Amos 4

¹Ta iguai ũhoro ũyũ, inyuĩ ng’ombe ici cia mĩgoma cia Bashani, o inyuĩ mũtũire kĩrĩma-inĩ gĩa Samaria, mũhinyagĩrĩria arĩa ahũthũ, mũgakĩhehenja arĩa akĩa, o inyuĩ mwĩraga athuri anyu, Ta rehei, tũkĩmĩkunde.

²Mwathani Jehova nĩehĩtĩte akagweta ũtheru wake akoiga atĩrĩ, atĩ matukũ nĩmarĩmũkinyĩrĩra rĩrĩa mũrĩtahwo mũgucũrũrĩtio na mboorio, na arĩa mũrĩtigara mũgucũrũrio na ndwano.

³Na mũriunithĩrio na mĩanya ya rũirigo, o mũndũ-wa-nja oinithĩrio harĩa aringaine naho, na mũitĩrĩrũo o Harimoni; ũguo nĩguo Jehova ekuuga.

⁴Ta kĩgĩtei o gũũka Beth-eli, na mũkĩĩhagie; ningĩ mũkinye Giligali, mũkĩrĩrĩrie o kwĩhia; na mũrutage magongona manyu o rũcinĩ, o rũcinĩ, na mĩhothi yanyu ya gĩcunjĩ kĩrĩa gĩa ikũmi mũmĩrehage mũthenya wa gatatũ, o mũthenya wa gatatũ;

⁵rutagai igongona rĩa njino, rĩrĩa rĩa gũcokia ngatho rĩĩ mĩgate mĩimbie, ningĩ mahaki marĩa mũrutaga na kwĩendera mũkĩanagĩrĩre ũhoro wamo, mũũhunjie; tondũ ũguo nĩguo mwendaga, inyuĩ ciana cia Isiraeli; nĩguo Mwathani Jehova ekuuga.

⁶Hakwa na niĩ-rĩ, matũũra-inĩ manyu mothe nĩndaagithirie magego manyu gĩko, kũu kwanyu guothe ngĩkĩmwagithia gĩa kũrĩa: no rĩrĩ, kũnjokerera mũtiigana kũnjokerera; ũguo nĩguo Jehova ekuuga.

⁷Ningĩ nĩndamũhingĩire mbura ya kĩmera gũtigaire mĩeri ĩtatũ kũgĩe magetha, ngatũmaga yure itũũra rĩmwe, itũũra rĩrĩa rĩngĩ ngagiria yure; mũgũnda ũmwe ũkoiragĩrũo, na ũcio ũngĩ ũtoirĩirũo ũkoma.

⁸Andũ a matũũra merĩ kana matatũ magagĩthiaga gũtũgũgagĩra itũũra o rĩmwe makanyue maĩ, na matingĩiganwo: no rĩrĩ, kũnjokerera mũtiigana kũnjokerera; ũguo nĩguo Jehova ekuuga.

⁹Ndamũherithirie nĩ kũmũhĩhithĩria irio rũhuho rũhiũ, o na gũciragathia: mĩgũnda yanyu mĩingĩ ya irio na ya mĩthabibu, o na mĩtĩ yanyu ĩrĩa ĩgethagwo ngũyũ na ndamaiyũ-rĩ, yanarambio nĩ itono ikĩninaga: no rĩrĩ, kũnjokerera mũtiigana kũnjokerera; ũguo nĩguo Jehova ekuuga.

¹⁰Nĩndamũtũmĩire mũthiro ta ũrĩa ũgĩaga Misiri: aanake anyu ndanamoragithia na njomo na ngatahithia mbarathi cianyu; ngatũma mũnungo wa kĩraaro kĩanyu gĩa ita ũnungĩrĩre maniũrũ manyu: no rĩrĩ, kũnjokerera mũtiigana kũnjokerera; ũguo nĩguo Jehova ekuuga.

¹¹Nĩndang’aũranirie amwe anyu ta ũrĩa gwekirũo rĩrĩa Ngai aang’aũranirie Sodomu na Gomora, na inyuĩ mũkĩhaana o ta gĩcinga kĩguthĩtwo gĩkarutwo mwaki-inĩ ũkĩrĩrĩmbũka: no rĩrĩ, kũnjokerera mũtiigana kũnjokerera; ũguo nĩguo Jehova ekuuga.

¹²Hakĩrĩ ũguo-rĩ, ũrĩa ngũgwĩka nĩ ũũ, wee Isiraeli: na tondũ nĩ ũguo ngũgwĩka-rĩ, wĩhaarĩrie ũgatũngane na Ngai waku, wee Isiraeli.

¹³Tondũ rĩrĩ, ũrĩa mũũmbi wa irĩma, na agatũmaga rũhuho rũgĩe, ũrĩa uumagĩrĩria mũndũ mwĩheeho wake agakĩmuonia ũrĩa ũtariĩ, o ũrĩa ningĩ ũtũmaga rũcinĩ gũthimbare, na agathiĩ agĩkinyaga thĩ kũrĩa gũtũũgaraire, rĩĩtwa rĩake-rĩ, nĩ Jehova, o we ũrĩa Ngai mwene mbũtũ cia ita.