Acts 7

¹NAKE mũthĩnjĩri-Ngai ũrĩa mũnene akĩũria Stefano atĩrĩ, Mohoro macio nĩguo matariĩ?

²Nake akiuga atĩrĩ, Ariũ a baba, na maithe maitũ, ta thikĩrĩriai. Ngai Mwene-riri nĩoimĩrĩire Iburahimu, ithe witũ, rĩrĩa aarĩ Mesopotamia o mbere atanatũũra bũrũri wa Harani,

³akĩmwĩra atĩrĩ, Ũkĩra ũthame bũrũri wanyu, uume kũrĩ andũ anyu, ũcoke ũthiĩ bũrũri ũrĩa ngakuonia.

⁴Hĩndĩ ĩo Iburahunu agĩgĩthama bũrũri wa Akalidei, agĩthiĩ gũtũũra kũu Harani. Na ithe aarĩkia gũkua, Ngai akĩmũthamia kuo, akĩmũrehe bũrũri ũyũ mũtũire rĩu;

⁵na ndaigana kũmũhe igai o na rĩrĩkũ kuo, o na kana handũ ha kũiganĩra kũgũrũ gwake, no rĩrĩ, o na aakorũo atakĩrĩ na mwana, Ngai akĩĩranĩra atĩ nĩakamũhe bũrũri ũcio ũtuĩke wake, o na wa gũtigĩra rũciaro rũake.

⁶Agĩkĩmwĩra ũũ, atĩ andũ a rũciaro rũu rũake nĩmagatũũra marĩ o ageni bũrũri wa andũ angĩ, na atĩ andũ a kũu nĩmakamatua ngombo ciao, na mamekage ũũru ihinda rĩa mĩaka magana mana.

⁷Ningĩ Ngai akiuga atĩrĩ, Rũrĩrĩ rũu magakorũo matuĩkĩte ngombo ciaruo, Niĩ nĩ Niĩ ngarũtuĩra ituĩro; na thutha wa ũguo andũ acio nĩmakoima kũu, mandungatagĩre gũkũ.

⁸Agĩkĩrĩkanĩra nake kĩrĩkanĩro kĩrĩa kĩa ũhoro wa kũrua: ũguo noguo Iburahimu aaciarire Isaaka, akĩmũruithia mũthenya wa ĩnana; nake Isaaka agĩciara Jakubu, nake Jakubu agĩciara athuri arĩa ikũmi na erĩ, o-o maguuka maitũ.

⁹Nao maguuka macio maitũ, tondũ wa ũrĩa maaiguagĩra Jusufu ũiru, makĩmwendia ahirũo Misiri. No rĩrĩ, Ngai aarĩ hamwe nake,

¹⁰akĩmũhonokia mathĩna-inĩ make mothe, agĩtũma agĩe na ngatho na onagwo arĩ mũũgĩ nĩ Firauni ũrĩa warĩ mũthamaki wa Misiri. Nake Firauni akĩmũtua wa gwathaga Misiri o na nyũmba yake yothe.

¹¹Na rĩrĩ, gũgĩũka ng’aragu bũrũri wothe wa Misiri na wa Kanaani, o na thĩna mũnene; nao maithe maitũ makĩaga irio cia kũmahũnia.

¹²No rĩrĩa Jakubu aaiguire atĩ nĩkũrĩ ngano kũu Misiri, agĩtũma maithe maitũ kuo hĩndĩ ya mbere.

¹³Narĩo ihinda rĩa kerĩ rĩa kũmatũma kuo Jusufu akĩmenyeka nĩ ariũ a ithe; naguo mũhĩrĩga ũrĩa Jusufu oimĩte ũkĩmenyeka nĩ Firauni.

¹⁴Nake Jusufu agĩtũmana, agĩĩta ithe, Jakubu, o na andũ othe a nyũmba yake, andũ mĩrongo mũgwanja na atano.

