Proverbs 2

¹MŨRŨ wakwa, akorũo nĩũgwĩtĩkĩra ciugo ciakwa, namo maathani makwa ũmaige mũthithũ harĩ wee,

²Ũgĩtuĩke atĩ ũũgĩ-ũrĩa-wa-ma nĩguo ũrĩtegagĩra matũ, na werekagĩrie ngoro yaku njĩra ya kwĩgĩĩra na ũtaũku-rĩ;

³Akorũo nĩũgũtuĩka wa kwanĩria ũũgĩ wa kũhota gũkũũrana maũndũ, ũgakĩoyagĩrĩra mũgambo atĩ ũheo ũtaũku;

⁴Akorũo ningĩ nĩũgũtuĩka wa kũũcaragĩrĩria o ta ũrĩa betha ĩcaragio, na ũũtuĩragie na kĩyo ta ũrĩa gũtuĩragio managĩ marĩa mahitharu;

⁵Weka ũguo-rĩ, nĩrĩo ũrĩtaũkagĩrũo nĩ ũrĩa gwĩtigĩra Jehova gũtariĩ, ũgĩkinyĩrĩre kũmenya Ngai.

⁶Amu ũũgĩ-ũrĩa-wa-ma nĩ Jehova ũheanaga, kanua gake noko kene ũmenyi, gwata ũtaũku:

⁷Andũ arĩa arũngĩrĩru nĩamaigĩire mũthithũ wa ũũgĩ mũkinyanĩru; andũ acio me na mĩthiĩre mĩgima-rĩ, atũũraga arĩ ngo yao,

⁸Nĩ getha agitagĩre ikĩro iria cia kĩhooto, andũ arĩa maiguaine nake-rĩ, amenyagĩrĩre njĩra yao.

⁹Ningĩ weka ũguo nĩrĩo ũrĩtaũkagĩrũo nĩ ũhoro ũrĩa wa ũthingu na wa kĩhooto, na ũhotage gũkũũrana maũndũ marĩa marũngĩrĩru, ĩĩ-ni, ũkĩmenye njĩra o yothe njega.

¹⁰Nĩ gũkorũo ũũgĩ no ũgũtonye o ngoro-inĩ thĩinĩ, naguo ũmenyi ũiguithagie roho waku wega;

¹¹Ũgerereri-rĩ, nĩguo ũrĩkũmenyagĩrĩra, ũtaũku nĩguo ũrĩkũrindagĩrĩra,

¹²Ũteithũrithagio harĩ njĩra ĩrĩa ya ũũru, ũthenganagĩre na andũ arĩa maaragia maũndũ ma rũng’athio,

¹³O arĩa matigaga mĩthiĩre ĩrĩa mĩerekereru, magathiaga na njĩra iria ii nduma;

¹⁴Nĩo arĩa makenagio nĩ gwĩka ũũru, na rũng’athio rũa mũndũ ũrĩa mũũru makaiguaga wega nĩruo;

¹⁵No-o arĩa mahotomagia mĩthiĩre yao, ikĩro ciao igagĩtuĩka nĩ iria hĩtanu--

¹⁶Gũteithũrũo ũteithũragwo ningĩ harĩ mũndũ mũka wa kwene, ũgĩteithũkage harĩ mũgeni ũcio ũnyorokagia ciugo ciake,

¹⁷Ũrĩa ũtigĩte mũratawe ũrĩa maatumire ndũgũ e mũirĩtu, agakĩriganĩrũo nĩ kĩrĩkanĩro kĩa Ngai wake.

¹⁸Amu nyũmba yake nĩ kĩharũrũka kĩinamĩrĩire gĩkuũ-inĩ, na ikĩro ciake irorete o kũu kwa arĩa akuũ.

¹⁹Arĩa mamũceeragĩra gũtirĩ ũcokaga kuuma ho, matiumagĩrĩra njĩra iria cia muoyo--

²⁰Wee-rĩ, ũgĩteithũke, nĩ getha ũgerage njĩra ya andũ arĩa ega, ũrũmagĩrĩre o ikĩro cia andũ arĩa athingu.

²¹Nĩ gũkorũo andũ arĩa arũngĩrĩru nĩo a gũtũũra bũrũri, acio akinyanĩru-rĩ, nĩo a gũgatigara kuo.

²²No andũ arĩa aaganu nĩ kũrindũrũo makarindũrũo bũrũri, mĩgarũka ĩo nĩ kuombororio ĩkombororio kuo.