James 5

¹RĨU-RĨ, ta thikĩrĩriai, itonga ici, rĩrai mũkĩanũkaga nĩ ũndũ wa mĩthĩnĩko ĩrĩa ĩkamũkora.

²Ũtonga wanyu nĩũbuthĩte, nacio nguo cianyu nĩ ndĩĩku nĩ memenyi.

³Nayo thahabu yanyu o na betha yanyu nĩirotete, nakuo kũrota gwacio nĩkuo gũkamuumbũra ũrĩa mũtariĩ, na nĩgũkamumuthũra nyama cia mĩĩrĩ yanyu o ta mwaki. Nĩmwĩigĩire mũthithũ o matukũ-inĩ marĩa ma ithirĩro.

⁴Atĩrĩrĩ, mũcara wa aruti wĩra arĩa maamũgetheire irio mĩgũnda yanyu, ũrĩa mwamaimire na wogogani-rĩ, mũcara ũcio nĩwanagĩrĩra: naguo mũkayo wa agethi acio nĩũkinyĩte matũ-inĩ ma Mwathani mũnene wa ita.

⁵Inyuĩ-rĩ, mũtũire gũkũ thĩ mwĩgangarĩte na mũgĩĩkenagia na indo iria ciothe muonaga, nacio ngoro cianyu-rĩ, mũtũire mũcituagĩra ta irĩ gĩcegũ, o nginya mũthenya wa gũthĩnjwo.

⁶Nake mũndũ ũrĩa mũthingu-rĩ, nĩmũmũtuĩrĩire cira hatarĩ kĩhooto, na mũkamũũragithia; nowe ndamũgiaga.

⁷Hakĩrĩ ũguo, ariũ a Ithe witũ-rĩ, kiragĩrĩriai o nginya rĩrĩa Mwathani agoka. Ta rorai ũrĩa mũrĩmi etagĩrĩra irio iria ciumaga thĩ, o iria irĩ bata, ategũcithethũkĩra, o nginya ikoirĩrũo nĩ mbura ya mbere, o na ĩrĩa ya kũrigĩrĩria.

⁸O na inyuĩ-rĩ, kiragĩrĩriai; na mwĩkindĩre ngoro-inĩ cianyu, amu Mwathani akiriĩ gũũka.

⁹Ariũ a Ithe witũ, tigagai gũtetania, nĩ getha mũtigacirithio: atĩrĩ, Mũtui cira nĩarũngiĩ mĩromo-inĩ.

¹⁰Ariũ a Ithe witũ, gwatai ũhoro wa maũndũ marĩa anabii mekirũo, arĩa maaragia rĩĩtwa-inĩ rĩa Mwathani, ũhoro ũcio ũtuĩke kĩonereria kĩanyu ũhoro-inĩ wa kũnyarirĩka, na wa gũkirĩrĩria

¹¹Rĩu-rĩ, acio maakirĩrĩirie-rĩ, tũmatuaga arathime; nĩmũiguĩte ũhoro wa gũkirĩrĩria kwa Ayubu, na mũkona ũrĩa Mwathani aarigĩrĩirie kũmwĩka, o na ũrĩa Mwathani arĩ muuma-andũ mũno na mũigua-tha.

¹²No rĩrĩ, gũkĩra maũndũ mothe, ariũ a Ithe witũ, mũtikanehĩte o na rĩ. Tigai kwĩhĩta na Igũrũ, o na kana na thĩ, o na kana na mwĩhĩtwa ũngĩ o na ũrĩkũ: no inyuĩ-rĩ, mwoiga ĩĩ-ni, gũtuĩke o ĩĩ-ni; na mwoiga aca, gũtuĩke o aca; nĩ getha mũtikae gũcirithio mũtuwo ehia.

¹³Nĩharĩ mũndũ thĩinĩ wanyu wonete ũũru? Ũcio nĩahoe. Nĩharĩ wonete wega? Nĩaine nyĩmbo.

¹⁴Nĩharĩ thĩinĩ wanyu mũndũ ũrũarĩte? Ũcio nĩete athuri a kanitha; nao nĩmamũhoere, makĩmũhakaga maguta rĩĩtwa-inĩ rĩa Mwathani.

¹⁵Nao maahoya metĩkĩtie, ihoya rĩu nĩrĩgatũma mũndũ ũcio mũrũaru ahonoke; nake Mwathani nĩakamũũkĩria; o na angĩkorũo nĩehĩtie, nĩakoherũo mehia macio make.

¹⁶Hakĩrĩ ũguo-rĩ, umbũranagĩrai mehia manyu o mũndũ na ũrĩa ũngĩ, na mũhoyanagĩre, nĩ getha mũhonagio. Rĩu-rĩ, ihoya rĩa mũndũ mũthingu, rĩkĩruta wĩra warĩo, nĩrĩtũmaga maũndũ manene mekĩke.

¹⁷Elija aarĩ mũndũ ũũmbĩtwo mũũmbĩre ũmwe na ithuĩ, na nĩaahoire o kũhoya atĩ mbura ndĩkoire, nayo mbura ndĩigana kuura mĩaka ĩtatũ na mĩeri ĩtandatũ.

¹⁸Ningĩ agĩcoka akĩhoya rĩngĩ, nakuo matu-inĩ gũkiuma mbura, nayo thĩ ĩgĩcoka gũciara maciaro mayo.

¹⁹Atĩrĩrĩ, ariũ a Baba, kũngĩkorũo nĩkũrĩ mũndũ wa thiritũ yanyu ũhĩtanĩtie na ũhoro-ũrĩa-wa-ma, na mũndũ ũngĩ amũgarũre,

²⁰menyai atĩ ũcio ũgarũrĩte mwĩhia atigane na njĩra yake ya kũhĩtia, nĩ kũhonokia akahonokia roho wa mũndũ ũcio ndakae gũkua, na ahumbĩre mehia maingĩ.