John 11

¹NA rĩrĩ, kwarĩ mũndũ warũarĩte wetagwo Lazaro, wa kũrĩa gwetagwo Bethania, kwa Mariamu na mwarĩ wa nyina wetagwo Maritha.

²Na nĩ Mariamu ũrĩa wahakire Mwathani maguta, agĩcoka kũmũgiria nyarĩrĩ na njuĩrĩ yake, nĩwe warũarĩtie mũrũ wa nyina, ũcio Lazaro.

³Acio aarĩ a nyina magĩkĩmũrekeria mũndũ akoige, Mwathani, mwendwo waku nĩ mũrũaru.

⁴Nake Jesu aaigua ũguo, akiuga atĩrĩrĩ, Ndũari ĩo ti ya gĩkuũ; nĩ ya gũtũma Ngai agoocwo, atĩ Mũrũ wa Ngai agoocithio nĩyo.

⁵Na rĩrĩ, Jesu nĩ kwenda endete Maritha na mwarĩ wa nyina o na Lazaro.

⁶Nake aaigua atĩ nĩ mũrũaru, akĩamba gũikara mĩthenya ĩĩrĩ o kũu aarĩ.

⁷Na yathira akĩĩra arutwo atĩrĩ, Nĩtũcokei Judea.

⁸Nao arutwo makĩmwĩra, Rabii, o ro rĩu Ayahudi nĩmarendaga gũkũhũra na mahiga; nawe githĩ ũgũcoka kuo?

⁹Nake Jesu agĩcokia atĩrĩ, Thaa cia mũthenya-rĩ, to ikũmi na igĩrĩ? Mũndũ aathiĩ kũndũ mũthenya, ndangĩhĩngwo, nĩ ũndũ nĩekuona ũtheri wa gũkũ thĩ.

¹⁰No rĩrĩ, mũndũ aathiĩ ũtukũ, nĩahĩngagwo, nĩ ũndũ ũtheri ndarĩ naguo thĩinĩ wake.

¹¹Akiuga ũguo, agĩcoka akĩmera atĩrĩrĩ, Mũrata witũ Lazaro nĩakomete toro, no nĩngũthiĩ ngamũũkĩrie.

¹²Nao arutwo magĩkĩmwĩra, Mwathani, akorũo nĩonete toro, nĩekũhona.

¹³Na rĩrĩ, Jesu nĩ ũhoro wa gũkua gwake aagwetire; nao moĩ aagwetaga ũhoro wa gũkoma toro.

¹⁴Hĩndĩ ĩo Jesu agĩkĩmera wega, atĩrĩ, Lazaro nĩakuĩte.

¹⁵Na nĩngenete nĩ ũndũ wanyu nĩ ũndũ itararĩ kuo, nĩ getha mũgetĩkie; no rĩrĩ, nĩtũgĩthiĩ kũrĩ we.

¹⁶Nake Toma, ũrĩa wĩtagwo Wa-mahatha, agĩkĩĩra arutwo arĩa angĩ atĩrĩ, Nĩtũthiĩi na ithuĩ, tũgakuanĩre nake.

¹⁷Jesu aakinya, agĩgĩkora arĩkĩtie kũnina matukũ ana mbĩrĩra.

¹⁸Na rĩrĩ, kũu Bethania kwarĩ gũkuhĩ na Jerusalemu, itĩĩna ta rĩa mairo igĩrĩ;

¹⁹nao Ayahudi nĩmokĩte aingĩ kwa Maritha na Mariamu, kũmacakaithia nĩ ũndũ wa mũrũ wa nyina wao.

²⁰Maritha aaigua atĩ Jesu nĩegũũka, agĩgĩthiĩ kũmũthagania, nake Mariamu agĩtigwo aikaire thĩ nyũmba.

²¹Nake Maritha agĩkĩĩra Jesu atĩrĩrĩ, Mwathani, ũngĩarĩ kuo, mũrũ wa maitũ ndangĩakuire.

