Hebrews 12

¹HAKĨRĨ ũguo-rĩ, kuona atĩ nĩtũthiũrũrũkĩirio nĩ aira aingĩ ũũ, mahaana ta itu rĩnene, o na ithuĩ nĩtwĩaũre kĩrĩa gĩothe gĩtũritũhĩire, o na wĩhia ũrĩa ũtũrigicaga mũno, tũgĩteng’ere kĩhĩtahĩtano-inĩ kĩrĩa tũigĩirũo mbere iitũ tũkirĩrĩirie,

²o tũcũthĩrĩirie Jesu, ũrĩa wĩ mwambĩrĩria na mũhingia wa wĩtĩkio ũrĩa twĩtĩkĩtie. We-rĩ, nĩ ũndũ wa gĩkeno kĩrĩa aaigĩirũo mbere yake, nĩaakirĩrĩirie ũhoro wa kwambwo mũtharaba-inĩ, atekũũria gũconorũo, na rĩu nĩaikaire thĩ mwena wa ũrĩo wa gĩtĩ-gĩa-ũthamaki kĩrĩa kĩa Ngai.

³Rĩu-rĩ, nĩ getha mũtikae kũnoga kana kũũrũo nĩ hinya ngoro-inĩ, cũraniai ũhoro wa ũcio wakirĩrĩirie ngarari nyingĩ ũũ cia ehia magĩkararania nake.

⁴Inyuĩ-rĩ, mũtirĩ mũrarũa o nginya mũkoira thakame mũkĩgianaga na mehia:

⁵na nĩmũriganĩirũo nĩ ũhoro wa kũmũhatĩrĩria ũrĩa mũtaaragwo naguo ta mwĩ ciana, mũkerũo atĩrĩ: Mũrũ wakwa, menya gũkaira iherithia rĩa Mwathani, Kana ũũrũo nĩ hinya warũithio nĩwe.

⁶Nĩ gũkorũo ũrĩa Mwathani endete, nĩwe aherithagia, Na akahũra mwana o wothe ũrĩa etĩkagĩra.

⁷Inyuĩ nĩmũkiragĩrĩria nĩ getha mũrutagwo o mũkĩherithagio; Ngai amwĩkaga o ta mũrĩ ciana ciake; nĩ ũndũ-rĩ, nĩ mwana ũrĩkũ ũtaherithagio akĩrutwo nĩ ithe?

⁸Ĩndĩ mũngĩikara mũtekũherithio iherithia rĩrĩa rĩmenyeretwo nĩ andũ othe-rĩ, mũrĩ ciana cia mũka wa njĩra, mũtirĩ ciana ii na mwene.

⁹Ningĩ-rĩ, twarĩ na maithe maitũ arĩa maatũciarire mũciarĩre wa mwĩrĩ, nao nĩmaatũherithagia na tũkamekagĩrĩra. Githĩ tũtiagĩrĩirũo o makĩria nĩ gwathĩkagĩra Ithe wa maroho maitũ, tũgĩtũũre muoyo?

¹⁰Nĩ gũkorũo acio nĩmaatũherithagia o matukũ manyinyi, o ta ũrĩa mendaga; ĩndĩ we Ngai-rĩ, ekaga ũguo nĩguo atũgune, nĩ getha tũgwatanĩre nake ũtheru wake.

¹¹Kũherithio o guothe kuonagwo o ihinda rĩakuo ta gũtarĩ gĩkeno, tiga o kĩeha: no rĩrĩ, thutha-inĩ nĩkũrehagĩre andũ arĩa mamenyeretio nakuo maciaro me na thayũ, marĩa moimanĩte na ũthingu.

¹²Nĩ ũndũ ũcio-rĩ, tambũrũkiai moko marĩa macunjurĩte, o na maru marĩa maregerete:

¹³na mwĩrũngarĩrie njĩra cia makinya manyu, nĩ getha kĩrĩa gĩthuaga gĩtikagonyorũo, no kaba kĩhonio.

¹⁴Geriai na kĩyo gũikarania mũiguanĩte na andũ othe, na kũgĩa na ũtheru o ũrĩa, mũndũ angĩkorũo awagĩte-rĩ, ndakonana na Mwathani.

