Luke 14

¹NA gũgĩkinya atĩrĩ, aatonya nyũmba ya mũnene ũmwe wa Afarisai mũthenya wa thabatũ, arĩe irio, andũ a kũu magĩikara mamũcũthĩrĩirie.

²Na rĩrĩ, o hau aarĩ, nĩkwarĩ mũndũ warĩ na ihu rĩa mũthuthuma.

³Nake Jesu agĩcokia akĩũria arutani a watho na Afarisai atĩrĩ, Watho nĩwĩtĩkĩrĩtie kũhonanio mũthenya wa thabatũ, kana aca?

⁴Nao magĩkira. Nake akĩnyita mũndũ ũcio akĩmũhonia, akĩmũrekia athiĩ.

⁵Agĩcoka akĩmoria atĩrĩ, Nũ wanyu wĩ na ndigiri kana ndegwa ĩrĩa ĩgũĩte irima-irĩ rĩa maĩ ũtangĩmĩruta o rĩmwe mũthenya wa thabatũ?

⁶Nao makĩremwo nĩ kũmũcokeria mohoro macio.

⁷Nake akĩĩra arĩa metĩtwo ngerekano, ona ũrĩa maathuraga itĩ cia mbere maikarĩre cio; agĩkĩmera atĩrĩ,

⁸Rĩrĩa ũgwĩtwo nĩ mũndũ ũthiĩ iruga-inĩ rĩa kĩhikanio, ndũgaikarĩre gĩtĩ kĩrĩa kĩa mbere; gũtigatuĩke hihi atĩ nĩharĩ mũndũ ũngĩ mũtĩe kũrĩ we, wĩtĩtwo nĩ mwene iruga,

⁹nake ũcio ũmwĩtĩte inyuerĩ oka, akwĩre atĩrĩ, Ta eheherera mũndũ ũyũ; na hĩndĩ ĩo ũcoke gũikara o gatũng’a ka arĩa angĩ othe, ũconokete.

¹⁰No rĩrĩa wĩtĩtwo-rĩ, thiĩ ũikare o gatũng’a ka arĩa angĩ; nĩ getha ũrĩa ũgwĩtĩte oka, akwĩre atĩrĩ, Wathiomo, ta hĩtũka na harĩa mbere: na hĩndĩ ĩo ũgĩe na gĩtĩo mbere ya arĩa othe mũikarainie nao.

¹¹Nĩ gũkorũo o mũndũ ũrĩa wĩtũũgagĩria nĩakanyihio; nake ũrĩa wĩnyihagia-rĩ, nĩwe ũgatũũgĩrio.

¹²Agĩcoka akĩĩra mũndũ ũrĩa wamwĩtĩte atĩrĩ, Waruga iruga rĩa mũthenya, kana rĩa hwaĩ-inĩ-rĩ, tigaga gwĩta o arata aku, kana ariũ a nyũkwa, kana andũ anyu, o na kana itonga cia kwanyu; gũtigatuĩke atĩ andũ acio nao nĩmagacoka gũgwĩta o nawe maruga-inĩ mao, nawe ũthukĩrũo.

¹³No rĩrĩ, waruga iruga-rĩ, ĩtaga ngĩa, na cionje, na ithua, na atumumu:

¹⁴nawe nĩũkarathimwo; nĩ gũkorũo matirĩ na kĩndũ gĩa gũgũthukĩra nakĩo: amu nĩũgathukĩrũo hĩndĩ ĩrĩa andũ arĩa athingu makariũkio.

¹⁵Na rĩrĩa mũndũ ũmwe wa arĩa maaikarainie nake irio-inĩ aaiguire maũndũ macio, akĩmwĩra atĩrĩ, Gũkena-rĩ, nĩ mũndũ ũrĩa ũkarĩa irio ũthamaki-inĩ wa Ngai.

¹⁶Nowe Jesu akĩmwĩra atĩrĩ, Mũndũ ũmwe nĩaarugire iruga rĩnene rĩa hwaĩ-inĩ, agĩĩta andũ aingĩ.

¹⁷Nacio irio ciahĩa, agĩtũma ngombo yake ĩthiĩ ĩkere arĩa metĩtwo atĩrĩ, Ũkai; nĩ ũndũ irio nĩ hĩu.

¹⁸Nao othe, o ta maarĩkanĩire, makĩrika kwĩgwatia. Ũrĩa wa mbere akiuga atĩrĩ, Nĩngũrĩte gĩthaka, na no mũhaka ’thiĩ ngakĩrore; nĩndagũthaitha ndekera.

