Amos 8

¹Mwathani Jehova nĩ ũũ ningĩ aanyonirie: nĩ atĩrĩrĩ, nĩ gĩtiti kĩĩ na matunda marĩkĩtie kwĩrua.

²Nake akĩnjũria atĩrĩ, Amosi, nĩ kĩ kĩu ũkuona? Na niĩ ngiuga, Nĩ gĩtiti kĩĩ na matunda marĩkĩtie kwĩrua. Hĩndĩ ĩo Jehova agĩkĩnjĩra atĩrĩ, Irĩkĩrĩrio nĩrĩkinyĩrĩire kĩrĩndĩ gĩakwa gĩa Isiraeli ndigũcoka gũkĩagararĩra rĩngĩ.

³Na mũthenya ũcio nyĩmbo iria ciinagĩrũo hekarũ-inĩ igatuĩka o mũkayo; ũguo nĩguo Mwathani Jehova ekuuga: ciimba nĩ kũingĩha ikaingĩha; kũndũ guothe igateagwo o ũguo gũkirĩtwo ki.

⁴Ta iguai ũhoro ũyũ, inyuĩ mwendaga kũmerũkia arĩa akĩa, mũkenda gũtũma athĩni a bũrũri magĩthire,

⁵mũkiugaga atĩrĩ, Ĩ karũgamo ka mweri karĩhĩtũka rĩ, nĩguo tũgakĩendagie irio? na thabatũ ĩrĩthira rĩ, tũkabangage ngano? o tũkĩnyihagia eba ya gũthimaga irio, na tũkaritũhia cekeri ya gũthima mbia, na tũthũkie ratiri nĩguo tũhenanagie;

⁶nĩ getha twĩgũrĩre arĩa ahũthũ na mbia, nao arĩa akĩa tũkĩmegũrire na nyamũga igĩrĩ, na gwata o muura wa ngano tũkawendagie.

⁷Jehova nĩehĩtĩte akagweta mwĩraho ũrĩa wa Jakubu, akoiga atĩrĩ, Ndirĩ hingo ngariganĩrũo nĩ ciĩko icio ciao o na kĩmwe.

⁸Nĩ ũndũ wa ũguo-rĩ, githĩ bũrũri ndũngĩthingitha, na andũ othe macakae, arĩa maũtũire? Ĩĩ-ni, nĩ kũiyũra ũkaiyũra ũrĩ wothe o ta Rũũi rũrĩa; na ũthogondane na ũcoke ũhũcũke, o ta Rũũĩ rũu rũa Misiri.

⁹Ningĩ mũthenya ũcio gũgatuĩka atĩrĩ, nĩguo Mwathani Jehova ekuuga, atĩ nĩngatũma riũa rĩthũe mĩaraho, njĩkĩre thĩ nduma mũthenya o kũrĩ o kwaru.

¹⁰Nacio ciathĩ iria mũthiaga ngacigarũra ituĩke cia kĩgirĩko, na nyĩmbo cianyu ciothe ituĩke cia mũcakaĩko; o na ndũme inyuothe mwĩohe makũnia njohero, na inyuothe, mũndũ o mũndũ, enjwo kĩongo; nĩngatũma gũtuĩke ta ũrĩa mũriũ wa mũndũ, wa mũmwe, acakayagĩrũo akuĩte, na marigĩrĩrio-inĩ ma ũhoro ũcio gũtuĩke ta mũthenya wa gana.

¹¹Mwathani Jehova ekuuga ũũ: Atĩrĩrĩi, matukũ nĩmaroka rĩrĩa ngatũmĩra bũrũri ũyũ ng’aragu, na ti ng’aragu ya irio, kana nyota wa maĩ, nĩ ng’aragu ya kũigua mohoro ma Jehova.

¹²Andũ nĩ gũthiĩ magathiĩ magĩtũgũgaga kuuma iria-inĩ kinya rĩrĩa rĩngĩ, na kuuma mwena wa gathigathini o kinya wa irathĩro-inĩ; nĩ gũthiũrũrũka magathiũrũrũkaga makĩmatha ũhoro wa Jehova, na matiwone.

¹³Hingo ĩo thaka cia airĩtu, na ningĩ aanake, nĩmakaringĩka nĩ nyota.

¹⁴Acio megirithagia makĩgwetaga Ngero io ya Samaria, na makoiga, Na tondũ ngai yaku, wee Dani, nĩĩtũire! na ningĩ makoiga, Na tondũ njĩra ya gũthiĩ Biri-shiba nĩĩtũire-rĩ! acio nĩ kũgũa makagũa, na maticoke gũũkĩra rĩngĩ.