¹⁵Nake Jakubu agĩtherera agĩthiĩ Misiri; agĩkuĩra kuo, we mwene o na maithe maitũ.

¹⁶Nao magĩkuuwo magĩtwarũo Shekemu magĩthikwo mbĩrĩra-inĩ ĩrĩa Iburahimu aagũrĩte na mbia kũrĩ ariũ a Hamori o kũu Shekemu.

¹⁷No rĩrĩ, ihinda rĩakuhĩhĩria rĩa kũhingia kĩĩranĩro kĩrĩa Ngai erĩire Iburahimu-rĩ, andũ a rũrĩrĩ rũu makĩongerereka makĩingĩha kũu Misiri,

¹⁸o nginya hakĩgĩa mũthamaki ũngĩ wa gũthamaka Misiri ũrĩa ũtoĩ ũhoro wa Jusufu.

¹⁹Mũndũ ũcio agĩĩka andũ a rũrĩrĩ ruitũ maũndũ ma wara, agĩĩka maithe maitũ ũũru, agĩtũma mate tũkenge twao tũtigatũũre muoyo.

²⁰Na hĩndĩ ĩo nĩyo Musa aaciarirũo, akĩonwo arĩ mũthaka mũno; akĩrererũo nyũmba ya ithe mĩeri ĩtatũ.

²¹Nake aatuĩka wa gũteo, mwarĩ wa Firauni akĩmwĩoera, akĩmũrera ta arĩ mũriũ wake mwene.

²²Nake Musa agĩkĩrutwo ũũgĩ wothe wa andũ a Misiri; agĩkorũo e na ũhoti akĩaria o na agĩĩka maũndũ.

²³No rĩrĩ, rĩrĩa aaninĩte ta mĩaka mĩrongo ĩna, akĩigua na ngoro yake akĩenda gũceerera andũ ao, ti ciana cia Isiraeli.

²⁴Na rĩrĩa onire ũmwe wao akĩnyarirũo, akĩmũgitĩra, akĩmũrĩhĩria ũũru ũcio ekĩtwo, akĩũraga Mũmisiri.

²⁵Na nĩ kwĩgereria egereirie atĩ no gũkorũo ariũ a ithe nĩmoĩ ũrĩa Ngai endaga kũmahonokia na guoko gwake, no matiigana kũmenya.

²⁶Na mũthenya ũyũ ũngĩ agĩkora amwe ao makĩhũrana, akĩenda kũmateithũrana, akiuga, Athuri aya, githĩ mũtikĩrĩ a ithe ũmwe? nĩ kĩ gĩgũtũma mwĩkane ũũru?

²⁷No we ũcio wekĩte ũrĩa ũngĩ ũũru akĩmũthinĩkania, akĩmwĩra atĩrĩ, Hĩ! Nũ ũgũtuĩte wee mũnene witũ o na kana mũtũtuĩri cira?

²⁸Anga mĩũkwenda kũnjũraga, ta ũrĩa ũroragire Mũmisiri ũrĩa wa ira?

²⁹Nake Musa aaigua ũhoro ũcio akĩũra, agĩtũũra arĩ mũgeni bũrũri wa Midiani, agĩciarĩra ariũ erĩ kuo.

³⁰Na rĩrĩ, mĩaka mĩrongo ĩna yathira, arĩ o werũ-inĩ ũrĩa wa kĩrĩma gĩa Sinai-rĩ, akiumĩrĩrũo nĩ mũraika arĩ rũrĩrĩmbĩ-inĩ rũa mwaki ũrĩa waakanaga kĩhinga-inĩ.

³¹Nake Musa ona ũndũ ũcio akĩgega nĩ ũndũ wa kĩoneki kĩu: na rĩrĩa aakuhagĩrĩria eonere, hakiuma mũgambo wa Mwathani, ũkiuga atĩrĩ,

³²Niĩ nĩ Niĩ Ngai wa maithe maku, Ngai wa Iburahimu, na wa Isaaka, na wa Jakubu. Nake Musa agĩkĩinaina, agĩĩtigĩra gũcũthĩrĩria.