²²O na rĩu nĩnjũĩ o ũndũ ũrĩhoya Ngai, o wothe, Ngai nĩarĩkũhe.

²³Jesu akĩmwĩra atĩrĩ, Mũrũ wa nyũkwa nĩakariũka.

²⁴Nake Maritha akĩmwĩra, Nĩnjũĩ nĩakariũka gũkĩriũkwo mũthenya wa ithirĩro.

²⁵Nake Jesu akĩmwĩra atĩrĩrĩ, Nĩ niĩ kũriũka na nĩ niĩ muoyo; ũrĩa wĩĩ’hokete niĩ, o na aakua, no agatũũra muoyo,

²⁶na mũndũ o wothe wĩ muoyo na akeĩ’hoka niĩ, ndarĩ hingo agakua. Ũguo nĩwĩtĩkĩtie?

²⁷Akĩmwĩra, Ĩĩ-ni, Mwathani; niĩ nĩnjĩtĩkĩtie atĩ wee nĩwe Kristo, Mũrũ wa Ngai, ũrĩa wa gũũka gũkũ thĩ.

²⁸Na aarĩkia kuuga ũguo, agĩthiĩ, agĩĩta Mariamu, mwarĩ wa nyina, akĩmwĩra atĩrĩ keheri-inĩ, Mũrutani e gũkũ, na nĩoiga ũthiĩ.

²⁹Nake aaigua ũguo agĩũkĩra narua, agĩthiĩ kũrĩ we.

³⁰(Na rĩrĩ, Jesu hĩndĩ ĩo ndaatonyete mũciĩ thĩinĩ; aarĩ o hau aatungirũo nĩ Maritha.)

³¹Ayahudi nao, arĩa maarĩ nake nyũmba makĩmũcakaithagia, mona ũguo Mariamu okĩra narua, oima nja, makĩmũrũmĩrĩra, moĩ aathiĩ mbĩrĩra-inĩ akarĩrĩre ho.

³²Nake Mariamu aakinya harĩa Jesu arĩ, aamuona, agĩkĩmũgũĩra thĩ magũrũ-inĩ, akĩmwĩra, Mwathani, ũngĩakorirũo kuo, mũrũ wa maitũ ndangĩakuire.

³³Nake Jesu aamuona akĩrĩraga, o na Ayahudi nao makĩrĩraga, acio mokire nake, agĩgĩcaya o roho-inĩ thĩinĩ, agĩtangĩka,

³⁴akĩũria, Mũmũigĩte ha? Makĩmwĩra, Ũka, Mũthuri, ũkone.

³⁵Nake Jesu akĩrĩra maithori.

³⁶Nao Ayahudi magĩkiuga atĩrĩ, Onei ũrĩa aamwendete!

³⁷No amwe makiuga atĩrĩ, Mũndũ ũyũ wahingũrire mũndũ ũrĩa maitho ũrĩa warĩ mũtumumu-rĩ, kaĩ atangĩahotire kũgiria mũndũ ũyũ nake akue?

³⁸Nake Jesu agĩgĩthiĩ agĩcayaga rĩngĩ na ngoro, agĩkinya mbĩrĩra-inĩ. Nayo yarĩ ngurunga, na nĩyahingĩtwo mũromo na ihiga.

³⁹Nake Jesu akiuga, Eheriai ihiga. Nake Maritha, mwarĩ wa nyina na ũcio wakuĩte, akĩmwĩra, Mwathani, rĩu nĩakinyĩte kũnunga, amu nĩaninĩte matukũ ana nginya aakua.

⁴⁰Jesu akĩmwĩra atĩrĩ, Ndikwĩrire, atĩ wetĩkia, nĩũkuona ũnene wa Ngai?

⁴¹Magĩkĩeheria ihiga. Nake Jesu agĩtiira maitho, akiuga atĩrĩrĩ, Awa, nĩndakũgatha nĩ ũndũ nĩwanjigua.

