Psalms 83

¹Ĩ NGAI, ndũgatũũre ũkirĩte; Mũrungu, tiga gũikara o ũtumĩtie; gĩtige gũikara o wĩgwatanĩirie.

²Tondũ atĩrĩ, thũ ciaku nĩ kũronja iraronja, acio magũthũũraga magakĩambararia ciongo.

³Kĩrĩndĩ gĩaku nĩmakĩgĩĩrĩire ndundu ya wara, magagĩcirĩra andũ aku aya ũtũire ũhithĩte.

⁴Moigĩte atĩrĩ, Ũkai, tũmang’ũrie matigacoke gũtuĩka rũrĩrĩ; nĩguo rĩĩtwa rĩu rĩa Isiraeli rĩtikanacoke kũririkanwo.

⁵Amu nĩ gũciranĩra maciranĩire na ngoro o ĩmwe; wee nĩwe maragĩa na kĩrĩkanĩro nĩ ũndũ waku;

⁶A hema cia Edomu na cia Aishumaeli, a Moabi o na Ahagari,

⁷A Gebali, na Amoni, na Amaleki, ningĩ Afilisiti gwata andũ a Turo;

⁸A Ashuri o nao nĩmegwatanĩtie nao, nĩo matuĩkĩte guoko gwa ciana cia Loti.

⁹Meke o ta ũrĩa wekire a Midiani; ta ũrĩa ningĩ wekire Sisera, o na Jabini, karũũĩ-inĩ karĩa ga Kishoni;

¹⁰O acio maaninĩirũo Eni-doru, magĩtuĩka o thumu wa kũnoria tĩri.

¹¹Makang’ũ mao-rĩ, mahaananie na Orebu na Zeebu; anene ao othe ũkĩmahaananie na Zeba na Zalimuna:

¹²Nĩo moigire, Nĩtwĩgwatĩre itũũro cia Ngai, twĩrigĩrie nacio!

¹³Ĩ Ngai wakwa, matue ta rũkũngũ rũrĩa rũgũrũkanagio, na ta maragara marĩa mombũre nĩ rũhuho.

¹⁴Ta mwaki ũrahĩhia mũtitũ, ningĩ ta rũrĩrĩmbĩ rũracina irĩma-rĩ,

¹⁵Titimũrana nao o ro ũguo na kĩhuhũkanio gĩaku, kĩmamakie na kĩrũhuho kĩu gĩaku kĩnene.

¹⁶Tũma mothiũ mao maiyũrũo nĩ thoni, nĩ getha metĩkĩre kũrongoria rĩĩtwa rĩaku, wee Jehova.

¹⁷Gũconoka nĩmaconoke, matũũre marĩ amaku nginya tene; ĩĩ-ni, marogegeario, na matome o gũtoma!

¹⁸Nĩguo mamenye atĩ wee, o wee wĩtagwo JEHOVA, nowe wiki Ũrĩa-wĩ-Igũrũ-Mũno o igũrũ rĩa thĩ yothe.