³³Nake Mwathani akĩmwĩra atĩrĩ, Ruta iratũ ciaku magũrũ: nĩ gũkorũo hau ũrũngiĩ nĩ handũ hatheru.

³⁴Atĩrĩrĩ, nĩ kuona nyonete mĩnyamaro ya andũ akwa arĩa marĩ Misiri, naguo mũcayo wao nĩndĩũiguĩte, na nĩnjikũrũkĩte nĩguo ndĩmahonokie; na rĩu-rĩ, gĩũke ngũtũme Misiri.

³⁵Na rĩrĩ, Musa o ro ũcio maaregire, makiuga, Nũ ũgũtuĩte wee mũnene na mũtui-cira? nĩwe Ngai aatũmire atuĩke mũnene na wa kũmakũũra na guoko kwa mũraika ũcio wamuumĩrĩire kĩhinga-inĩ.

³⁶Nake nĩwe wamatongoririe moime kuo, aarĩkia gwĩka morirũ na kũringa ciama kũu Misiri, o na Iria-inĩ rĩrĩa Itune, o na werũ-inĩ, ihinda rĩa mĩaka mĩrongo ĩna.

³⁷Ningĩ Musa ũcio nĩwe werire andũ a Isiraeli atĩrĩ, Ngai nĩakamũũkĩrĩria mũnabii, oime thĩinĩ wa ariũ a thoguo, o ta ũrĩa niĩ ndariĩ.

³⁸Ũcio nĩwe warĩ o ho kĩũngano-inĩ kĩa arĩa maarĩ werũ-inĩ, me hamwe na mũraika ũrĩa wamwarĩirie kĩrĩma-inĩ gĩa Sinai, o na hamwe na maithe maitũ. Nake nĩwe waamũkĩire Ciugo irĩ muoyo cia gũtũrehere ithuĩ.

³⁹No rĩrĩ, maithe maitũ makĩrema gwathĩka nĩwe, makĩmũthinĩkania, na makĩĩrirĩria na ngoro ciao gũcoka Misiri,

⁴⁰makĩĩra Haruni atĩrĩ, Tũthondekere ngai iria irĩgĩtũtongoragia, nĩ gũkorũo Musa ũcio watũtongoririe agĩtũruta bũrũri wa Misiri, tũtiũĩ ũrĩa onete.

⁴¹Magĩgĩthondeka kĩndũ kĩhaanaine na njaũ matukũ macio, makĩrutĩra mũhianano ũcio igongona, magĩkenera indo iria methondekeire na moko mao.

⁴²Ĩndĩ Ngai nĩaamahutatĩire, akĩmarekereria matungatagĩre mbũtũ ĩrĩa ya Igũrũ, o ta ũrĩa haandĩkĩtwo ibuku-inĩ rĩa anabii, atĩrĩ, Anga nĩ niĩ mwagĩtũire mũrutagĩra nyamũ thĩnje na magongona Mĩaka mĩrongo ĩna kũu werũ-inĩ, inyuĩ mbarĩ ya Isiraeli?

⁴³Na rĩrĩ, nĩ kuoya mwoire hema ya Moloku Na njata ya ngai ĩrĩa ĩĩtagwo Refani, Nacio no mĩhianano ĩrĩa mwethondekeire nĩ getha mũmĩthathaiyagie. Na nĩngamũtahithia mũtwarũo mbere ya Babuloni.

⁴⁴Kũu werũ-inĩ, maithe maitũ maarĩ na hema ĩrĩa yetagwo Gĩikaro kĩa Ũira, o ta ũrĩa we ũcio waarĩirie Musa aathanĩte, atĩ amĩthondeke Ihaanaine na mũhianĩre ũrĩa onetio.

