Psalms 22

¹NGAI wakwa, Ngai wakwa, ũkĩndiganĩirie nĩkĩ? ũgũgĩikara haraya nĩkĩ, ũkaaga kũndeithia, ũgakĩraihanĩrĩria na ciugo ciakwa ngĩrarama?

²Ĩ Ngai wakwa, ngũkaya mũthenya, na ndũngĩnyamũkĩria; o na gwata ũtukũ, na ndingĩona ũhurũko.

³No ĩndĩ, wee wĩ mũtheru, o wee ũtũire ũikarĩire gĩtĩ kĩa ũnene harĩa ũgoocagĩrũo nĩ Isiraeli.

⁴Maithe maitũ nĩwe mehokaga; maakwĩhokaga, nawe ũkamahatũraga.

⁵We nĩwe maakayagĩra, magakĩhatũka; nowe mehokaga, na matiigana gũconorithio.

⁶No niĩ-rĩ, nduĩkĩte o kĩgunyũ, ti ta mũndũ; ndĩ kĩmene kĩa andũ, ndurũkĩtwo nĩ kĩrĩndĩ.

⁷Arĩa othe maranyona no gũ’thekerera mara’thekerera; nĩ gũ’thiorera mara’thiorera mĩromo, na makanyinĩria mĩtwe yao, makoiga,

⁸No kĩrekererie Jehova ũhoro waku! rekei akĩmũhatũre arĩ we; nĩamũteithũrithie, kuona atĩ nĩekenagĩra nĩwe!

⁹Nĩ ma, wee nĩwe wandutire ihu-inĩ; nĩwe watũmaga ngĩe na wĩhoko ndĩ o nyondo-inĩ cia maitũ.

¹⁰No harĩ wee ndaikirio kuuma o ndaciarũo; kuuma o rĩrĩa ndarĩ nda ya maitũ ũtũire ũrĩ o Mũrungu wakwa.

¹¹Tiga kũnjikara haraya, tondũ mĩnyamaro ĩĩ hakuhĩ, nĩ amu hatirĩ na wa gũkĩndeithia.

¹²Ndĩ mũrigicĩrie nĩ ndegwa nyingĩ cia njamba, ngahĩtĩrĩrio nĩ mategwa marĩa me hinya ma Bashani.

¹³Ikũnjathamĩria inua ciacio, ta mũrũthi ũgũtamburanga o ũkĩrumaga.

¹⁴Njitĩkĩte thĩ ta maĩ, mahĩndĩ makwa mothe nĩ mareganu, ngoro yakwa yororoete ta mũhũra, ĩkaringũka ĩrĩ o hayo nda-inĩ yakwa.

¹⁵Hinya wakwa ũũmagarĩte ta rũgĩo, naruo rũrĩmĩ rũgakĩgwatana na thĩa nĩ kũng’ara; nĩ kũngomia ũrakĩngomia rũkũngũ-inĩ rũa gĩkuũ.

¹⁶Amu ndĩ mũrigicĩrie nĩ magui, ndĩ mũhingĩrĩrie nĩ kĩũngano kĩa arĩa eki-naĩ; nĩ gũ’theca ma’thecete hĩ o na nyarĩrĩ.

¹⁷Mahĩndĩ makwa, ndahota kũmatara mothe; nao no maitho mangarangĩire o meĩndoreire.

¹⁸Magwete kũgayana nguo ciakwa, itonyo rĩakwa magakĩrĩcukĩra mĩtĩ.

¹⁹No wee, Jehova-rĩ, tiga gũikara haraya; wee mũndangĩri, hiũha kũndeithia!

²⁰Teithũra muoyo wakwa harĩ rũhiũ rũa njomo; ũyũ wakwa wa mũmwe-rĩ, ũkĩmũteithũre harĩ hinya wa ngui.

²¹’Honokia kanua-inĩ ka ngatia, o gwata hĩa-inĩ cia mbogo - Ĩ nĩguo, ũrĩ kũnyamũkĩria!

²²Rĩu no ’memerekerie andũ aitũ ngumo ya rĩĩtwa rĩaku; ngũgũkumĩria kĩũngano-inĩ gĩa kĩrĩndĩ gatagatĩ.

²³Inyuĩ etigĩri Jehova, mũkumiei; mbeũ ya Jakubu, inyuothe, mũgoocei; na mũmũguoyohere, inyuothe mbeũ ya Isiraeli.

²⁴Tondũ ndarurũkĩte mĩtandiũko ya ũrĩa mũtandiũre, kana akamĩnyira; o na ndanamwĩhithĩra ũthiũ; no rĩrĩ, aamũrĩrĩra, we no kũmũigua akĩmũiguire.

²⁵Gĩtũmi gĩa gũkumia kũrĩa ndĩragũkumia ndĩ kĩũngano-inĩ kĩnene kiumĩte o harĩ wee: ngũkĩhingia mĩĩhĩtwa yakwa ndĩ mbere ya arĩa amwĩtigĩri.

²⁶Andũ arĩa ahoreri nĩmarĩe mahũne; nĩmagooce Jehova, acio mamũrongoretie: ngoro cianyu irotũũra nginya tene na tene.

²⁷Ituri ciothe cia thĩ no ikaririkana, na icokerere Jehova; mĩhĩrĩga yothe ya ndũrĩrĩ nĩĩgakũinamĩrĩra.

²⁸Tondũ ũthamaki nĩ wa Jehova; nowe mũthamaki wa ndũrĩrĩ.

²⁹Andũ arĩa aaramu a thĩ othe nĩ kũrĩa makarĩa na mamũinamĩrire; arĩa othe aikũrũki rũkũngũ-inĩ no magaturia ndu mbere yake, o mũndũ ũrĩa ũtangĩhota gwĩtũũrĩria muoyo.

³⁰Mbeũ ĩrĩ o kuo ya kũmũtungatagĩra; ũhoro wa Mwathani-rĩ, ũrĩheagwo rũciaro rũrĩa rũĩ thutha.

³¹Acio nĩmagoka maheane ũhoro wa ũthingu wake harĩ kĩrĩndĩ kĩrĩa gĩgaciarũo, atĩ nĩwe wekire ũguo.