Acts 3

¹NA rĩrĩ, thaa ya kũhoya yakinya, nĩyo thaa kenda-rĩ, Petero na Johana magĩkorũo makĩambata matonye hekarũ.

²Na rĩrĩ, mũndũ wathuaga kuuma o aaciarũo nĩaakuuagwo o mũthenya o mũthenya akaigwo kĩhingo-inĩ kĩa hekarũ kĩrĩa gĩĩtagwo kĩrĩa Gĩthaka, nĩ getha ahoyage thendi kũrĩ andũ arĩa maatonyaga hekarũ;

³nake aakĩona Petero na Johana matuĩte gũtonya hekarũ, akĩmahoya thendi.

⁴Nake Petero, marĩ hamwe na Johana, akĩmũkũũrĩra maitho akĩmwĩra atĩrĩ, Ta tũrore.

⁵Nake agĩĩtĩkĩra kũmarora erĩgĩrĩire atĩ nĩekũheo kĩndũ nĩo.

⁶Nake Petero akĩmwĩra atĩrĩ, Betha na thahabu-rĩ, hatirĩ ndĩ nacio, ĩndĩ kĩrĩa ndĩ nakĩo nĩkĩo ngũkũhe. Atĩrĩ, thĩinĩ wa rĩĩtwa rĩa Jesu Kristo wa Nazarethi, wĩtware.

⁷Akĩmũgwata guoko kwa ũrĩo akĩmũũkĩria; na kahinda o kau makinya o na thũng’wa cia magũrũ make ikĩgĩa na hinya.

⁸Nake akĩguthũka akĩrũgama akĩambĩrĩria gwĩtwara; agĩtonya hekarũ hamwe nao etwarĩte, akĩrũũgarũũgaga na akĩgathaga Ngai.

⁹Nao andũ othe makĩmuona agĩĩtwara na akĩgathaga Ngai:

¹⁰na makĩmenya atĩ nĩwe ũrĩa waikaraga kĩhingo-inĩ kĩu Gĩthaka kĩa hekarũ akĩhoyaga thendi. Magĩkĩgegeara, mamakĩte nĩ ũndũ wa ũguo mũndũ ũcio ekirũo.

¹¹Nake aaikara o enyitĩrĩire Petero na Johana, andũ othe makĩrũrũngana harĩ o gĩthaku-inĩ kĩrĩa gĩĩtagwo gĩthaku gĩa Solomoni, magegete mũno.

¹²Na rĩrĩa Petero onire ũhoro ũcio, agĩcokeria kĩrĩndĩ atĩrĩ, Andũ aya a Isiraeli, mũkũgega nĩkĩ nĩ ũndũ wa mũndũ ũyũ? Na nĩ kĩ gĩgũtũma mũtũcũthĩrĩrie ta arĩ ithuĩ twatũma etware na hinya witũ ithuĩ ene kana ũtheru witũ?

¹³Ngai wa Iburahimu, na wa Isaaka, na wa Jakubu, o we Ngai wa maithe maitũ-rĩ, nĩwe wagoocithia ndungata yake Jesu, o ũcio inyuĩ mwaneanire na mũkĩmũkaana mbere ya Pilato, hĩndĩ ĩrĩa aatuĩte atĩ amuohore.

¹⁴Ũcio Mũtheru na Mũthingu-rĩ, nĩwe inyuĩ mwakaanire, mũkĩhoya atĩ muohorerũo mũũragani,

¹⁵mũgĩkĩũragithia Mũthamaki ũrĩa mũheani muoyo. Nake nĩwe Ngai aariũkirie oime kũrĩ arĩa akuũ: na nĩ ithuĩ aira a ũhoro ũcio.

¹⁶Na tondũ wa gwĩtĩkia rĩĩtwa rĩake-rĩ, rĩĩtwa o ro rĩu nĩrĩo rĩatuma mũndũ ũyũ agĩe na hinya, o ũyũ mũkuona na mũmũũĩ: naguo wĩtĩkio ũrĩa uumanĩte na Jesu, nĩguo watũma mũndũ ũyũ aheo ũgima ũyũ wothe wa mwĩrĩ, inyuothe mũkĩĩonagĩra.

¹⁷Na rĩu-rĩ, ariũ a Ithe witũ, nĩnjũĩ atĩ mwekire ũguo nĩ ũndũ wa kũrigwo, o ta ũrĩa anene anyu nao mekire.

¹⁸No rĩrĩ, mohoro marĩa Ngai aamenyithanirie o mbere na tũnua twa anabii othe, ma atĩ Kristo wake nĩakanyarirĩka, nĩmo ahingĩtie ũguo.

¹⁹Nĩ ũndũ ũcio-rĩ, wĩrirei na mũgarũrũke, nĩ getha mehia manyu marihũrũo, na hacoke hagĩe mahinda ma kũrurumũkio moimĩte kwĩ Mwathani;

²⁰na ningĩ nĩ getha arekie Kristo ũrĩa ũtuĩtwo wanyu, nĩwe Jesu.

²¹Nake no kinya aiyũkio aikare Igũrũ mũira wa mahinda magakinya marĩa indo ciothe ikerũhio, o marĩa Ngai aaririe ũhoro wamo na tũnua twa anabii ake atheru, arĩa maanagĩa kuo kuuma o kĩambĩrĩria-inĩ.

²²Ti-itherũ Musa nĩoigire atĩrĩ, Mwathani Ngai nĩakamũũkĩrĩria mũnabii ũhaana o ta niĩ, oime harĩ ariũ a thoguo; nĩwe mũkaiguaga mohoro-inĩ mothe marĩa akamwaragĩria.

²³Na nĩgũgatuĩka atĩrĩ, atĩ mũndũ o wothe ũrĩa ũtakaigua mũnabii ũcio, nĩakaninwo biũ, eherio kũrĩ kĩrĩndĩ.

²⁴Ti-itherũ anabii othe, kuuma Samueli na gwata arĩa othe maacokire gũũka thutha, othe arĩa maanaheana ũhoro-rĩ, nĩmaarathire ũhoro wa matukũ maya o nao.

²⁵Inyuĩ-rĩ, nĩ inyuĩ ariũ a anabii, o na andũ a kũgaĩrũo kĩrĩkanĩro kĩrĩa Ngai aarĩkanĩire na maithe manyu, rĩrĩa erire Iburahimu atĩrĩ, Nayo mĩhĩrĩga yothe ya thĩ nĩĩkarathimwo nĩ ũndũ wa mbeũ yaku.

²⁶Na inyuĩ nĩ inyuĩ Ngai aambire gũtũmĩra Ndungata yake, aarĩkia kũmĩũkĩria, nĩ getha imũrathime, nĩ kũmũgarũra o mũndũ o mũndũ mũtigane na mahĩtia manyu.