¹⁵Wĩmenyererei atĩ mũndũ o wothe wanyu ndakaage gũkinyĩrũo nĩ Wega wa Ngai; o na kana ũndũ mũũru ũtariĩ ta mũri wa mũtĩ mũrũrũ ũmere kũrĩ inyuĩ ũmũtangage, na andũ aingĩ magĩe na thahu nĩ ũndũ waguo;

¹⁶ningĩ atĩ gũtikanagĩe na mũhũri maraya kana mũndũ ũtetigagĩra Ngai, ta Esau, ũrĩa wendirie ũrigithathi wake ũkiuma irio cia rũĩga rũmwe.

¹⁷Tondũ nĩmũũĩ atĩ thutha ũcio, rĩrĩa aacokire kwenda kũgaĩrũo kĩrathimo, akĩregerũo, o na aageragia mũno gũkĩona akĩrĩraga maithori, nĩ ũndũ ndaigana kuona kamweke ga kwĩrira.

¹⁸Tondũ rĩrĩ, mũtikinyĩte kĩrĩma-inĩ kĩrĩa kĩngĩhutĩka na gĩakanĩte mwaki, kana mũgakinya kũrĩa kwĩ na itu rĩthimbu, na nduma, na kĩhuhũkanio

¹⁹na mũgambĩre wa coro, o na mũgambo ũkĩaria. Naguo arĩa maaũiguire-rĩ, magĩthaithana atĩ matigacoke kũheo ũhoro ũngĩ o na ũmwe;

²⁰nĩ gũkorũo matiahotire gwĩtiiria ũhoro ũyũ waathanĩtwo atĩrĩ, O na nyamũ yo ĩngĩhutia kĩrĩma gĩkĩ-rĩ, no ĩhũrũo na mahiga ĩkue.

²¹Naguo ũndũ ũcio wonekire ũkĩrehe kĩmako kĩnene ũguo, ũgĩgĩtũma Musa oige atĩrĩ, Nĩngwĩtigĩra mũno o na ngainaina.

²²Ĩndĩ inyuĩ-rĩ, mũkinyĩte kĩrĩma-inĩ kĩrĩa gĩa Zayuni, o itũũra-inĩ rĩa Ngai ũrĩa ũtũire muoyo, narĩo nĩrĩo Jerusalemu, itũũra o rĩrĩa rĩa Igũrũ, mũgakinya kũrĩa kwĩ araika ngiri itangĩgereka

²³marũrũnganĩte kĩũngano kĩnene, o na gwĩ kanitha wa marigithathi arĩa maandĩkĩtwo kũrĩa Igũrũ, ningĩ kũrĩ Ngai mũtuĩri andũ othe cira, o na kũrĩ maroho ma andũ athingu arĩa matuĩkĩte aagĩrĩru kũna,

²⁴o na kũrĩ Jesu, mũiguithania wa kĩrĩkanĩro kĩrĩa kĩerũ, o na thakame ya kũminjaminjanĩrio ĩrĩa ĩheanaga mohoro mega kũrĩ ĩrĩa ya Habili.

²⁵Menyai mũkarega kũigua Ũrĩa ũkwaria. Tondũ rĩrĩ, akorũo andũ matiahonokire, arĩa maaregire kũigua ũrĩa wamakaanirie arĩ gũkũ thĩ-rĩ, githĩ ithuĩ tũtingĩaga o makĩria kũhonokio, tũngĩkĩhutatĩra ũrĩa ũkaananagia arĩ Igũrũ?

²⁶Ũcio nĩwe mũgambo wake watũmire thĩ ĩthingithe hĩndĩ ĩo: no rĩu nĩeranĩire akoiga atĩrĩ, O ihinda rĩmwe rĩngĩ-rĩ, nĩndĩĩtũma thĩ ĩthingithe, na to thĩ iiki, o na igũrũ narĩo rĩthingithe.

²⁷Nacio ciugo icio “o ihinda rĩmwe rĩngĩ,” nĩcio cionanagia ũrĩa indo ikeherio biũ o iria igakorũo ithingithĩtio - nĩcio iria ciombirũo-rĩ, - nĩ getha indo iria itangĩhota gũthingithĩka ciikare.

²⁸Tondũ ũcio-rĩ, kuona atĩ nĩtũheetwo ũthamaki ũrĩa ũtangĩhota gũthingithĩka, nĩtũgĩei na ngatho; nĩ getha, tũkĩrĩ o nacio-rĩ, tũtungatagĩre Ngai na ũtungati o ũrĩa ũngĩmũkenia, tũkĩmwĩkagĩrĩra na tũkĩmwĩtigagĩra:

²⁹amu Ngai witũ nĩ mwaki ũninanaga.