⁴⁵Na hema ĩo nĩyo maithe maitũ, maarĩkia gũtigĩrũo yo, maacokire makĩmĩkuua, me hamwe na Joshua, hĩndĩ ĩrĩa menyitĩire bũrũri wa ndũrĩrĩ iria Ngai aarutũrũrire, ciehere mbere ya maithe maitũ, makĩmĩtonyia kuo. Nayo ĩgĩikara kuo nginya matukũ ma Daudi.

⁴⁶Nake Daudi agĩĩtĩkĩrĩka nĩ Ngai, akĩhoya atĩ etĩkĩrio kuonera Ngai wa Jakubu gĩikaro.

⁴⁷Ĩndĩ nĩ Solomoni wamwakĩire nyũmba.

⁴⁸No rĩrĩ, Ũrĩa-wĩ-Igũrũ-Mũno ndatũũraga nyũmba iria ciakĩtwo na moko ma andũ: o ta ũrĩa mũnabii oigĩte, ũũ:

⁴⁹Igũrũ nĩkuo gĩtĩ gĩakwa gĩa ũthamaki, Nayo thĩ nĩyo gĩturũa gĩakwa kĩa magũrũ: Mũgakĩnjakĩra nyũmba ĩtariĩ atĩa? Ũguo nĩguo Mwathani oiga: Kana nĩ ta ha hangĩtuĩka hakwa ha kũhurũka?

⁵⁰Githĩ guoko gwakwa tikuo kwombire indo icio ciothe?

⁵¹Andũ aya aremu mũno, o inyuĩ mũikaraga ta andũ mataruĩte ũhoro-inĩ wa ũrĩa mũregaga kũigua na ngoro cianyu o na matũ manyu rĩ, mũtirĩ hingo mũtareganaga na Roho Mũtheru: na ta ũrĩa maithe manyu mekaga, no taguo na inyuĩ mwĩkaga.

⁵²Nĩ mũnabii ũrĩkũ maithe manyu matakĩigana kũnyarira? Na makĩũraga arĩa maarathire o mbere ũhoro wa gũũka kwa Ũrĩa Mũthingu: o ũcio inyuĩ mũtuĩkĩte rĩu amũneani na amũũragithia;

⁵³o inyuĩ mwamũkĩire watho o ta ũrĩa waathanirũo nĩ araika, mũgĩkĩaga kũũmenyerera.

⁵⁴Na rĩrĩa maakĩiguire maũndũ macio magĩitwo nĩ marakara magĩkĩmũhagaranĩria magego.

⁵⁵Nowe Stefano nĩaakorirũo aiyũrĩtwo nĩ Roho Mũtheru, agĩcũthĩrĩria Igũrũ akĩona riri wa Ngai, na Jesu arũgamĩte guoko-inĩ kwa ũrĩo kwa Ngai,

⁵⁶agĩkiuga, Atĩrĩ, ndĩ kuona Igũrũ rĩhingũkĩte, na Mũrũ wa Mũndũ arũgamĩte guoko-inĩ kwa ũrĩo kwa Ngai.

⁵⁷No andũ acio makĩgũũthũka na mũgambo mũnene, makĩhinga matũ mao, makĩmũguthũkĩra marĩ na ngoro o ro ĩmwe;

⁵⁸makĩmũthinĩkania nja ya itũũra, makĩmũhũra na mahiga: nao aira makĩiga nguo ciao thĩ magũrũ-inĩ ma mwanake wetagwo Saulu.

⁵⁹Magĩkĩhũra Stefano na mahiga, o agĩkayagĩra Mwathani akiugaga atĩrĩ, Mwathani Jesu, oya roho wakwa.

⁶⁰Agĩturia ndu, akĩanĩrĩra na mũgambo mũnene atĩrĩ, Mwathani, ndũkamorie rĩĩhia rĩrĩ. Na aarĩkia kuuga ũguo agĩkoma toro.