o ene, magĩgĩthiĩ, Paulo aarĩkia kũmahe ũhoro ũyũ ũmwe atĩrĩ, Ti-itherũ ũhoro ũrĩa Roho Mũtheru aarĩirie maithe manyu na kanua ka Isaia warĩ wa ma,

²⁶rĩrĩa oigire atĩrĩ, Thiĩ kũrĩ andũ aya ũkamere atĩrĩ, Kũigua nĩmũkaiguaga na mũtikanamenye ũndũ, Na kuona nĩmũkonaga, o na mũtikanakuũke:

²⁷Nĩ ũndũ ngoro cia andũ aya nĩ ngingitaru, Na matũ mao nĩ nginini, Ningĩ maitho mao nĩmamahingĩte; Matikae kuona na maitho, Kana maigue na matũ, Na mamenye na ngoro, Macoke magarũrũke, Na niĩ ndĩmahonie.

²⁸Tondũ ũcio-rĩ, menyai atĩ ũhoro ũyũ wa Ngai wa kũhonokania nĩũtũmĩtwo kũrĩ andũ arĩa a Ndũrĩrĩ ingĩ: nao nĩmarĩũiguaga.

²⁹[Na aarĩkia kwaria ũguo, Ayahudi magĩĩthiĩra, magĩkararanagia mũno o ene.]

³⁰Nake Paulo agĩikara mĩaka ĩĩrĩ mĩgima nyũmba ĩrĩa aakomborete we mwene; nao andũ arĩa othe maathiaga kũrĩ we akametĩkagĩria matonye,

³¹akamahunjagĩria ũhoro wa ũthamaki wa Ngai, akamarutaga maũndũ ma Mwathani Jesu Kristo omĩrĩirie mũno, hatarĩ mũndũ ũngĩmũgiria.