Joel 3

¹Nĩ ũndũ-rĩ, matukũ-inĩ macio, o na ihinda rĩu, rĩrĩa ngakorũo ’hũndũrĩte andũ a Juda o na Jerusalemu arĩa maatũire marindũrĩtwo-rĩ,

²nĩngacokanĩrĩria ndũrĩrĩ ciothe, ndĩciikũrũkie, ndĩcikinyie kĩanda-inĩ kĩa Jehoshafatu; nakuo kũu nĩkuo ngacira nao nĩ ũndũ wa andũ akwa, o na ũndũ wa ũgai wakwa wa andũ a Isiraeli, o acio ciaharaganĩirie ndũrĩrĩ-inĩ, na igĩcoka kũgayana bũrũri wakwa ikĩwĩgwatĩra.

³Ningĩ igĩcukĩra andũ akwa mĩtĩ, igĩkĩneana mwanake akũũranio na mũmaraya, o nao airĩtu ikĩmendia ndibei nĩguo mamĩnyue.

⁴Atĩrĩrĩ, mwĩ na bata ũrĩkũ harĩ niĩ, inyuĩ Turo na Zidoni, o na inyuĩ ng’ongo ciothe cia Filisitia? Anga nĩmũkwĩrĩhĩria ũndũ ũrĩa ndanamwĩka, o na kana mũnjĩke ũndũ o na ũrĩkũ? Mũngĩkorũo nĩmũkwĩrĩhĩria-rĩ, niĩ o na niĩ nĩngũtũma mũcokererũo nĩ rĩĩrĩhĩria rĩu rĩanyu o narua na mĩtũkĩ.

⁵Kuona atĩ nĩmweyoeire betha yakwa, o na thahabu yakwa, o na mũgĩkuua indo ciakwa iria njega cia kwendeka mũno, mũgĩcitwara hekarũ-inĩ cianyu,

⁶o nacio ciana cia Juda o na cia Jerusalemu mũgĩcienderia ihĩĩ cia Ayunani, nĩ getha mũcirindũre mũcitware kũndũ kũraya na mĩhaka ya bũrũri wacio-rĩ,

⁷atĩrĩrĩ, nĩ kwarahũra ngaciarahũra ciume kũu mwaciendirie, na ndũme mũcokererũo nĩ rĩĩrĩhĩria rĩu rĩanyu;

⁸nao ariũ anyu na airĩtu anyu ndĩmendie maneanwo moko-inĩ ma ĩhĩĩ cia Juda, nacio icoke imenderie andũ a Sheba, itwarũo rũrĩrĩ-inĩ rũtũire kũraya mũno; nĩ gũkorũo Jehova nĩwe warĩtie ũhoro ũcio.

⁹Hunjanĩriai ũhoro ũyũ ndũrĩrĩ-inĩ, atĩrĩ, Wĩthagathagĩrei ita, mwarahũre andũ arĩa njamba. Andũ othe a ita nĩmarekwo mathengerere hakuhĩ, mathece njĩra.

¹⁰Hiũ cianyu cia mĩraũ citurei ituĩke hiũ cia njora, o nacio hiũ cianyu cia gũceha mĩtĩ ituĩke matimũ; ningĩ mũndũ ũrĩa mũhinyaru nĩoige atĩrĩ, Rĩu ndĩ na hinya mũno.

¹¹Wĩhĩkei mũũke, inyuĩ andũ a ndũrĩrĩ ciothe arĩa mũtũrigicĩirie; ũnganai inyuothe mwĩcokanĩrĩrie hamwe; nawe, wee Jehova, ũtũme andũ aku arĩa njamba maikũrũke mongane kuo.

¹²Ndũrĩrĩ nĩciĩarahũre, ikinye kĩanda kĩa Jehoshafatu, nĩ ũndũ kũu nĩkuo ngaikara ngĩcirithia ndũrĩrĩ ciothe iria imũrigicĩirie.

¹³Oyai hiũ cianyu cia magetha mũthiĩ mũgũnda, nĩ ũndũ magetha nĩ makinyu; ũkai mũrangarange kĩhihĩro kĩa ndibei, nĩ ũndũ nĩ kĩiyũru, nacio ndua ikaiyũra o nginya ndibei ĩkenda gũitĩka thĩ; nĩ ũndũ waganu wacio nĩũnenehete mũno.

¹⁴Irĩndĩ icio igakorũo ciingĩhĩte o kũingĩha, o kĩrĩndĩ gĩetereire ituĩro rĩakĩo rĩa cira kũu kĩanda-inĩ kĩu! Nĩ ũndũ mũthenya ũrĩa Jehova atuĩte wa gũkinya kĩanda kĩu gĩa ituĩro nĩũkuhĩhĩirie.

¹⁵Riũa na mweri nĩigĩĩte nduma, o nacio njata igatiga kwara.

¹⁶Ningĩ Jehova nĩakaruruma e kũu Zayuni, na oigĩrĩrie na mũgambo mũnene e kũu Jerusalemu, nakuo igũrũ na thĩ gũgĩthingithe. No rĩrĩ, Jehova nĩwe ũgatuĩka mũrahĩro wa andũ ake, na atuĩke ta kĩhingo kĩrũmu harĩ ciana cia Isiraeli.

¹⁷Ũguo nĩguo mũkamenya atĩ niĩ nĩ niĩ Jehova Ngai wanyu, na atĩ ndũũraga Zayuni kĩrĩma-inĩ gĩakwa kĩrĩa kĩamũre; narĩo Jerusalemu nĩrĩkoragwo rĩrĩ rĩamũre, na gũtirĩ andũ a kũngĩ magacoka kũrĩtuĩkania o na rĩ.

¹⁸Na nĩgũgakinya atĩrĩ mũthenya ũcio, atĩ irĩma-inĩ nĩgũgataataga ndibei ĩrĩ mũrĩo, o nakuo ithũngũri-inĩ kuurage iria, o natuo tũrũũĩ tuothe twa Juda tũthererage maĩ; nakuo nyũmba ya Jehova gũtathũke gĩthima, nakĩo gĩikũrũkage maĩ makĩo o kũu kĩanda gĩa Shitimu.

¹⁹No rĩrĩ, Misiri nĩ gũkira gũgakira ihooru, o nakuo Edomu gũtuĩke ta werũ mũkiru ihooru, nĩ ũndũ wa maũndũ ma ũhinya marĩa andũ akuo mekire ciana cia Juda, magĩgĩitithia thakame ĩtarĩ na ũũru bũrũri wacio.

²⁰No Juda nĩgũgatũũrũo tene na tene, o nakuo Jerusalemu gũtũũrũo o nginya njiaro na njiaro.

²¹Na nĩngamarĩhĩria thakame yao o ĩrĩa itarĩ ndamarĩhĩria, nĩ ũndũ Jehova atũũraga Zayuni.