Proverbs 4

¹ARIŨ akwa, iguai ũtaarani wa ithe wanyu, thikĩrĩriai, nĩguo mwĩgĩĩre na mbuguĩro!

²Amu ũhoro ũyũ ndĩramũruta nĩ mwega; menyai gũgatigana na kĩrĩra gĩakwa!

³Thima-rĩ, niĩ ndarĩ mwana harĩ baba, mwana mwĩthĩ, o ũrĩa warĩ itote maitũ akĩnyona.

⁴Baba nake nĩ kũnduta aandutaga, akanjĩra ũũ: Ngoro yaku ta nĩĩikare ĩkĩririkanaga ũhoro wakwa wega; menyagĩrĩra maathani makwa, nĩguo ũtũũre:

⁵Gĩa na ũũgĩ-ũrĩa-wa-ma, gĩa na mbuguĩro; tiga gũkariganĩrũo, na ndũkanakerũre ũtigane na ciugo cia kanua gaka gakwa.

⁶Menya gũgatigana na mũtumia ũcio wĩtagwo Ũũgĩ-wa-ma, nake no akũmenyagĩrĩre; mwendage, na nĩarĩkũgitagĩra.

⁷Ũndũ wa mbere no ũũgĩ; kĩĩgĩĩre na ũũgĩ: ĩĩ-ni, kaba kũruta ũmathi waku wothe wĩgwatĩre mbuguĩro;

⁸Mũtũũgĩrie, nake no agakwambatĩria; wamũhĩmbĩria-rĩ, agatũma ũtuĩke mũtĩe.

⁹Agagwĩkĩra thũmbĩ ya ngoga mũtwe; thũmbĩ ĩrĩ ũthaka nĩyo agakũhe.

¹⁰MŨRŨ wakwa, igua, na wĩtĩkĩre ciugo ciakwa, na mĩaka ya muoyo waku nĩ kũingĩha ĩgakĩingĩha.

¹¹Nĩnguonereirie gũthiĩ na njĩra ĩrĩa ya ũũgĩ-wa-ma, ngagĩkwerekeria mĩthiĩre-inĩ ĩrĩa mĩerekereru.

¹²Rĩrĩa ũrathiĩ, makinya maku matingĩhĩngĩcwo, o na wateng’era, ndũrĩhĩngagwo.

¹³Mũtumia ũyũ ũgwĩtwo Ũtaaro-rĩ, mwĩnyitagĩrĩre o na hinya; ndũkanamũrekie: mũgitagĩre, amu nĩwe mũgũtũũria muoyo.

¹⁴Andũ arĩa aaganu-rĩ, ndũkanatonye na mũirigo wao; menya gũkanagera njĩra ya andũ arĩa oru.

¹⁵Mĩthemage, ndũkanathiĩre hakuhĩ nayo; mĩhutatagĩre, ũkehĩtũkĩra.

¹⁶Nĩ gũkorũo andũ acio matingĩkoma matekĩte ũndũ mũũru, na nĩmoragwo nĩ toro maakorũo matarĩ mũndũ matũmĩte agũe.

¹⁷Tondũ irio iria marĩaga ciumaga o ũmaramari-inĩ, na ndibei ĩrĩa manyuaga nĩ ya ũgiginyani.

¹⁸No rĩrĩ, mũthiĩre wa andũ arĩa athingu ũhaana ta ũtheri gũgĩkĩa, ũrĩa ũũkaga ũkĩnenehaga kinya mũthenya barigici.

¹⁹Njĩra ya arĩa aaganu ĩhaana ta nduma nene; o matimenyaga kĩrĩa kĩamahĩnga.

²⁰MŨRŨ wakwa, thikĩrĩria ũhoro wakwa; inamĩrĩria gũtũ ũkĩigue ciugo iria nguuga.

²¹Ndũkanareke ithenge maitho-inĩ maku; ciikaragie ngoro-inĩ yaku o gatagatĩ.

²²Amu harĩ arĩa magĩĩte nacio ii na muoyo, na igekĩra mwĩrĩ wao wothe ũgima.

²³Makĩria ma wĩgitĩri waku wothe, wĩgitagĩre ngoro, nĩ gũkorũo ihumo cia muoyo nĩ na thĩinĩ wayo irĩ.

²⁴Ĩthengerie kanua ke ndeto hotomu, mĩromo mĩhĩtanu-rĩ, mĩeherie haraya nawe.

²⁵Maitho maku ta nĩmarorage o na mbere, imone ciaku nĩcierekagĩre na mbere yaku wega.

²⁶Araganagia wega ũthiĩro wa magũrũ maku, njĩra ciaku ciothe ikoragwo ikindĩirũo.

²⁷Menya ũkehũka na mwena wa ũrĩo kana wa ũmotho; kinyũkagia kũgũrũ kuume ũũru-inĩ.