Luke 2

¹NA matukũ macio gũgĩĩkwo atĩrĩ, gũgĩathanwo nĩ Kaisari Augusuto atĩ andũ a mabũrũri mothe makeandĩkithie.

²Nakuo nĩkuo kwandĩkwo kũrĩa kwa mbere kwandĩkirũo rĩrĩa Kuirinio aathanaga Suriata.

³Nao andũ othe magĩthiĩ kwĩandĩkithia, o mũndũ itũũra rĩake kĩũmbe.

⁴Nake Jusufu akiuma Galili, o itũũra rĩa Nazarethi, agĩthiĩ Judea, o itũũra rĩrĩa rĩa Daudi rĩĩtagwo Bethi-lehemu, nĩ ũndũ we aarĩ wa nyũmba o na wa mbarĩ ya Daudi;

⁵nake aathiire kũu nĩ getha makeandĩkithie hamwe na Mariamu mũirĩtu ũrĩa orĩtie, nake aarĩ mũritũ.

⁶Na gũgĩkinya atĩrĩ, hĩndĩ ĩrĩa maaikarĩte kũu, mũthenya wake wa gũciara ũgĩkinya.

⁷Nake akĩrigithatha kahĩĩ, agĩkarigicĩria tama wa ciana, agĩgakomia mũharatĩ ũrĩa warĩagĩrũo nĩ ũhiũ, tondũ nĩmaagĩte ha kũraara nyũmba ya ageni thĩinĩ.

⁸Nakuo kũu bũrũri ũcio nĩkwarĩ arĩithi maaikarĩte werũ-inĩ, magaikaragia ũhiũ wao ũtukũ.

⁹Nao makiumĩrĩrũo nĩ mũraika wa Mwathani, o na riri wa Mwathani ũgĩkenga igũrũ rĩao mĩena-inĩ yothe; magĩgĩĩtigĩra mũno.

¹⁰Nake mũraika ũcio akĩmera atĩrĩ, Tigai gwĩtigĩra; tondũ rĩrĩ, nĩndamũrehere ũhoro mwega wa gĩkeno kĩnene ũrĩa ũgatuĩka wa andũ othe:

¹¹nĩ gũkorũo ũmũthĩ nĩmũciarĩirũo Mũhonokia o itũũra-inĩ rĩa Daudi, nake nĩwe Kristo ũrĩa Mwathani.

¹²Na rĩrĩ, kĩrĩa kĩrĩmũmenyithia ũndũ ũcio nĩ gĩkĩ; nĩmũrĩona gakenge karigicĩirio tama wa ciana, na gakometio mũharatĩ-inĩ.

¹³Na o kahinda kau-rĩ, hamwe na mũraika ũcio hakĩonwo haagĩa o rĩmwe araika aingĩ a Igũrũ gĩtutu kĩnene, makĩgooca Ngai makiugaga atĩrĩ,

¹⁴Ngai arokumagio Igũrũ o Igũrũ, Naguo thayũ ũrogĩa gũkũ thĩ kũrĩ andũ arĩa akenagĩra.

¹⁵Na gũgĩkinya atĩrĩ, rĩrĩa araika maatiganire nao macoke Igũrũ, arĩithi acio makĩĩrana atĩrĩ, Thiĩi tũthiĩ o rĩu tũkinye o Bethi-lehemu, tũkone ũhoro ũyũ ũkinyĩte, ũcio Mwathani atũmenyithĩtie.

¹⁶Nao magĩthiĩ mahiũhĩte, magĩkora Mariamu na Jusufu, o erĩ, o na gakenge kau gakometio mũharatĩ-inĩ.

¹⁷Na maakona, makĩheana ũhoro wa ciugo iria maarĩirio ũndũ wa kaana kau.

¹⁸Nao andũ othe arĩa maaũiguire makĩgega nĩ ũndũ wa maũndũ marĩa maarĩirio nĩ arĩithi acio.

¹⁹Nowe Mariamu agĩikara na maũndũ macio mothe, akamacũranagia na ngoro yake.

²⁰Nao arĩithi acio makĩhũndũka, makĩgoocaga Ngai na makĩmũkumagia nĩ ũndũ wa maũndũ marĩa mothe maaiguire na marĩa monire, o ta ũrĩa merĩtwo.

²¹Na matukũ manana maahinga ma kũruithia kaana kau, gagĩtuwo JESU, o rĩĩtwa rĩrĩa gaatuirũo nĩ mũraika o mbere, gatarĩ karagĩwo ihu.

²²Na matukũ mao ma gũtherio thutha wa gũciara maahinga, o ta ũrĩa gwaathanirũo nĩ Musa-rĩ, makĩambata Jerusalemu magakanengere Mwathani,

²³(O ta ũrĩa kwandĩkĩtwo Maandĩko-inĩ ma irĩra cia Mwathani atĩrĩ, O kahĩĩ karĩa gakarigithathwo gagatuwo kaana gatheru ka Mwathani)

²⁴na ningĩ marute ihaki o ta ũrĩa gũtuĩtwo Maandĩko-inĩ ma irĩra cia Mwathani atĩrĩ, Nĩ ndirahũgĩ igĩrĩ, kana tũtutura twĩrĩ.

²⁵Na rĩrĩ, nĩkwarĩ mũndũ watũire Jerusalemu wetagwo Simeoni; nake aarĩ mũthingu na mũigua-Ngai, na nĩaatanyĩte hĩndĩ ĩrĩa Aisiraeli makanyamarũrũo: na Roho Mũtheru aarĩ hamwe nake.

