Luke 12

¹NA hĩndĩ ĩo-rĩ, kĩrĩndĩ kĩingĩ gĩgĩkorũo kĩũnganĩte, andũ ngiri nyingĩ, o kinya makĩrangana; nake akĩrika kwĩra arutwo ake, o mbere, atĩrĩ, Wĩmenyagĩrĩrei ndawa ya kũimbia mũgate ĩrĩa ya Afarisai, nayo nĩyo ũhinga.

²No rĩrĩ, gũtirĩ ũndũ mũguĩkĩre ũtakaguũrio; o na kana ũndũ mũrinde ũtakamenyeka.

³Nĩ ũndũ ũcio ũhoro o wothe ũrĩa mwanaaria nduma-inĩ, nĩũkaiguwo o ũtheri-inĩ; na ũrĩa mwanaheehana o matũ-inĩ, mwĩ nyũmba thĩinĩ mũno, nĩũkamemerekerio nyũmba igũrũ.

⁴Na ngũmwĩra atĩrĩ, inyuĩ arata akwa, Tigagai gwĩtigĩra arĩa moragaga mwĩrĩ, na thutha wa ũguo matirĩ ũndũ mangĩhota gwĩka.

⁵No nĩngũmũtaara mũmenye ũrĩa mwagĩrĩirũo nĩ gwĩtigĩra; Wĩtigagĩrei o ũrĩa ũrĩ na hinya wa gũikia mũndũ Jehanumu-inĩ, aarĩkia kũmũũraga; ngũkĩmwĩra atĩrĩ na ma, Ta gĩĩtigagĩrei ũcio.

⁶Githĩ tũnyoni tũtano tũtiendagio tũthendi twĩrĩ? Na rĩrĩ, gũtirĩ o na kamwe gatuo kangĩriganĩra Ngai.

⁷No rĩrĩ, o na njuĩrĩ cianyu cia mũtwe nĩ ndare ciothe. Tigagai gwĩtigĩra: inyuĩ mwĩ bata gũkĩra tũnyoni tũingĩ.

⁸Na ngũmwĩra atĩrĩ, O mũndũ ũkoimbũra kũrĩ andũ atĩ nĩ wakwa, nĩwe Mũrũ wa Mũndũ o nake akoimbũra kũrĩ araika a Ngai atĩ nĩ wake:

⁹no rĩrĩ, mũndũ ũrĩa ũngaanaga kũrĩ andũ, nĩwe ũgakaanwo kũrĩ araika a Ngai.

¹⁰Na mũndũ o wothe ũkaaria kiugo gĩa gũcambia Mũrũ wa Mũndũ nĩakoherũo wĩhia ũcio: no ũrĩa ũkaruma Roho Mũtheru ndakoherũo kũrumana kũu.

¹¹Na rĩrĩa andũ makamũtwara kũrĩ ciama cia thunagogi, na kũrĩ aathani, na kũrĩ anene, mũtikanetangĩkĩre nĩ ũndũ wa mĩario ĩrĩa mũgacokanĩria nayo, kana ũhoro ũrĩa mũgacokia, o na kana ciugo iria mũkoiga:

¹²nĩ ũndũ Roho Mũtheru nĩakamũruta, o thaa ĩo, ũhoro ũrĩa mwagĩrĩirũo nĩ kuuga.

¹³Na mũndũ ũmwe wa kĩrĩndĩ kĩrĩa kĩarĩ ho akĩmwĩra atĩrĩ, Mũrutani, ĩra mũrũ wa maitũ tũgayane nake igai riitũ

¹⁴Nowe akĩmwĩra atĩrĩ, Mũndũ ũyũ, nũ ũnduĩte mũcirĩrĩri, kana mũgayania wa indo cianyu?

¹⁵Agĩkĩmera atĩrĩ, Wĩmenyagĩrĩrei nĩguo mũtikanagĩe na riitho rĩraya o na atĩa: nĩ ũndũ muoyo wa mũndũ nduonekaga nĩ ũndũ wa ũrĩa indo ciingĩhĩte iria arĩ nacio.

¹⁶Akĩmagerekanĩria ngerekano akiuga atĩrĩ, Mũgũnda wa mũndũ mũna warĩ gĩtonga nĩwaciarire mũno:

¹⁷nake akĩĩĩra na ngoro atĩrĩ, Ngũgĩĩka atĩa, nĩ ũndũ ndirĩ na handũ ha kũgethera magetha makwa?

¹⁸Agĩcoka akiuga atĩrĩ: Ngwĩka ũũ: nĩngũtharithia makũmbĩ makwa, njoke njakithie mangĩ manene kũrĩ mo; na nĩngaita irio ciakwa ciothe thĩinĩ wamo, o na indo ciakwa ciothe ndĩciige kuo.

¹⁹Na ndĩĩre na ngoro yakwa atĩrĩ, Ngoro ĩno, wĩ na indo nyingĩ njige cia kũigana mĩaka mĩingĩ; hurũka, ũrĩage, na ũnyuage, na ũcanjamũkage.

