Amos 6

¹Mũtino, kaĩ nĩ arĩa maikaraga mearaganĩtie kũu Zayuni-ĩ! o na arĩa maikaraga megangarĩte kĩrĩma-inĩ gĩa Samaria, o acio me na igweta thĩinĩ wa rũrĩrĩ rũu rũĩ mbere ya iria ingĩ, o acio a mbarĩ ya Isiraeli maangagĩra.

²Ta hĩtũkai mũkinye Kaline, mũkeonere kuo; ningĩ muume kũu mũthiĩ Hamathu, itũũra rĩu inene: thutha mũcoke mũikũrũke mũkinye Gathu, kwa Afilisiti: anga inyuĩ mũkĩrĩ ega gũkĩra mothamaki macio? anga ndere ciamo ti ndaya gũkĩra ndere cia kwanyu,

³o inyuĩ mwĩtuagĩra atĩ mũthenya wa ũũru ũraihĩrĩrie, na mũgatũma gĩcirĩro kĩa ũhinya gĩkuhĩrĩrie?

⁴Nĩ inyuĩ arĩa makomagĩra marĩrĩ magemie na mĩguongo, magetambũrũkagia itanda-inĩ ciao, magakĩrĩaga tũgondu tuumĩte rũũru-inĩ, na icaũ ciumĩte icegũ-inĩ;

⁵o arĩa mainaga nyĩmbo cia mwĩtuĩro cia kũnyihia mũthenya makĩinagia inanda cia mũgeto; na magetumithĩria inanda cia kũinaga nacio, ta Daudi;

⁶arĩa manyuaga ndibei na ciitĩrĩra, na makehakaga maguta marĩa mega mũno; no rĩrĩ, matingĩigua ruo nĩ ũndũ wa kũgurara kwa mbarĩ ya Jusufu.

⁷Hakĩrĩ ũguo-rĩ, rĩu no kinya matahanĩrio na arĩa a kwamba gũtahwo, na ironja rĩa acio matũire metambũrũkagia rĩthire.

⁸Jehova, o we Ngai mwene mbũtũ cia ita, ekuuga atĩrĩ, Mwathani Jehova nĩehĩtĩte akegweta we mwene, akoiga ũũ: Kũnyira nĩ’nyirĩte mwĩraho ũcio wa Jakubu, na ngathũũra nyũmba icio ciake cia ũnene: na nĩngakĩnenganĩra itũũra hamwe na kĩrĩa gĩothe kĩĩ thĩinĩ warĩo.

⁹Na nĩgũgatuĩka atĩrĩ, atĩ kũngĩgakorũo gũtigaire andũ ikũmi thĩinĩ wa nyũmba ĩmwe, no gũkua magakua.

¹⁰Na rĩrĩa mũndũ akoyũo nĩ mũndũ wa rũrĩra rũao, ũrĩa ũngĩmũcina kĩimba, akĩrute mahĩndĩ make nyũmba, nake orie ũrĩa wĩ gatura-inĩ ka nyũmba io atĩrĩ, Kũrĩ ũngĩ ũtakuĩte mwĩ nake? nake acokie atĩrĩ, Gũtirĩ; hĩndĩ ĩo akoiga Ĩkirĩre; nĩ amu ti wega tũgwete rĩĩtwa rĩa Jehova.

¹¹Tondũ rĩrĩ, Jehova nĩaraathana, nayo nyũmba ĩrĩa nene ĩkaringwo ĩgĩe mĩanya, gwata nyũmba ĩrĩa nyinyi o nayo ĩgĩe na mĩatũka.

¹²Kaĩ mbarathi ingĩhota gũteng’era rũnyanjara-inĩ rũa mahiga? kana kuo kwahota kũrĩmĩka na ng’ombe? atĩ nĩguo mũgarũrage mũcirĩre ũrĩa wa kĩhooto ũgatuĩka ta mũtĩ ũrĩ ũrũrũ, maciaro ma ũthingu magakĩrũra ta mũgũta?

¹³o inyuĩ mũkenagĩra kĩndũ hatarĩ, mũkoigaga, Githĩ tũtiĩmeretie hĩa na hinya witũ ithuene?

¹⁴Tondũ rĩrĩ, kwĩ rũrĩrĩ ngũtũma rũmũũkĩrĩre, inyuĩ mbarĩ ya Isiraeli, nĩguo Jehova, we Ngai mwene mbũtũ cia ita, ekuuga; naruo rũkamũnyarira kuuma o itonyero rĩa Hamathu o kinya rũũĩ rũa Araba.