¹⁹Na ũngĩ akiuga atĩrĩ, Nĩngũrĩte ndegwa ikũmi, na nĩngũthiĩ gũcigeria: nĩndagũthaitha ndekera.

²⁰Na ũngĩ akiuga atĩrĩ, Nĩ’hikanĩtie, na nĩ ũndũ ũcio ndihota gũũka.

²¹Nayo ngombo ĩo ĩgĩcoka ĩkĩmenyithia mwathani wayo maũndũ macio. Hĩndĩ ĩo mwene nyũmba akĩrakara, akĩĩra ngombo yake atĩrĩ, Ta uma narua ũthiĩ njĩra-inĩ cia itũũra, iria njariĩ o na iria njeke, ũkarehe ngĩa, na cionje, na atumumu, o na ithua, mũũke nao gũkũ.

²²Nayo ngombo ĩo ĩgĩcoka ĩkiuga atĩrĩ, Mwathani, ũrĩa uugire nĩwĩkirũo, na no hatigaire handũ.

²³Nake mwathani akĩĩra ngombo atĩrĩ, Uma ũthiĩ ing’aratua-inĩ na ndere-inĩ cia mĩgũnda, ũringĩrĩrie andũ matonye haha, nĩ getha nyũmba yakwa ĩiyũrũo.

²⁴Nĩ gũkorũo ngũmwĩra atĩrĩ, atĩ acio metĩtwo mbere, gũtirĩ mũndũ wao ũngĩcama iruga rĩakwa.

²⁵Hĩndĩ ĩo andũ magĩtwarana nake kĩrĩndĩ kĩingĩ ma: nake akĩĩhũgũra akĩmera atĩrĩ,

²⁶Mũndũ angĩũka harĩ niĩ, na ndathũũre ithe na nyina, na mũtumia na ciana, na ariũ a nyina na aarĩ a nyina, o naguo muoyo wake mwene-rĩ, ndangĩhota gũtuĩka mũrutwo wakwa.

²⁷Mũndũ o wothe ũtegwĩkuuĩra mũtĩ wake wa kwambĩrũo anũmĩrĩre, ndangĩhota gũtuĩka mũrutwo wakwa.

²⁸Nĩ ũndũ-rĩ, nĩ mũndũ ũrĩkũ wanyu, akĩenda gwaka nyũmba ndaya na igũrũ, ũtangĩamba gũikara thĩ, agatare mbia iria cia kũmĩakithia, amenye kana arĩ na cia kũigana cia kũmĩrĩkia?

²⁹Ekaga ũguo, gũtikae gũtuĩka atĩ, aarĩkia gwaka gĩtina kĩayo na aremwo nĩ kũmĩrĩkia, andũ arĩa othe marĩmĩonaga maitĩke kũmũthekerera,

³⁰makiugaga atĩrĩ, Kaĩ mũndũ ũyũ nĩaambĩrĩirie gwaka nyũmba, akĩremwo nĩ kũmĩrĩkia-ĩ!

³¹Kana nĩ mũthamaki ũrĩkũ, hĩndĩ ĩrĩa angĩthiĩ kũrũa ita na mũthamaki ũngĩ, ũtangĩamba gũikara thĩ macokanie ndundu na andũ ake, amenye kana aahota kũrũa na mũthamaki ũrĩa ũgũũka e na andũ a ita ngiri mĩrongo ĩĩrĩ, nake we mwene akĩrĩ o na ngiri ikũmi?

³²Nake angĩona atĩ ndangĩhota ũguo, hĩndĩ ĩo, ũcio ũngĩ arĩ o kũraya, amũrekerie arekio, makamũũrie ũrĩa angĩhakwo kũgĩe na thayũ.

³³Hakĩrĩ ũguo-rĩ, mũndũ o wothe wanyu ũtangĩrekia indo ciothe iria arĩ nacio, ndangĩhota gũtuĩka mũrutwo wakwa.

³⁴Na rĩrĩ, cumbĩ nĩ mwega: ĩndĩ kũngĩkorũo o na cumbĩ nĩũthirĩte mũcamo waguo, wacoka gũcamithio ta cumbĩ na kĩ?

³⁵Ndũrĩ bata, o na gwĩkĩrũo mũgũnda kana kĩara-inĩ, no gũteo ũteagwo nĩ andũ. Ũrĩa wĩ na matũ ma kũigua nĩakĩigue.