Esther 7

¹Tondũ ũcio mũthamaki na Hamani magĩgĩthiĩ kũnyua ndibei iruga-inĩ rĩu Esiteri, mũtumia wa mũthamaki, aamathondekithĩirie.

²Naguo mũthenya ũcio wa ĩĩrĩ iruga-inĩ rĩu rĩa ndibei, mũthamaki akĩũria Esiteri ũũ: Atĩrĩrĩ, Esiteri, mũthamaki ũyũ mũtumia, ũkwenda gwĩkwo atĩa hihi, na nĩũgwĩtĩkĩrĩrũo? Ũndũ ũrĩa ũrenda kũ’hoya nĩ ũrĩkũ? Nĩ ũndũ-rĩ, o na kũngĩkorũo nĩ nuthu ya mabũrũri marĩa njathaga ũkũ’hoya-rĩ, ũndũ ũcio nĩũgwĩkwo.

³Hĩndĩ ĩo Esiteri, mũtumia wa mũthamaki, agĩkiuga atĩrĩ, Ingĩkorũo nĩnjĩtĩkĩrĩkĩte nĩwe, wee mũthamaki ũyũ, na ũkorũo nĩwonete arĩ wega-rĩ, ndagũthaitha ũreke ’heo ũndũ ũyũ ndĩrenda, naguo nĩ atĩ ndekwo ndũũre muoyo, o na andũ akwa o nao marekwo matũũre muoyo nĩ ũndũ wa ihoya rĩakwa.

⁴Nĩ ũndũ tũrĩ endie, niĩ mwene o na andũ akwa, nĩ getha tũninwo, tũũragwo, tũhuke biũ. No rĩrĩ, korũo nĩ kwendio tũkwendio tũgatuĩke ngombo cia arũme, o na cia andũ-a-nja, nĩingĩĩkirĩire o ki, o na harĩa thũ iitũ ĩtangĩhota kũrĩha ngero ĩrĩa ĩngĩgerũo mũthamaki.

⁵Hĩndĩ ĩo Ahasuerusu, mũthamaki, agĩkĩũria Esiteri, mũtumia wake, atĩrĩ, Ũcio ũngĩeta gwĩciria na ngoro yake eke ũndũ ta ũcio-rĩ, nũ hihi; na arĩ ha?

⁶Nake Esiteri akiuga atĩrĩ, Nĩ thũ o na mũmuku witũ; na nĩwe Hamani ũyũ mwaganu. Hĩndĩ ĩo Hamani agĩgĩĩtigĩra arĩ hau mbere ya mũthamaki o na mũtumia wake.

⁷Nake mũthamaki agĩũkĩra atũkũyanĩte, akiuma iruga-inĩ rĩu rĩa ndibei, agĩthiĩ mũgũnda wa nyũmba-inĩ ĩo ya athamaki, nake Hamani akĩrũgama ethaithanĩrĩre he Esiteri, mũtumia wa mũthamaki, nĩguo amũhonokie ndakoragwo; nĩ ũndũ nĩonire atĩ mũthamaki nĩaacirĩire kũmwĩka ũũru.

⁸Nake mũthamaki akiuma mũgũnda ũcio wa nyũmba-inĩ ya mũthamaki, agĩcoka harĩa maanyuagĩra ndibei iruga-inĩ rĩu; nake Hamani agĩkorũo egũithĩtie ũrĩrĩ-inĩ ũrĩa Esiteri aaikarĩire etiiranĩtie. Hĩndĩ ĩo mũthamaki agĩkiuga atĩrĩ, Hĩ, kaĩ egũkĩenda kũrũnda mũtumia wakwa, o gũkũ nyũmba ndĩkĩrĩ ho? Nake mũthamaki aarĩkia kuuga ũguo andũ magĩkĩhumba Hamani ũthiũ.

⁹Hĩndĩ ĩo Haribona, mũndũ ũmwe wa arĩa mehokeirũo maũndũ ma nyũmba ya mũthamaki thĩinĩ, arĩa maakorirũo me mbere yake, akiuga ũũ: O na atĩrĩrĩ, nyũmba-inĩ ya Hamani nĩkuo kũrũgamĩtio mũtĩ wa mĩkono mĩrongo ĩtano wa gũcuuria mũndũ, ũrĩa Hamani athondekithĩtie nĩ ũndũ wa Moridekai, o we ũcio waaririe ndeto njega ĩkoniĩ mũthamaki. Nake mũthamaki akiuga atĩrĩ, Mũcuuriei mũtĩ-inĩ ũcio igũrũ.

¹⁰Andũ acio magĩgĩcuuria Hamani mũtĩ-inĩ ũcio aathondekithĩtie nĩ ũndũ wa Moridekai. Hĩndĩ ĩo mũthamaki agĩgĩthirũo nĩ matũkũya.