Psalms 20

¹JEHOVA arokwamũkĩria mũthenya wa kũhatĩkwo; rĩĩtwa rĩa Ngai wa Jakubu rĩrokũiga handũ haraihu na igũrũ;

²Agũtũmĩre ũteithio arĩ harĩa hake haamũre, agĩgũtiirĩrĩre arĩ kũu Zayuni;

³Aroririkana mahaki mothe marĩa wanaruta o agĩĩtĩkagĩra ihaki rĩaku rĩrĩa rĩa njino;

⁴Arokũhe o ũrĩa ngoro yaku ĩkwenda, agĩkũhingĩrie ũhoro wothe ũrĩa wĩtaarĩte.

⁵Hĩndĩ ĩo nĩ kũrũhia tũkarũhia nĩ ũndũ wa ũhonokio waku, na tondũ wa rĩĩtwa rĩa Ngai witũ tuoe ibebero ciitũ na igũrũ: Jehova arokũhingĩria maũndũ mothe marĩa ũmũhoete.

⁶Rĩu ndĩ kũmenya atĩ Jehova nĩahonokagia ũrĩa wake mũitĩrĩrie-maguta; nĩarĩmwamũkagĩria arĩ igũrũ rĩu rĩake rĩamũre, amwĩtĩkage na ũhoti wa kũhonokania, ũrĩa wa guoko gwake kwa ũrĩo.

⁷Andũ amwe marahaga ngari cia ita, angĩ mbarathi, no ithuĩ tũrĩrahaga rĩĩtwa rĩa Jehova Ngai witũ.

⁸O nĩ gũkurumana makurumanĩte, makagũa, no ithuĩ tũgokĩra, tũkehanda.

⁹Ĩ Jehova, honokagia mũthamaki; na ũtwamũkagĩrie mũthenya ũrĩa twakaya.