Hebrews 8

¹RĨU-RĨ, ha ũhoro wa maũndũ macio twamwĩra, ũndũ ũrĩa wĩ bata makĩria nĩ ũyũ, atĩ nĩtũrĩ na mũthĩnjĩri-Nga-mũnene ũtariĩ o ũguo, nake nĩaikarĩte thĩ mwena wa ũrĩo wa gĩtĩ-gĩa-ũthamaki kĩrĩa kĩa ũrĩa Mwene-Ũkaru wĩ kũrĩa Igũrũ.

²Nake nĩ mũtungatĩri wa handũ harĩa hatheru, na wa gĩikaro kĩrĩa kĩa ma, o kĩrĩa gĩaakirũo nĩ Mwathani, na ti mũndũ.

³Na rĩrĩ, mũthĩnjĩri Ngai-mũnene o wothe nĩatuagwo wa kũrutagĩra Ngai maruta na magongona; na tondũ wa ũguo, ũcio nake no kinya akorũo e na kĩndũ gĩa kũruta.

⁴Nake angĩrĩ gũkũ thĩ-rĩ, ndangĩtuĩka mũthĩnjĩri-Ngai o na atĩa, kuona atĩ nĩkũrĩ athĩnjĩri-Ngai arĩa marutagĩra Ngai maruta o marĩa maathanĩtwo watho-inĩ.

⁵Acio-rĩ, ũndũ ũrĩa matungatagĩra no mũhianĩre wa maũndũ ma Igũrũ, o na kĩĩruru kĩamo: o ta ũrĩa Musa aataarirũo nĩ Ngai hĩndĩ ĩrĩa aaitĩkire gwaka gĩikaro kĩrĩa; amu nĩerirũo atĩrĩ, Menyerera atĩ ũthondeke indo ciothe ũkĩihaananagia na mũhianĩre ũrĩa woneirio kĩrĩma-inĩ.

⁶Ĩndĩ mũthĩnjĩri-Ngai ũyũ nĩagĩĩte na ũtungati mwega makĩria, ũkĩrĩte ũcio wa tene kũringana na ũrĩa atuĩkĩte mũiguithania wa kĩrĩkanĩro kĩega kũrĩ kĩrĩa gĩa tene, o kĩrĩa kĩrĩkanĩro na ciĩranĩro njega kũrĩ iria cia tene.

⁷Nĩ ũndũ-rĩ, kĩrĩkanĩro kĩrĩa kĩa mbere kĩngĩakorirũo gĩtarĩ na ihĩtia, gũtingĩagĩcokire kũgĩa na bata wa kĩngĩ gĩa kerĩ.

⁸Ĩndĩ Ngai nĩekuonania ihĩtia rĩao akamera ũũ: Atĩrĩrĩ, matukũ nĩmagoka, ũguo nĩguo Mwathani oiga, Marĩa ngarĩkanĩra kĩrĩkanĩro kĩerũ na nyũmba ya Isiraeli na nyũmba ya Juda;

⁹Nakĩo kĩrĩkanĩro kĩu gĩtigatuĩka ta kĩrĩa ndarĩkanĩire na maithe mao, Hĩndĩ ĩrĩa ndamanyitire na guoko ngĩmaruta bũrũri wa Misiri; Nĩ ũndũ matiigana kũrũmia kĩrĩkanĩro kĩu, Na niĩ ngĩaga kũmatindĩrĩra, ũguo nĩguo Mwathani oiga.

¹⁰Amu-rĩ, gĩkĩ nĩkĩo kĩrĩkanĩro kĩrĩa ngarĩkanĩra na nyũmba ya Isiraeli, Matukũ macio maathira, ũguo nĩguo Mwathani oiga; Nĩ gwĩkĩra ngekĩra mawatho makwa thĩinĩ wa meciria mao, Na ningĩ ndĩmaandĩke ngoro-inĩ ciao; Na niĩ nduĩke Ngai wao, Nao matuĩke andũ akwa.

¹¹Nao matigacoka kũrutana mũndũ na mũndũ ũrĩa ũngĩ, O na kana mũndũ arute mũrũ wa ithe, akĩmwĩra atĩrĩ: Umĩrania ngoro na Mwathani: Nĩ gũkorũo andũ othe nĩmagakorũo ma’menyete, Kuuma o ũrĩa mũnyinyi wao gwata ũrĩa mũnene.

¹²Nĩ ũndũ nĩngamakirĩra waganu wao, O namo mehia mao ndigacoka kũmaririkana o rĩ o rĩ.

¹³Na rĩrĩ, aagweta kĩrĩkanĩro kĩerũ-rĩ, nĩ gũtua aatuire kĩrĩa kĩa mbere gĩkũrũ. Nakĩo kĩndũ o kĩrĩa kĩrakũra na gĩgatuĩka gĩa tene, nĩgĩkiriĩ kũbuĩria o biũ.