Psalms 44

¹TWANAIGUA na matũ maitũ, Ngai, tũkeragwo nĩ maithe maitũ, wĩra ũrĩa warutire matukũ macio mao, matukũ o marĩa ma tene.

²Wee-rĩ, nĩwaingatire ndũrĩrĩ na guoko gwaku, ũgĩcoka kũmahanda o; irĩndĩ icio ũgĩcikoria ũũru, no-o ũgĩtũma mathegee.

³Amu matiagwatire bũrũri na hinya wa rũhiũ rũao, o na ti icoka ciao ene ciamahonokirie: no nĩ guoko gwaku kwa ũrĩo, nĩ gĩcoka gĩaku, o na ũtheri wa gĩthiithi gĩaku; tondũ nĩwendire kũmeka wega.

⁴Ĩ Ngai, wee nowe Mũthamaki wakwa: gĩathĩrĩrie Jakubu atĩ agĩage na ũhonokio.

⁵Tondũ wa hinya waku, arĩa me muku na ithuĩ no tũmatindĩkage makagũa; tondũ o wa rĩĩtwa rĩaku, arĩa matũũkagĩrĩra, no tũmateremage.

⁶Thima-rĩ, ũta wakwa tiguo ndĩrĩĩhokaga, rũhiũ rũakwa naruo, tiruo rũngĩkĩ’honokia.

⁷Nĩ gũkorũo, arĩa me muku na ithuĩ, wee nowe ũtũire ũtũhonokagia kũrĩ o, acio matũthũũrĩte-rĩ, ũgakĩmaconorithia.

⁸Ngai nowe tũtindaga tũkĩĩrahĩra mũthenya wothe, rĩĩtwa rĩu rĩaku nĩrĩo tũrĩcokagĩria ngatho nginya tene na tene.

⁹Ĩndĩ rĩu nĩ gũte ũtũteete, ũgatũnyararithia; ndũũkanagĩria na ita ciitũ.

¹⁰Ũtũmaga tuonie mũmaitha ciande; acio matũthũũrĩte magetahagĩra mataha.

¹¹Ũtũnenganĩrĩte ta igondu ituĩkĩte cia kũrĩo; ũgatũhurunjĩra ndũrĩrĩ-inĩ.

¹²Kĩrĩndĩ gĩaku ũkĩendetie tũhũ; ndũrĩ uumithio wonete harĩ thogora ũcio ũkĩendetie:

¹³Ũtũtuĩte kĩmene harĩ arĩa tũhakaine nao, tũgatuĩka a gũthekererũo na kũnyũrũrio nĩ acio matũthiũrũrũkĩirie.

¹⁴Ũtũtuĩte kĩgano harĩ ndũrĩrĩ, tũgagĩtuĩka a kũinainagĩrio ciongo nĩ irĩndĩ.

¹⁵Mũthenya wothe ũnyararĩku wakwa ũndindaga o maitho-inĩ, thoni cia ũthiũ wakwa nĩ kũ’huba i’hubĩte,

¹⁶Nĩ ũndũ wa mũgambo wa ũrĩa ũmenanagia o akĩrumanaga; na tondũ wa gũkĩonaga mũndũ ũrĩa thũ, ũrĩa mwĩrĩhĩria.

¹⁷Tũkoretwo nĩ maũndũ macio mothe, na tũtirĩ twariganĩrũo nĩwe, o na tũtirĩ twathahia kĩrĩkanĩro kĩrĩa gĩaku.

¹⁸Ngoro ciitũ iticokete na thutha, namo makinya maitũ matiehũkĩte makoima njĩra yaku,

¹⁹O na tondũ wee ũtũthuthurĩire imamo-inĩ cia mbwe, na ũgatũhumbĩra na nduma ta ya gĩkuũ.

²⁰Kũngĩkorũo twanariganĩrũo nĩ rĩĩtwa rĩa Ngai witũ, kana moko maitũ tũkamaarĩra ngai ng’eni-rĩ,

²¹Githĩ Ngai ndangĩthuuthuuria ũhoro ũcio? nĩ gũtuĩka nĩwe ũũĩ hitho cia ngoro.

²²Ĩĩ-ni, o na tũtindaga tũkĩũragwo mũthenya wothe nĩ ũndũ waku; tũtuagwo ta igondu cia gũthĩnjwo.

²³Ramũka! ũgĩkomete nĩkĩ, Mwathani? hindũka! ndũgagĩtũte tene na tene.

²⁴Wĩhithĩte ũthiũ nĩ ũndũ kĩ, ũgakĩriganĩrũo nĩ ũthĩnĩki witũ na kũhinyĩrĩrio gũkũ tũhinyagirĩrio?

²⁵Thima-rĩ, mĩoyo iitũ ĩkunguĩrĩire o tĩri-inĩ, nda ciitũ igakĩgwatana o na thĩ.

²⁶Arahũka nĩ getha ũtũteithie, ũgĩtũkũũre nĩ ũndũ wa ũtugi ũrĩa waku.