Psalms 91

¹ŨRĨA ũtũire ahithĩtwo ũhitho-inĩ wa Ũrĩa-wĩ-Igũrũ-Mũno arĩikaraga kĩĩgunyĩ-inĩ kĩa Mwene-Hinya.

²Ngũkiuga atĩrĩ, ũhoro wa Jehova, atĩ, Nĩwe irahĩro rĩakwa o gwata gĩikaro gĩakwa kĩirigĩre; nĩwe Ngai wakwa, ũrĩa ndĩĩhokete.

³Tondũ we nĩwe wa gũgũteithũra gĩkerenge-inĩ kĩa mũtegi, o gwata mũrimũ-inĩ ũrĩa wa mũmitũko.

⁴Arĩkũgitagĩra na njoya ciake cia mĩhĩko, ruungu rũa mathagu make nĩho ũrĩĩgitagia; ũhoro-wa-ma wake-rĩ, nĩ ngo, na noguo gĩthuma.

⁵Ndũrĩĩtigagĩra itebebia rĩrĩa rĩngĩũka ũtukũ, kana mũguĩ wa gũthĩrĩrĩka mũthenya,

⁶O na kana mũrimũ ũrĩa ũceerangaga na nduma, kana mũthiro wa kũgũmania o mĩaraho.

⁷Rũere-inĩ rũaku andũ no kũringa thĩ ngiri ng’ima, mwena waku wa ũrĩo magũe ngiri ikũmi, no wee ndũngĩkuhĩhĩrio nĩguo.

⁸Wee no kwĩrorera ũkerorera na maitho maku, wone arĩa aaganu makĩgwata kũrĩhwo ũũru wao.

⁹Tondũ wee nĩuugĩte ũũ: Jehova, nĩwe irahĩro rĩakwa! wee nĩũtuĩte Ũrĩa-wĩ-Igũrũ-Mũno gĩtũũro gĩaku;

¹⁰Gũtikĩrĩ ũũru o na ũrĩkũ ũgakũnyita, gũtirĩ itũhũhũ rĩngĩthengerera hema yaku.

¹¹Nĩ gũkorũo nĩagaatha araika ake nĩ ũndũ waku, makũmenyagĩrĩre ikĩro-inĩ ciaku ciothe.

¹²Marĩgũkuuaga ndayaya na hĩ ciao, ndũkae gũkahĩngwo kũgũrũ nĩ ihiga.

¹³Ũgakinyĩrĩria mũrũthi, o na nduĩra; ngatia ĩrĩa nyanake, o gwata ndamathia-rĩ, ũitereme na magũrũ.

¹⁴Kuona nĩanyitĩtie wendo harĩ niĩ, tondũ ũcio nĩndĩĩmũhatũraga hatĩ-inĩ; ndĩĩmũigaga handũ haraya na igũrũ, nĩ ũndũ nĩamenyete rĩĩtwa rĩakwa.

¹⁵Arĩngayagĩra, na niĩ ngamwamũkĩria; nĩndĩrĩikaraga nake hingo ya mĩnyamaro, ndĩrĩmũtharaga harĩ yo, na kũmũtĩithia ndĩmũtĩithie.

¹⁶Ngũmũtũũria matukũ maingĩ o kinya akaigania, ndĩkĩmuonagie ũhonokio wakwa.