Amos 2

¹Ningĩ Jehova ekuuga ũũ: Tondũ wa mehia matatũ ma Moabi-rĩ, ĩĩ-ni, o na kũmakĩria nginya mana-rĩ, ndingĩhũndũra kũherithio gwakuo; tondũ nĩmaacinithirie mahĩndĩ ma mũthamaki wa Edomu matuĩke cokaa:

²no rĩrĩ, nĩngahurĩria Moabi mwaki, naguo ũrambie nyũmba cia ũnene iria irĩ Keriothu; nao a Moabi makue kwĩ na ngũĩ, na mũgũũthũkanĩro, na gũkĩhuhagwo coro:

³nĩ kũng’ũria ngang’ũria ũrĩa mũtua-cira aage kuo, na anene akuo othe ndĩmoraganĩrie hamwe nake; ũguo nĩguo Jehova ekuuga.

⁴Ningĩ Jehova ekuuga ũũ: Tondũ wa mehia matatũ ma Juda-rĩ, ĩĩ-ni, o na kũmakĩria nginya mana-rĩ, ndingĩhũndũra kũherithio gwakuo; nĩ ũndũ nĩmaregete kĩrĩra kĩa Jehova, o na mĩtugo ĩrĩa aathanĩte makaaga kũmĩmenyagĩrĩra, na indo cia maheni iria imahenereirie nĩcio cianamahĩtithia, o iria maithe mao maarũmagĩrĩra:

⁵no rĩrĩ, nĩngahurĩria Juda mwaki, naguo ũrambie nyũmba cia ũnene iria irĩ Jerusalemu.

⁶Ningĩ Jehova ekuuga ũũ: Tondũ wa mehia matatũ ma Isiraeli-rĩ, ĩĩ-ni, o na kũmakĩria nginya mana-rĩ, ndingĩhũndũra kũherithio gwakuo; nĩ ũndũ nĩ kwendia maanendia mũndũ mũthingu mbia, magakĩendia mũndũ mũkĩa o nyamũga igĩrĩ:

⁷na no-o mahũmahũmaga nĩ gũcemekera o kinya rũkũngũ rũa thĩ rũrĩa rũrĩ mĩtwe ya andũ acio ahũthũ; mũndũ mũhoreri-rĩ, magakihong’ora njĩra yake: ningĩ mũndũ na ithe magathiaga harĩ mũirĩtu o ũmwe, magagĩthahithia rĩĩtwa rĩakwa rĩtheru:

⁸na magakomagĩra nguo cia ngwatio cia mathirĩ handũ o hothe harĩ kĩgongona, na makanyuagĩra ndibei nyũmba ya Ngai wao, ĩrĩa marutithĩtie andũ ya thĩnjo.

⁹No niĩ-rĩ, nĩ niĩ ndaninire rũruka rũa Amori mehere mbere yao, arĩa maiganĩtie kĩũga ta kĩa mĩtarakwa, na makagĩa hinya ta mĩtĩ ĩrĩa ĩĩtagwo mĩgandi: no rĩrĩ, ndamaninũkirie mathũmbĩ o nginya mĩri-inĩ.

¹⁰Ningĩ nĩ niĩ ndamũrutire bũrũri wa Misiri ngĩmwambatia muume kuo, ngĩkĩmũtongoria mwĩ werũ-inĩ mĩaka mĩrongo ĩna, nĩguo mwĩgwatĩre bũrũri wa rũruka rũu rũa Amori.

¹¹Na ngĩũkĩria ariũ amwe anyu matuĩke anabii, ningĩ aanake amwe anyu matuĩke Anaziri. Githĩ ũguo tiguo, inyuĩ ciana ici cia Isiraeli? Nĩ ũguo Jehova ekuuga.

¹²No inyuĩ-rĩ, nĩmwaheire Anaziri acio ndibei manyue, nao anabii mũkĩmaatha mũkĩmera atĩrĩ, Mũtikanarathe ũndũ.

¹³Atĩrĩrĩi, nĩngamũhihinyania mũrĩ o kũu kwanyu o ta ũrĩa ngari ĩiyũire itĩa cia ngano ĩhihinyanagia.

¹⁴O na mũndũ ũrĩa wĩ mĩtũkĩ nĩakaaga ũũrĩro, na ũrĩa wĩ hinya aremwo nĩ kũũmĩrĩria ũhoti wake, nake mũndũ ũrĩa njamba ndakehonokia:

¹⁵ũrĩa mũgeti wa ũta ndakahota kwĩũmia; nake ũrĩa wĩ na magũrũ mahiũ ndakahota gwĩteithũkithia: gwata ũrĩa mũkuue nĩ mbarathi o nake no aremwo nĩ kwĩhonokia:

¹⁶nake ũrĩa mũũmĩrĩru mũno wa arĩa njamba, mũthenya ũcio akora e njaga; ũguo nĩguo Jehova ekuuga.