Esther 4

¹Na rĩrĩ, Moridekai aamenya ũrĩa wothe wĩkĩtwo-rĩ, agĩtembũranga nguo ciake, akĩĩhumba tama wa ĩkũnia, o na akĩĩitĩrĩria mũhu, akiuma agĩthiĩ o itũũra gatagatĩ, akĩrĩra aanĩrĩire mũno irĩra rĩa kĩeha;

²ningĩ agĩthiĩ akĩrũgama kĩhingo-inĩ kĩa mũthamaki nja, nĩ ũndũ gũtirĩ mũndũ o na ũrĩkũ wetĩkagĩrio gũtonya kĩhingo-inĩ kĩa mũthamaki thĩinĩ ehumbĩte tama wa ĩkũnia.

³Na bũrũri o bũrũri kũrĩa guothe ũhoro wa ũndũ ũcio mũthamaki aathanĩte wakinyire, o na watho ũcio wake wa kũrũmĩrĩrũo, gũgĩkĩgĩa kĩeha kĩnene kũrĩa Ayahudi maatũire, o na gũkiihingwo kũrĩa irio, o na gũkĩrĩrũo gũkĩĩhũragwo ithũri; nao andũ aingĩ magĩkoma thĩ mehumbĩte matama ma makũnia, meitĩriirie mũhu.

⁴Nacio ndungata cia airĩtu cia Esiteri, o na andũ arĩa mehokeirũo maũndũ ma nyũmba yake thĩinĩ, magĩthiĩ kũrĩ mũthamaki ũcio mũndũ-wa-nja, makĩmũhe ũhoro ũcio, nake akĩigua ũũru mũno mũno; agĩcoka agĩtwarithĩria Moridekai nguo ehumbe, arute tama ũcio wa ĩkũnia, no ndaigana gũcioya.

⁵Hĩndĩ ĩo Esiteri agĩĩtithia Hathaka, mũndũ ũmwe wa andũ arĩa mehokeirũo maũndũ ma nyũmba ya mũthamaki thĩinĩ, o ũcio mũthamaki aatuĩte wa kũmũtungatĩra, akĩmwĩra athiĩ kwĩ Moridekai, akamenye ũrĩa ũhoro ũcio ũtariĩ, o na gĩtũmi kĩaguo.

⁶Tondũ ũcio Hathaka akiumagara agĩthiĩ he Moridekai, o handũ harĩa haariĩ itũũra-inĩ, mwena wa na mbere wa kĩhingo kĩa nyũmba ya mũthamaki.

⁷Nake Moridekai akĩmũhe ũhoro wothe wa maũndũ marĩa maamũkorete, o na akĩmũmenyithia wega ũrĩa mbia ciigana iria Hamani eranĩire atĩ nĩekũruta ciigwo kũndũ kũrĩa kũigagwo mũthithũ wa indo cia bata cia mũthamaki, nĩ getha Ayahudi maninwo biũ.

⁸O na akĩmũhe kobi ya watho wa kũrũmĩrĩrũo ũrĩa waandĩkĩtwo wa kũhunjanĩrio kũu Shushani, atĩ nĩguo maninwo biũ, nĩ getha amĩonie Esiteri, o na amũhe ũhoro wayo; o na ningĩ amwĩre atĩ athiĩ atonye he mũthamaki, akamũthaithe o na amũkaĩre, e hau mbere yake, nĩ ũndũ wa andũ a rũrĩrĩ rũao.

⁹Nake Hathaka agĩcoka akĩhe Esiteri ũhoro ũcio aaheetwo nĩ Moridekai.

¹⁰Nake Esiteri agĩkĩaria na Hathaka, akĩmũhe ũhoro ũrĩa egũthiĩ kwĩra Moridekai, akĩmwĩra ũũ:

¹¹Atĩrĩrĩ, ndungata ciothe cia mũthamaki, o na andũ a mabũrũri ma mũthamaki, nĩmoĩ atĩ mũndũ o wothe, o na angĩkorũo nĩ mũndũ mũrũme o na kana mũndũ-wa-nja, ũrĩa ũngĩthiĩ kwĩ mũthamaki arũgame o kũu nja ya nyũmba yake thĩinĩ mũno atetĩtwo athiĩ harĩ we, watho ũrĩa wathanĩtwo nĩ ũndũ wa mũndũ o wothe ũrĩa wĩkĩte ũguo no ũmwe, naguo nĩ wa atĩ oragwo, tiga o mũthamaki amũtambũrũkĩirie rũthanju rũake rũa ũnene rũa thahabu nĩ getha atũũre muoyo; no rĩrĩ, matukũ maya mĩrongo ĩtatũ mathirĩte niĩ ndiĩtĩtwo ’thiĩ ndonye kwĩ mũthamaki.

¹²Nake Moridekai akĩheo ũhoro ũcio waarĩtio nĩ Esiteri.

¹³Hĩndĩ ĩo Moridekai akĩmera macokerie Esiteri ũhoro ũũ: Atĩrĩrĩ, menya wĩcirie atĩ wee nĩwe ũkahonoka, nao Ayahudi arĩa angĩ othe more, nĩ ũndũ atĩ wĩ kũu nyũmba ya mũthamaki thĩinĩ.

¹⁴Nĩ ũndũ-rĩ, menya atĩ wee ũngĩkira ki ihinda rĩrĩ, Ayahudi nĩmekuona kĩhonia gĩthethũkĩte na handũ hangĩ, o na mahonokio; no rĩrĩ, wee mwene o na nyũmba ya thoguo nĩ kũninwo mũkũninwo biũ; na ningĩ-rĩ, nũ ũũĩ kana hihi watuĩkire mũthamaki mũndũ-wa-nja nĩ ũndũ wa ihinda ta rĩrĩ kĩũmbe?

¹⁵Nake Esiteri agĩkĩmera macokerie Moridekai ũhoro ũũ:

¹⁶Atĩrĩrĩ, thiĩ ũũnganie Ayahudi othe arĩa marĩ kũu Shushani rĩu, mwĩhinge kũrĩa irio nĩ ũndũ wakwa, na mũtikarĩe, o na kana mũnyue, mĩthenya itatũ, mũthenya o na ũtukũ; niĩ na niĩ, o na airĩtu akwa-rĩ, nĩtũkwihinga kũrĩa irio o ta ũguo; na thutha ũcio njoke ndonye he mũthamaki, njĩke ũndũ ũcio ũtatwaranĩte na watho ũrĩa wathanĩtwo; na ingĩgĩkua-rĩ, ndĩgĩkue.

¹⁷Tondũ ũcio Moridekai agĩĩthiĩra, nake agĩĩka maũndũ mothe marĩa Esiteri aamwathĩte eke.