Psalms 132

¹Ĩ JEHOVA, ririkana ũhoro wa Daudi, mĩtangĩko yothe ĩrĩa onire;

²Ũririkane ũrĩa ehĩtire harĩ Jehova, agĩkĩĩgirithia harĩ Kĩhoti ũcio wa Jakubu:

³Niĩ-rĩ, ndigatonya hema, nĩyo nyũmba yakwa, na ndikahaica kĩrumia gĩakwa kĩa ũrĩrĩ;

⁴Maitho makwa-rĩ, ndikareka mone toro, kana imone ciakwa icũnge,

⁵O nginya ngonera Jehova handũ ha gũikara, o we Kĩhoti wa Jakubu ngorũo ndĩmuoneire gĩtũũro!

⁶Nĩ kũigua twaiguire atĩ rĩtũire Efiratha, tũkĩrĩkora mĩgũnda ya mũtitũ-inĩ.

⁷Nĩtũgakĩingĩre gĩikaro-inĩ gĩake! nĩtũinamĩrĩre gĩturũa-inĩ kĩa makinya make.

⁸Arahũka, Jehova, ũgĩtonye kĩhurũko-inĩ gĩaku, wee, o na ithandũkũ rĩrĩ rĩa hinya waku!

⁹Athĩnjĩri aku ta nĩmehumbe ũthingu; andũ arĩa maiguaine nawe nĩmakũngũiye nĩ gũkena!

¹⁰Tondũ wa ndungata yaku Daudi-rĩ, tiga kũhutatia ũthiũ wa ũrĩa waku mũitĩrĩrie-maguta.

¹¹Jehova nĩehĩtire akĩrĩkĩria Daudi na ma, na ũhoro ũcio ndangĩũgarũrĩra, akiuga, Gĩtĩ gĩaku kĩa ũnene nĩ arĩa a gũciarũo nĩ mwĩrĩ waku ngagĩikaragĩria.

¹²Ariũ aku mangĩtũũra mamenyereire kĩrĩkanĩro gĩakwa, gwata maũira makwa marĩa ngamarutaga-rĩ, ariũ ao o nao magaikaragĩra gĩtĩ kĩu gĩaku kĩa ũnene tene o na tene.

¹³Nĩ gũtuĩka Jehova nĩethurĩire Zayuni, nĩ kwĩendera aakwĩendeire gũgĩtuĩka gĩtũũro gĩake:

¹⁴Gũkũ nĩkuo kĩhurũko gĩakwa o nginya tene; nĩkuo ngũtũũra, tondũ nĩ kwenda ndĩkwĩendeire.

¹⁵Ũmathi wakuo nĩ kũrathima ndĩĩũrathimaga mũno; ngĩa ciakuo nĩ kũhũnia ndĩrĩcihũnagia irio.

¹⁶Athĩnjĩri-Ngai akuo ngũmahumba ũhonokio, na andũ akuo, acio tũrĩ ũiguano nao, no matũũre makũngũyagia nĩ gũkena.

¹⁷Nĩkuo ngatũma rũhĩa rũa Daudi rũthundũkĩre; ũcio wakwa mũitĩrĩrie-maguta nĩ tawa ndĩmũigĩire wa gwakanaga.

¹⁸Thũ ciake nĩ kũhumba ngacihumbaga njono, nowe mwene, thũmbĩ yake ya ũnene nĩ kũgaacĩra ĩkagaacĩra ĩrĩ mũtwe wake.