²⁶Na mũndũ ũcio nĩaaguũrĩirio nĩ Roho Mũtheru atĩ ndagakua atonete Kristo ũrĩa wa Mwathani.

²⁷Nake agĩtonya hekarũ ya Ngai arĩ na Roho Mũtheru: na rĩrĩa aciari a kaana kau, Jesu, maagatwarire hekarũ ya Ngai thĩinĩ, nĩ getha magageke kũringana na mũtugo wa watho-rĩ,

²⁸hĩndĩ ĩo Simeoni agĩkaiyũkia moko-inĩ make, akĩgatha Ngai akiuga atĩrĩ,

²⁹Rĩu Mwathani nĩ hĩndĩ ũkũnjugĩra ũhoro, niĩ ngombo yaku, ’thiĩ na thayũ o ta ũrĩa wanjĩrire;

³⁰Nĩ gũkorũo maitho makwa nĩmonete ũhonokio waku,

³¹Ũrĩa wathondekire mbere ya irĩndĩ ciothe;

³²Nĩguo ũtheri wa kũguũrĩrio andũ a Ndũrĩrĩ, O na riri wa andũ aku Aisiraeli.

³³Nao ithe na nyina nĩmaagegaga nĩ ũndũ wa maũndũ marĩa maaririo nĩ ũndũ wako;

³⁴nake Simeoni akĩmarathima, akĩĩra Mariamu, nyina, Atĩrĩrĩ, kaana gaka nĩgatuĩtwo ga kũgũithia o na gũũkĩria andũ aingĩ a Isiraeli; ningĩ gatuĩke kĩmenyithia kĩrĩa kĩrĩtendagwo;

³⁵o na rĩrĩ, rũhiũ rũa mbaara nĩrũgagũtũrĩkia ngoro wee mwene, nĩguo meciria ma ngoro nyingĩ maguũke.

³⁶Na nĩkwarĩ mũtumia mũnabii wetagwo Anna, mwarĩ wa Fanueli wa mũhĩrĩga wa Asheri, (nake aarĩ mũkũrũ mũno; aaikarire na mũthuriwe mĩaka mũgwanja kuuma aahika,

³⁷na nĩaatũire arĩ wa ndigwa mĩaka ĩngĩ mĩrongo ĩnana na ĩna); mũtumia ũcio rĩ, ndoimaga hekarũ, no aatũire aturagĩria Ngai ndu akamũhoyaga ũtukũ na mũthenya akĩĩhingaga kũrĩa irio, na akĩmũthaithaga.

³⁸Nake agĩkinya o ro hĩndĩ ĩo, akĩgatha Ngai, akĩheana ũhoro wa kaana kau kũrĩ arĩa othe maatũire matanyaga hĩndĩ ĩrĩa Jerusalemu gũgakũũrũo.

³⁹Nao maahingia maũndũ marĩa mothe maathanĩtwo irĩra-inĩ cia Mwathani, magĩcoka Galili, makĩinũka itũũra rĩao rĩa Nazarethi.

⁴⁰Nako kaana kau gagĩkũra, gakĩgĩa na hinya, gakĩiyũrũo nĩ ũũgĩ; naguo Wega wa Ngai watũire nako.

⁴¹Nao aciari ake nĩmaathiaga Jerusalemu, o mwaka, hĩndĩ ya gĩathĩ kĩa Bathaka.

⁴²Na rĩrĩa Jesu aahingirie mĩaka ikũmi na ĩĩrĩ, makĩambata nake gĩathĩ-inĩ kĩu kũringana na mũtugo.

⁴³Nao maanina matukũ ma gĩathĩ, rĩrĩa maainũkaga kwao, kamwana kau, Jesu, gagĩikara kũu Jerusalemu; nao aciari ake matimenye ũguo.

⁴⁴Nao magĩthiĩ rũgendo rũa mũthenya mũgima, makĩĩgeragĩria atĩ e gĩkundi-inĩ kĩa andũ a kwao; thutha wa ũguo makĩmũcaria kũrĩ andũ a mũhĩrĩga wao o na arĩa maamenyanĩte nao:

⁴⁵nao maamwaga-rĩ, makĩhũndũka Jerusalemu, makĩmũcaragia.

⁴⁶Na gũgĩkinya atĩrĩ, matukũ matatũ maathira, makĩmũkora hekarũ ya Ngai thĩinĩ aikarĩte thĩ kũrĩ arutani, agĩthikagĩrĩria ũrĩa moigaga, o na akĩmoragia maũndũ:

⁴⁷na andũ arĩa othe maamũiguaga makĩgega nĩ ũndũ wa ũũgĩ wake, o na ũrĩa aacokagia ũhoro orio maũndũ.

⁴⁸Nao aciari ake maamuona makĩgega mũno; nake nyina akĩmwĩra atĩrĩ, Mũrũ wakwa, ũtwĩkĩte ũũ nĩkĩ? Rĩu rĩ, ithuĩ na thoguo tũgũcarĩtie twĩ na kĩeha ma.

⁴⁹Nake akĩmoria atĩrĩ, Nĩ kĩ gĩtũmĩte mũnjarie? Kaĩ mũtoĩ atĩ ndirĩ hingo itarĩkoragwo ndĩ nyũmba ya Baba?

⁵⁰Nao matiamenyire gĩtũmi gĩa ciugo icio aamerire.

⁵¹Nake agĩtherera nao, magĩkinya Nazarethi; na nĩaathĩkaga nĩo: nake nyina nĩaaigaga mohoro macio mothe ngoro-inĩ yake.

⁵²Nake Jesu agĩkũra, akĩũhĩgaga na akĩnenehaga, akĩendagwo nĩ Ngai o na andũ.