²⁰No rĩrĩ, Ngai akĩmwĩra atĩrĩ, Wee, kĩrimũ gĩkĩ, ũtukũ o ũyũ nĩũgwĩtio ngoro yaku; nacio indo icio wĩhaĩire-rĩ, igagĩtuĩka cia ũ?

²¹Na rĩrĩ, o ũguo noguo mũndũ atariĩ ũrĩa wĩigagĩra mũthithũ wa indo we mwene, na ndatongete na ũhoro wa Ngai.

²²Agĩcoka akĩĩra arutwo ake atĩrĩ, Nĩ ũndũ ũcio ngũmwĩra atĩrĩ, Tigagai gwĩtanga nĩ ũndũ wa muoyo wanyu, o kĩrĩa mũrĩrĩaga; o na kana nĩ ũndũ wa mĩĩrĩ yanyu, o kĩrĩa mũrĩĩhumbaga.

²³Nĩ gũkorũo muoyo nĩũkĩrĩte irio, naguo mwĩrĩ nĩũkĩrĩte nguo.

²⁴Taranagiai ũhoro wa mahuru, atĩ matihandaga irio, kana makagetha; na matirĩ na nyũmba cia kũiga indo, o na kana makũmbĩ; nake Ngai nĩamaheaga irio: kaĩ mũtakĩrĩ bata mũno gũkĩra nyoni!

²⁵Na rĩrĩ, nũ wanyu ũngĩhota kwĩongerera kĩũga gĩake mũkono ũmwe nĩ ũndũ wa gwĩtangĩkĩra?

²⁶Tondũ ũcio-rĩ, mũngĩkorũo nĩmũremagwo nĩ gwĩka o ũndũ ũrĩa mũnyinyi, nĩ kĩ gĩtũmaga mũtangĩkĩre maũndũ marĩa mangĩ?

²⁷Taranagiai ũhoro wa itoka, ũrĩa ikũraga: itiĩnogagia ikĩruta wĩra, kana ikogotha ndigi; no ngũmwĩra atĩrĩ, O na Solomoni, arĩ na mwago wake wothe, ndaagemete ta kĩmwe gĩacio.

²⁸Na angĩkorũo Ngai nĩagemagia nyeki ya gĩthaka ũguo, ĩrĩa ĩgũtinda ho ũmũthĩ, na rũciũ ĩgaikio icua-inĩ, githĩ ndangĩkĩria mũno kũmũhe nguo, inyuĩ mwĩtĩkĩtie o hanini?

²⁹Na inyuĩ-rĩ, tigagai gwĩcarĩria kĩrĩa mũrĩrĩaga, na kĩrĩa mũrĩnyuaga, na mũtigatuĩke andũ a mathangania.

³⁰Nĩ gũkorũo indo icio ciothe nĩcio andũ a ndũrĩrĩ cia gũkũ thĩ mecaragĩria: na rĩrĩ, Ithe wanyu nĩoĩ atĩ nĩmũbataragio nĩ indo icio.

³¹No rĩrĩ, caragiai ũthamaki wa Ngai, nacio indo icio nĩmũgakĩrĩrĩrio.

³²Inyuĩ a karũũru gaka kanini, tigagai gwĩtigĩra, nĩ gũkorũo Ithe wanyu nĩeyendeire kũmũhe ũthamaki ũcio.

³³Endiai indo iria mũrĩ nacio, mũcoke mũciheanage na tha; mwĩtumĩre tũmondo twa mbia tũrĩa tũtakũraga, nĩ getha mũkagĩa na ũtonga ũrĩa ũtathiraga o Igũrũ, kũrĩa gũtarĩ mũici ũthengagĩrĩra, o na kũrĩa memenyi itaninaga indo.

³⁴Nĩ gũkorũo o kũrĩa ũtonga wanyu ũrĩ, nĩkuo ngoro cianyu nacio ikoragwo irĩ.

³⁵Ikaragai mwĩhotorete, na mũrĩ na matawa manyu magĩakanaga;

³⁶na inyuĩ ene mũtuĩke ta andũ metereire mwathani wao, agĩcoka oimĩte iruga-inĩ rĩa kĩhikanio; nĩ getha, rĩrĩa agakinya aringaringe mũrango, mamũhingũrĩre o rĩmwe.

³⁷Gũkena-rĩ, nĩ ngombo iria igakorũo ciĩiguĩte rĩrĩa mwathani wacio agakinya: ngũmwĩra na ma atĩ nĩakehotora aciikarie metha-inĩ irĩe, nake oke acirehere irio.

³⁸Nake angĩkinya ta ũtukũ gatagatĩ kana ta thaa kenda, acikore ciĩiguĩte ũguo, gũkena-rĩ, nĩ ngombo icio.

³⁹No rĩrĩ, menyai ũũ, atĩ korũo mwene nyũmba nĩaamenyaga thaa ĩrĩa mũici egũũka, nĩangĩakorirũo eiguĩte, na ndareke nyũmba yake yenjwo.

⁴⁰O na inyuĩ ikaragai mwĩhaarĩirie: nĩ gũkorũo Mũrũ wa Mũndũ nĩagoka o thaa ĩrĩa mũtegereirie.

