Jonah 3

¹Nayo ndũmĩrĩri ya Jehova ĩgĩcoka ĩgĩkinyĩra Jona rĩa kerĩ, akĩĩrũo atĩrĩ,

²Ũkĩra ũthiĩ Nineve, itũũra rĩrĩa inene, ũrĩgũtũkire ũrĩhunjĩrie ũhoro o ũrĩa ngũkwĩra.

³Nake Jona agĩgĩũkĩra agĩthiĩ Nineve, kũringana na ũhoro ũcio wa Jehova. Na rĩrĩ, itũũra rĩu rĩa Nineve rĩarĩ inene mũno, rĩa kũnina matukũ matatũ rĩgĩgatuĩkanĩka.

⁴Nake Jona akĩambĩrĩria gũtonya itũũra rĩu, agĩthiĩ itĩĩna rĩa mũthenya ũmwe, agĩkĩanĩrĩra akiuga atĩrĩ, No matukũ mĩrongo ĩna matigaire gũkũ Nineve kũhang’ũranio!

⁵Nao andũ acio a Nineve magĩgĩĩtĩkia Ngai; makĩanĩrĩrithia atĩ kũgĩe hĩndĩ ya kwĩima irio, na makĩĩhumba nguo cia makũnia, kuuma o ũrĩa mũnene wao othe o kinya ũrĩa mũnyinyi wao othe.

⁶Nacio ndeto icio igĩkinyĩra mũthamaki wakuo, kũu Nineve, nake agĩũkĩra akiuma gĩtĩ-inĩ gĩake kĩa ũnene, na akĩĩaũra nguo yake ya ũnene, akĩĩhumba nguo ya ikũnia, agĩgĩikara thĩ mũhu-inĩ.

⁷Ningĩ akĩanĩrĩrithia ũhoro akĩũhunjithia Nineve guothe, igũrũ rĩake we mũthamaki na andũ a gwake arĩa anene, akiuga atĩrĩ, Menyai gũkareka mũndũ o wothe kana nyamũ, gwata rũũru rũa ng’ombe kana rũa mbũri, irũme kĩndũ:

⁸itikanarĩithio kana inyuithio maĩ: tiga o kwĩhumbwo makũnia, andũ mehumbe o nacio nyamũ ihumbwo, na gũkaĩrũo Ngai na hinya: ĩĩ-ni, mũndũ o wothe nĩagarũrũke atige mĩthiĩre yake ĩrĩa mĩũru, o na maũndũ ma ũhinya marĩa me moko-inĩ make.

⁹Nũ ũũĩ kana Ngai nĩangĩgarũrũka ericũkwo, atigane na marakara macio make mahiũ ũguo, tũtige kũninwo?

¹⁰Nake Ngai akĩona ciĩko icio ciao atĩ nĩmaathengeire mĩthiĩre yao mĩũru; ningĩ Ngai agĩkĩĩricũkwo agĩtiga ũũru ũrĩa oigĩte ekũmeka; na ndaigana kũwĩka.