Luke 20

¹NA mũthenya ũmwe gũgĩkinya atĩrĩ, atĩ rĩrĩa aarutaga andũ ũhoro hekarũ-inĩ, akahunjia Ũhoro-ũrĩa-Mwega, athĩnjĩri-Ngai arĩa anene na aandĩki-marũa, marĩ hamwe na athuri, magĩũka harĩ we,

²makĩmwarĩria makĩmwĩra atĩrĩ, Twĩre: wĩkaga maũndũ maya na wathani ũrĩkũ? Kana ũrĩa wakũheire wathani ũcio nũ?

³Nake akĩmacokeria akĩmera atĩrĩ, Na niĩ nĩngũmũũria kiugo kĩmwe, na mũnjokerie:

⁴Atĩrĩrĩ, ũbatithania wa Johana woimire Igũrũ, kana woimire kũrĩ andũ?

⁵Nao magĩĩciria, makĩĩrana atĩrĩ, Tũngĩkiuga, Woimire Igũrũ, nĩegũtũũria, Nĩ kĩ kĩagiririe mwĩtĩkie ũhoro wake?

⁶Na tũngiuga, Woimire kũrĩ andũ-rĩ, andũ othe nĩmegũtũhũra na mahiga: nĩ gũkorũo nĩmetĩkĩtie atĩ Johana aarĩ mũnabii.

⁷Nao magĩcokia atĩ matioĩ kũrĩa woimĩte.

⁸Nake Jesu akĩmera atĩrĩ, O na niĩ-rĩ, ndimwĩra wathani ũrĩa njĩkaga maũndũ maya naguo.

⁹Nake agĩitĩka kwĩra andũ ngerekano ĩno, atĩrĩ: Mũndũ ũmwe nĩaahandire mũgũnda wa mĩthabibu, akĩũkomborithia arĩmi, agĩthiĩ bũrũri ũngĩ, agĩikara kũu ihinda iraya.

¹⁰Na rĩrĩ, kĩmera gĩakinya, akĩrekeria arĩmi acio ngombo, makamĩnengere maciaro mamwe ma mũgũnda ũcio: no arĩmi makĩmĩhũra, makĩmĩhũndũra ĩtarĩ na kĩndũ.

¹¹Agĩcoka akĩrekia ngombo ĩngĩ: o nayo makĩmĩhũra, makĩmĩconora, makĩmĩhũndũra ĩtarĩ na kĩndũ.

¹²Agĩcoka akĩrekia ĩngĩ ya gatatũ: o nayo makĩmĩtihia, makĩmwagararia rũgiri rũa mũgũnda.

¹³Nake mwathani wa mũgũnda ũcio wa mĩthabibu akiuga atĩrĩ, Ngũgĩĩka atĩa? Nĩngũrekia mũrũ wakwa ũrĩa nyendete mũno: hihi we nĩmakamũconokera.

¹⁴No rĩrĩ, arĩmi acio maamuona, makĩĩrana atĩrĩ, Ũyũ nĩwe ũkegaĩrũo mũgũnda. Nĩtũmũũragei, nĩ getha igai rĩake rĩtuĩke riitũ.

¹⁵Magĩkĩmwagararia rũgiri rũa mũgũnda, makĩmũũraga. Nĩ ũndũ ũcio-rĩ, mwathani wa mũgũnda akameka atĩa?

¹⁶Nĩagoka anine arĩmi acio, acoke ahe andũ angĩ mũgũnda ũcio. Nao maaigua ũguo, makiuga atĩrĩ, Kũroaga gwĩkwo ũguo!

¹⁷Nowe akĩmarora, akiuga atĩrĩ, Akorũo ti ũguo, kaĩ ũhoro ũyũ wandĩkĩtwo ũkĩrĩ wa kĩ, atĩ Ihiga rĩrĩa rĩaregirũo nĩ aaki Nĩrĩo rĩtuĩkĩte o rĩrĩa inene rĩa koine?

¹⁸O mũndũ ũrĩa ũkagũĩra ihiga rĩu, nĩagathuthĩka; no ũrĩa ũkagũĩrũo nĩrĩo, rĩkamũharagania o ta rũkũngũ.

¹⁹Nao aandĩki-marũa na athĩnjĩri-Ngai arĩa anene magĩcaria ũrĩa mangĩmũnyitithia o ro thaa ĩo; na magĩĩtigĩra kĩrĩndĩ: nĩ ũndũ nĩmaamenyire atĩ nĩaagerekanirie ngerekano ĩo nĩ ũndũ wao.

²⁰Magĩkĩmũcũthĩrĩria, makĩrekia athigani; nao magĩthiĩ metuĩte ta andũ ega, nĩ getha mamũnyite ũhoro-inĩ ũrĩa aaragia, nĩguo mamũneane kũrĩ andũ arĩa maarĩ na hinya o na wathani ũrĩa wa barũthi.

²¹Nao athigani acio makiuga atĩrĩ, Mũrutani, nĩtũũĩ atĩ nĩwaragia na ũkarutana ũtekũhĩtia, na ndwĩtĩkagĩra mũndũ nĩ ũndũ wa ũrĩa ahaana, no nĩũrutanaga ũhoro wa njĩra ya Ngai na ma:

²²atĩrĩ, Nĩ wega tũrutagĩre Kaisari mbia cia igoti, kana ti wega?