⁴²Niĩ no ngũũĩ atĩ nĩũnjiguaga hingo ciothe, no nĩndoiga ũguo nĩ ũndũ wa kĩrĩndĩ gĩkĩ kĩrũgamĩte haha, nĩguo gĩĩtĩkie atĩ nĩwe wandekirie.

⁴³Na aarĩkia kuuga ũguo, akĩanĩrĩra na mũgambo mũnene, akiuga, Lazaro, uma.

⁴⁴Nake ũcio warĩ mũkuũ akiuma, e mũthae moko na magũrũ na matama; naguo ũthiũ nĩaarigicĩirio gĩtambaya. Nake Jesu akĩmera atĩrĩ, Muohorei, mũreke athiĩ.

⁴⁵Tondũ wa ũhoro ũcio, Ayahudi aingĩ makĩya kũmwĩhoka, acio mokire kwĩ Mariamu na makĩona ũndũ ũcio ekire.

⁴⁶No amwe magĩĩtwara kũrĩ Afarisai, makĩmera ũrĩa Jesu ekĩte.

⁴⁷Tondũ ũcio athĩnjĩri-Ngai arĩa anene na Afarisai makĩũngania kĩama, makĩũria atĩrĩ, Tũgwĩka atĩa? amu-rĩ, mũndũ ũcio nĩekaga ciama nyingĩ.

⁴⁸Twakĩmũtiga o ũguo-rĩ, andũ no metĩkie ũhoro wake othe, nao Aroma moke matũtunye handũ haha haitũ, o na ũhoro witũ wa gũtuĩka rũrĩrĩ.

⁴⁹No rĩrĩ, ũmwe wao wetagwo Kaiafa, warĩ mũthĩnjĩri-Ngai ũrĩa mũnene mwaka ũcio, akĩmera atĩrĩ, Inyuĩ mũtirĩ ũndũ mũũĩ;

⁵⁰na mũtigũgĩtarania atĩ ũndũ ũrĩa ũngĩmwagĩrĩra no mũndũ ũmwe akuĩre kĩrĩndĩ, nĩguo rũrĩrĩ ruothe rũtigathire.

⁵¹Na rĩrĩ, akiuga ũguo ndaaririe etaarĩte we mwene, no tondũ aakĩrĩ mũthĩnjĩri-Ngai ũrĩa mũnene mwaka ũcio, nĩ kũratha aarathire atĩ Jesu nĩagakuĩra rũrĩrĩ rũu;

⁵²na ti rũrĩrĩ rũu ruiki, no ningĩ akue nĩ getha acokererie ciana cia Ngai iria itũire ihurunjũkĩte.

⁵³Na kuuma mũthenya ũcio maathugundanagia nĩ getha mamũũragithie.

⁵⁴Tondũ ũcio Jesu ndaacokire gũceeranga kwa Ayahudi akĩonagwo; nĩ kuuma oimire kũndũ kũu agĩthiĩ rũtere-inĩ gũkuhĩ na werũ, agĩkinya itũũra rĩĩtagwo Efiraimu, agĩikara kuo na arutwo ake.

⁵⁵Na rĩrĩ, Bathaka ya Ayahudi nĩyatuĩte gũkinya, na andũ aingĩ makĩambata Jerusalemu moimĩte ng’ongo iria ingĩ, makĩambata Bathaka ĩtaanakinya, magetherie.

⁵⁶Nao nĩmaacaragia Jesu kuo, na makaaranagĩria marũngiĩ hekarũ-inĩ, makorania atĩrĩ, Mũkuona atĩa? Mũkuuga ndagoka gĩathĩ gĩkĩ?

⁵⁷Na rĩrĩ, athĩnjĩri-Ngai arĩa anene na Afarisai nĩmaathanĩte, makoiga atĩ akorũo kwĩ mũndũ ũũĩ harĩa arĩ, nĩoige, nĩguo mamũnyite.