Proverbs 6

¹MŨRŨ wakwa, ũngĩgakorũo ũtuĩkĩte ithenya rĩa mũndũ wa kwanyu, ũtuĩke atĩ nĩwe wa kũmũrĩhĩra thirĩ harĩ mũndũ wa kũngĩ-rĩ;

²Ũngĩkorũo ũrĩ mũtege nĩ uuge wa kanua gaku, ũgakĩgwatithio nĩ uuge ũcio wa kanua gaku-rĩ,

³No wĩke atĩrĩ, mũrũ wakwa, nĩguo wĩteithũrithie, kuona nĩwĩtonyetie guoko-inĩ kwa mũndũ ũcio wa kwanyu: thiĩ, ũkenyihie, ũmũringĩrĩrie mũno akuohore.

⁴Ndũkareke maitho maku mone toro, o na kana ũreke imone ciaku icũnge;

⁵Wĩteithũre ta thiya moko-inĩ ma mũguĩmi, kana ta nyoni guoko-inĩ kwa mũtegi.

⁶Thiĩ harĩ thigiriri, wee kĩgũta gĩkĩ, ũgacũranie mĩtugo yayo, nĩguo ũkĩũhĩge!

⁷Thigiriri yo ndĩrĩ na mũthamaki, kana mũrũgamĩrĩri, kana mũmĩathi,

⁸Na no ĩĩigagĩra mũthithũ wa irio hingo ya riũa, ĩgakĩũnganagia kandũ kayo hingo ya magetha.

⁹Wee kĩgũta gĩkĩ, ũgũkomerera nginya rĩ? ũrĩũkĩra rĩ, ũtige toro waku?

¹⁰Atĩ no wambe ũkomakome, ũcoke toro hanini; atĩ ũkũnjanie hĩ kahinda ũgĩkome!

¹¹Ũhoro ũcio-rĩ, ũgatũma ũkĩa waku ũgũkorerere ta mũitũ, ũtharĩkĩrũo nĩ ũnyamari ta arĩ mũndũ ũgwete ngo.

¹²Mũũra-huhũ-rĩ, mũndũ wa maũndũ maaganu, nĩ ũrĩa ũceerangaga e na kanua ke ndeto hotomu.

¹³Nĩ kuuna oinagĩra ũrĩa ũngĩ riitho, na kuoyoiya akoyoyagia makinya, na nĩahenanagĩria na ciara cia moko.

¹⁴Ngoro-inĩ yake no ruurugĩ arĩ naruo; hingo ciothe no ũũru athugundaga; nĩ mũhuri wa maũndũ ma thogothogo.

¹⁵Tondũ wa ũguo-rĩ, mũtino wake ũkamũkora na kĩhobanĩrio, athuthĩke o hububuku, na hatarĩ kĩhonia.

¹⁶Kũrĩ maũndũ matandatũ mathũirũo nĩ Jehova, ĩĩ-ni, o na nĩ mũgwanja ngoro yake yonaga me magigi:

¹⁷Namo nĩ maitho ma ngũrũ, na rũrĩmĩ rũa ũrongo, na moko marĩa maitaga thakame ĩrĩa ĩtehĩtie;

¹⁸Ningĩ ngoro ĩrĩa ĩthugundaga maũndũ ma waganu, na magũrũ marĩa mateng’eraga na ihenya makinye ũũru-inĩ;

¹⁹Na mũira wa maheni ũtumũraga na mathara, na mũndũ wa kũhura thogothogo gatagatĩ ka andũ a nyũmba ĩmwe.

²⁰MŨRŨ wakwa, tũũra o ũrũmĩtie watho wa thoguo, na ndũkanatigane na kĩrĩra kĩa nyũkwa.

²¹Ciĩoherere thĩinĩ wa ngoro yaku itũũre ho hingo ciothe; ciĩrigicĩrie ngingo.

²²Rĩrĩa ũgũthiĩ, nĩ ũhoro ũcio ũrĩgũtongoragia; wakoma-rĩ, nĩguo ũrĩkũmenyagĩrĩra, na wahindũka, nĩguo ũrĩgũteretagĩra.

²³Amu watho nĩ tawa, na kĩrĩra nĩ ũtheri, namo mataaro marĩa ma kũũhĩgia mũndũ nĩmo njĩra ya muoyo;

²⁴Maũndũ macio nĩ ma gũkũriganĩrĩria na mũndũ mũka ũrĩa mũũru, makũhonokie harĩ ũnyoroku wa rũrĩmĩ rũa mũka ũcio mũgeni.

²⁵Menya gũkerirĩria ũthaka wake na ngoro, na ndũkanetĩkĩre akũgwatie na imone ciake cia maitho.

²⁶Amu-rĩ, tondũ wa mũka wa maraya mũndũ mũrũme no gũthĩna o kinya atuĩke mũhoi wa kenyũ ka irio; mũka mũtharia nĩ muoyo wene aguĩmaga, na ũrĩ guo kĩndũ kĩa bata mũno.

²⁷No anga mũndũ angĩhota kũgwata mwaki na gĩthũri, na nguo ciake itihĩe?

²⁸Kana mũndũ akinyange makara me mwaki, na aage kũhĩa makinya?

²⁹No taguo mũndũ ũtonya kwa mũka wa mũndũ ũrĩa ũngĩ: gũtirĩ ũngĩhutia mũka ta ũcio na ndatuĩke mũgeru ngero.

³⁰Andũ matimenaga mũici, angĩkorũo aiyĩte no getha ehũnie rĩrĩa ahũtiĩ,

³¹No aanyitwo, nĩarĩhaga maita mũgwanja, akaruta indo ciothe iria e nacio gwake.

³²Mũndũ wa gũtharia na mũndũ mũka nĩ kwaga aagĩte wĩcirio; ũndũ ũcio egwĩka nĩ wa kwĩnina we mwene.

³³Arĩona o nguraro, na anyararĩke; ũmeneku ũcio wake ndũngĩthambĩka.

³⁴Nĩ gũkorũo ũiru nĩwĩkagĩra mũndũ marũrũ manene, na ndarĩ tha angĩigua mũthenya wa kwĩrĩhĩria.

³⁵Kĩndũ gĩa gwĩkũũra nakĩo, gũtirĩ o na kĩrĩkũ angĩrora, na ndangihorera o na wamũhe mahaki maingĩ.