²³Nowe akĩmenya ũhinga wao, akĩmera atĩrĩ,

²⁴Nyoniai ciringi. Rĩu-rĩ, ĩno ĩĩ na mũhianano wa ũ, o na rĩĩtwa rĩa ũ? Nao makĩmwĩra atĩrĩ, Nĩ cia Kaisari.

²⁵Akĩmera atĩrĩ, Akorũo nĩ ũguo, nengagĩrai Kaisari indo cia Kaisari, nake Ngai mũmũnengagĩre indo cia Ngai.

²⁶Nao makĩaga kuona ũndũ ciugo-inĩ icio ũrĩa mangĩhota kũmũthitaka naguo mbere ya kĩrĩndĩ: na makĩgega nĩ ũndũ wa ũrĩa aacokirie ũhoro, magĩgĩĩkirĩra.

²⁷Na rĩrĩ, gũgĩũka kũrĩ we Asadukai amwe, nĩo arĩa moigaga atĩ andũ arĩa akuũ matikariũka; nao makĩmũũria

²⁸makiuga atĩrĩ, Mũrutani, Musa nĩaatwandĩkĩire ũhoro atĩ mũrũ wa nyina na mũndũ angĩkua arĩ na mũtumia na ndatige mwana, mũrũ wa nyina nĩathambie mũtumia ũcio, acokerie mũrũ wa nyina mbeũ.

²⁹Na rĩrĩ, kwarĩ andũ a nyina ũmwe mũgwanja: na ũrĩa mũkũrũ wao akĩhikania, agĩcoka agĩkua atarĩ na mwana.

³⁰Nake ũrĩa wa kerĩ agĩthambia mũtumia ũcio, [agĩkua atarĩ na mwana];

³¹o na ũrĩa wa gatatũ nake akĩmũthambia; nao acio othe mũgwanja o ũndũ ũmwe, na magĩkua matarĩ na mwana.

³²Thutha wa ũguo mũtumia ũcio o nake agĩkua.

³³Nĩ ũndũ ũcio, rĩrĩa arĩa akuũ makariũka-rĩ, mũtumia ũcio agagĩtuĩka wa ũ, andũ acio? Nĩ gũkorũo aarĩ mũtumia wao othe mũgwanja.

³⁴Nake Jesu akĩmacokeria akĩmera atĩrĩ, Andũ a mahinda maya nĩmahikanagia na makahikio:

³⁵no rĩrĩ, arĩa magatuwo aagĩrĩru a gũkinya mahinda marĩa magoka, o na gũkinya hĩndĩ ĩrĩa arĩa akuũ makariũka, acio-rĩ, matikahikanagia kana mahikio:

³⁶nĩ gũkorũo matikahota gũcoka gũkua o na rĩ: nĩ ũndũ nĩmagakorũo maiganaine na araika; na marĩ ciana cia Ngai, makĩrĩ ciana cia ũhoro ũcio wa kũriũka.

³⁷Naguo ũhoro wa arĩa akuũ atĩ nĩmariũkagio-rĩ, Musa o nake nĩaawonanirie, harĩa harĩ ũhoro wa Kĩhinga, rĩrĩa aatuire Mwathani ũũ: Ngai wa Iburahimu, na Ngai wa Isaaka, o na Ngai wa Jakubu.

³⁸Rĩu-rĩ, we, ti Ngai wa arĩa akuũ, no wa arĩa marĩ muoyo: nĩ gũkorũo arĩa othe marĩ muoyo matũũragio nĩwe.

³⁹Nao andũ amwe aa aandĩki-marũa makĩmũcokeria, makĩmwĩra atĩrĩ, Mũrutani, nĩwoiga wega:

⁴⁰nĩ ũndũ matiigana gweta gũcoka kũmũũria ũndũ ũngĩ o na ũrĩkũ.

⁴¹Nake akĩmoria atĩrĩ, Andũ moigaga atĩ Kristo nĩ mũrũ wa Daudi nĩ ũndũ kĩ?

⁴²Nĩ gũkorũo Daudi we mwene oigire ibuku-inĩ rĩa Thaburi ũũ: Mwathani nĩerire Mwathani wakwa atĩrĩ, Ikara thĩ guoko-inĩ gwakwa kwa ũrĩo,

⁴³Mũira wa ngatũma thũ ciaku ituĩke gaturũa ka makinya maku.

⁴⁴O ũguo-rĩ, Daudi nĩakĩmũtuaga Mwathani; angĩkĩhota atĩa gũtuĩka mũriũ?

⁴⁵Nake akĩĩra arutwo ake ũhoro ũyũ, andũ othe makĩiguaga, atĩrĩ,

⁴⁶Wĩmenyagĩrĩrei aandĩki-marũa, arĩa mendaga gũceera mehumbĩte nguo ndaya, na makenda kũgeithagio ing’ang’a-inĩ, na gũikaragĩra itĩ cia mbere thunagogi-inĩ, o nacio iria cia gũtĩo maruga-inĩ;

⁴⁷na no-o manyamaragia nyũmba cia atumia a ndigwa, o makĩhoyaga mahoya maraya nĩ ũndũ wa ũhinga: acio nĩo magatuĩrũo ituĩro rĩũru makĩria.