Psalms 10

¹JEHOVA, ũgũkĩrũgama o haraya nĩkĩ? mahinda ma mĩnyamaro-rĩ, nĩ kĩ gĩtũmaga wĩhithe?

²Tondũ wa mwĩono wa andũ arĩa aaganu, ũrĩa mũthĩni nĩ mũthĩng’e mũno: marogwatio o ene nĩ mauungumania o macio megereirie!

³Amu-rĩ, ũrĩa mwaganu nĩerahagĩra kwĩrirĩria kwa ngoro yake, na tondũ wa ũrĩa arĩ riitho iraya nĩethambĩte Jehova, o na kũrurũka akamũrurũka.

⁴Ũcio mwaganu-rĩ, tondũ wa ũrĩa ũthiũ wake wĩtĩĩte, oigaga atĩrĩ, Ndangĩrĩhania. Mwĩgererio wake wothe no atĩ, Gũtirĩ Ngai.

⁵Maũndũ make maikaraga marĩ o manyitu hingo ciothe: matuĩro maku-rĩ, marĩ igũrũ mũno, o kũrĩa atangĩmona; arĩa othe me muku nake, no kũmatemba amatembaga.

⁶Ũrĩa eĩraga na ngoro nĩ atĩrĩ, Niĩ-rĩ, ndikenyenyeka; njiaro na njiaro ndirĩ hĩndĩ ngona ũũru.

⁷Kanua gake kaiyũraga irumi, na ũrĩa-ma, o na ũhahanyi; nguruĩ ya rũrĩmĩ rũake haikaire ũũnũhi, na waganu.

⁸Aikaraga ehetereirie tũheta-inĩ tũrĩa twĩ mĩciĩ-inĩ; kũrĩa kũgitaru nĩkuo oragagĩra ũrĩa ũtarĩ na ũũru; maitho make maikaraga macũthĩrĩirie na hitho mũndũ ũrĩa ũtarĩ na mũmũteithia.

⁹Kũu kũgitaru aikaraga ohanĩirie ta mũrũthi wĩ kĩmamo-inĩ kĩaguo, agakĩoheria ũrĩa mũthĩni nĩ getha amũnyite; agwatagia ũcio mũthĩni agakĩmũkururia e mũrigicĩrie na wabu yake ya gũtegana.

¹⁰Nĩ gũkunga akungaga, agakĩinamĩrĩra, nao acio matarĩ na mũmateithia makarũndwo nĩ makarau marĩa e namo.

¹¹Akeĩra na ngoro atĩrĩ, Mũrungu nĩ mũriganĩre; nĩehithĩte ũthiũ; ndarĩ hingo angĩona.

¹²Kĩarahũke, Jehova; wee Mũrungu-rĩ, kĩambararie guoko na igũrũ: tiga kũriganagĩrũo nĩ arĩa athĩnĩki.

¹³Nĩ ũndũ kĩ mũndũ mwaganu aagĩtũũra arurũkaga Ngai, akiugaga ũũ na ngoro, atĩ, Wee ndũngĩrĩhania?

¹⁴Kuona-rĩ, nĩwonete; amu gũgĩtwaranĩrũo nditikũ na mĩtandiũko wee nĩwĩonagĩra, ũgakĩoya ũhoro ũcio moko-inĩ maku: ũrĩa ũtarĩ na mũmũteithia nĩakũrekagĩrĩria ũhoro wake; wee nĩwe ũtũire wĩ mũteithia wa ciana cia ngoriai.

¹⁵Kiune ũrĩa mwaganu guoko; mũndũ ũrĩa mũũru-rĩ, thingata waganu wake o nginya ũũkinyie gĩturi.

¹⁶Jehova nĩwe Mũthamaki kinya tene o na tene: ndũrĩrĩ nĩ gũtoma itomete igathira bũrũri wake.

¹⁷Wee, Jehova, nĩũrĩkĩtie kũigua wendi wa arĩa ahoreri: ngoro ciao nĩũrĩcinyitagia, na ũtegage gũtũ ũkamathikĩrĩria;

¹⁸Ũgagĩtua cira wa mwana wa ngoriai, o na wa mũndũ mũtereme, nĩguo mũndũ, na no wa thĩ, ndakanacoke gũtuana nda.