Hosea 8

¹Iga thongori iromo-inĩ ciaku, andũ mehũge. Amu thũ nĩĩrĩũkĩrĩra nyũmba ya Jehova ta ndiyũ; tondũ nĩmehĩtie kĩrĩkanĩro gĩakwa, na makahĩtania na watho wakwa.

²Nake Isiraeli nĩakangaĩra akiugaga atĩrĩ, Wee Ngai wakwa-ĩ, ithuĩ nĩtũgĩkũũĩ wee.

³No-rĩ, Isiraeli nĩateete ũndũ ũrĩa mwega haraya; nayo thũ ĩrĩa nĩĩkamũteng’eria.

⁴Nĩmakĩrũgamĩtie athamaki, no ti ũndũ wakwa; na magatua anene, na niĩ ndiamenyaga; o na gũthondeka methondekeire mĩhianano na betha yao na thahabu yao; namo maũndũ macio magatuĩka ma gũtũma mang’ũrio.

⁵Njaũ yaku, wee Samaria, ndĩmĩteete biũ. Namo marakara makwa nĩmaakanĩte harĩ o; kaĩ nĩ ihinda rĩigana atĩa rĩtigaire magĩgakinyĩrĩra ũtheru?

⁶Amu-rĩ, yo yoimire harĩ Isiraeli, nĩ mũruti-wĩra wamĩũmbire, nayo ti Ngai. Ĩĩ, ti-itherũ, njaũ ĩo ya Samaria nĩĩkoinangwo tũcunjĩ.

⁷Nĩ ũndũ-rĩ, nĩ kũhanda mahandĩte rũhuho, na kũgetha makagetha kĩhuhũkanio; yo ti kĩndũ kĩngĩciara ta ngano, nakĩo kĩmera gĩakĩo gĩtikoima mũtu; o na kĩngĩciara-rĩ, arũrĩrĩ nĩo magakĩrĩa.

⁸Isiraeli matariĩ ta mameretio magathira; maharaganĩte ndũrĩrĩ-inĩ magatuĩka ta kĩndũ gĩtangĩkenerũo.

⁹Thima-rĩ, nĩmaambatĩte magathiĩ Ashuri, magatuĩka ta njagĩ ya nduĩki; Efiraimu nake nĩathogorete anyanya ta mũmaraya.

¹⁰Ĩĩ, o na maakorũo nĩmathogoranĩtie ũguo gatagatĩ-inĩ ka ndũrĩrĩ-rĩ, rĩu nĩndĩrĩmongania, nao maambĩrĩrie kũnyihanyihio nĩ ũndũ wa mũrigo wa mũthamaki o na anene.

¹¹Tondũ Efiraimu nĩakĩingĩhĩtie marutĩro ma igongona ma gũtungatagĩra wĩhia-rĩ, marutĩro macio mo mene makoretwo marĩ o wĩhia harĩ we.

¹²O na ndamwandĩkĩra watho wakwa na maathani ngiri ikũmi-rĩ, mo nĩmagĩtuagwo ta kĩndũ gĩtatũire kĩũĩwo.

¹³Naho ha ũhoro wa magongona makwa-rĩ, o mathĩnjaga nyama magacoka gũcirĩa; no-rĩ, Jehova ndarĩ hingo etĩkagĩra magongona macio. Nake rĩu nĩegũkĩririkana waganu wao, na akamarĩhia mehia mao; nao nĩmagagĩcoka o Misiri.

¹⁴Amu-rĩ, Isiraeli nĩariganĩirũo nĩ Mũmũũmbi, agaaka nyũmba cia ũnene; nake Juda nĩaingĩhĩtie matũũra mairige; no niĩ-rĩ, nĩngahurĩria matũũra macio make mwaki, naguo no ũcine nyũmba iria ndũũgĩru iria ii kuo.