⁴¹Nake Petero akĩmũũria atĩrĩ, Mwathani, nĩ ithuĩ wera ngerekano ĩo, kana nĩ andũ othe?

⁴²Nake Mwathani akĩmũũria atĩrĩ, Rĩu-rĩ, mũrori indo ũrĩa ũngĩĩhokeka na mũũgĩ-rĩ, o ũrĩa ũgatuwo nĩ mwathani wake wa kũramataga nyũmba yake yothe, na aheage andũ irio ciao o hĩndĩ yakinya, nĩ ũrĩkũ?

⁴³Gũkena-rĩ, nĩ ngombo ĩo, ĩngĩkorũo ĩgĩĩka ũguo mwathani wayo aakinya.

⁴⁴Ti-itherũ ngũmwĩra atĩrĩ, atĩ nĩakamĩtua ya kũramataga indo ciake ciothe.

⁴⁵Ĩndĩ ngombo ĩo ĩngĩkorũo ĩĩĩrĩte na ngoro atĩrĩ, Mwathani wakwa ndehiũha gũũka; na ĩitĩke kũhũra ndungata iria cia arũme na cia andũ-a-nja, na kũrĩa na kũnyua, na kũrĩwo-rĩ,

⁴⁶mwathani wa ngombo ĩo nĩagakinya mũthenya ũrĩa ĩtegereirie, o na thaa ĩrĩa ĩtoĩ, na amĩhũre mũno, na amĩtuĩre cira o ta ũrĩa gũtuagĩrũo arĩa matehokekete.

⁴⁷Nayo ngombo ĩrĩa yamenyete ũrĩa mwathani wayo endaga, na ndĩigana kwĩhaarĩria, kana gwĩka ũrĩa endaga-rĩ, nĩĩkahũrũo mĩtunda mĩingĩ.

⁴⁸No ĩrĩa ĩtaamenyete-rĩ, na ĩgĩĩka maũndũ ma gũtũma ĩhũrũo, ĩo nĩĩkahũrũo mĩtunda ĩtarĩ mĩingĩ. Na rĩrĩ, mũndũ ũrĩa ũheetwo indo nyingĩ, nĩwe ũgetio nyingĩ; na ũrĩa ũhithĩtio indo nyingĩ nĩ andũ, nĩwe ũgacoka gwĩtio nyingĩ makĩria.

⁴⁹Njũkĩte gũikia mwaki thĩ; na rĩrĩ, ngũcoka kwenda kĩ, ũngĩkorũo nĩũrĩkĩtie gwakio?

⁵⁰No rĩrĩ, ndĩ na ũbatithio ndĩĩbatithio naguo; na kũhinyĩrĩrio ndĩĩhinyagĩrĩrio atĩa ũgĩgakinya!

⁵¹Anga mũkwĩgereria atĩ njũkĩte kũrehe thayũ gũkũ thĩ? Ngũmwĩra atĩrĩ, Tiguo, no makĩria nĩ nduĩkano:

⁵²tondũ kuuma rĩu, nĩkũrĩkoragwo andũ atano a nyũmba ĩmwe matuĩkanĩte: atatũ magakararia erĩ, nao erĩ makararie atatũ.

⁵³Nao magakorũo matuĩkanĩte ũũ: mũthuri na mũriũ, o na mũriũ na ithe; ningĩ mũtumia na mwarĩ, o na mũirĩtu na nyina; na ningĩ nyaciara na mũtumia wa mũriũ, ningĩ mũtumia wa mũriũ na nyaciarawe.

⁵⁴Nake akĩĩra andũ a kĩrĩndĩ nao atĩrĩ, Rĩrĩa muonaga itu rĩkĩambata, riumĩte na kũrĩa ithũĩro, hĩndĩ ĩo muugaga atĩrĩ, Nĩgũkũgĩa mbura; na gũgatuĩka ũguo.

⁵⁵Na rĩrĩa muonaga rũhuho rũkĩhurutana ruumĩte o kũrĩa gũthini, muugaga atĩrĩ, Nĩgũkũgĩa ũrugarĩ mũnene; na gũgatuĩka ũguo.

⁵⁶Inyuĩ hinga ici! Nĩmũũĩ gũkũũrana ũrĩa kũrĩhaana gũkũ thĩ, o na matu-inĩ; no rĩrĩ, nĩ kĩ gĩtũmaga mwage gũkũũrana ũhoro wa ihinda rĩrĩ?

⁵⁷Na mwagaga inyuĩ ene gwĩtuĩra ũhoro ũrĩa wagĩrĩire nĩ ũndũ kĩ?

⁵⁸Nĩ ũndũ ũcio-rĩ, hĩndĩ ĩrĩa mũgũthiĩ na mũgwĩtia kũrĩ mũnene, mũkĩrĩ njĩra nake, geria mũno kũiguana nake; ndakae gũgũtwara kũrĩ mũtuanĩri cira, nake akũneane kwĩ mwĩtanĩria; nake mwĩtanĩria agũikie korokoro-inĩ.

⁵⁹Ngũkwĩra atĩrĩ, Ndũrĩ hingo ũkoima ho, ũtarĩhĩte thirĩ wothe, ũkaũnina biũ.