Psalms 94

¹Ĩ JEHOVA, wee Mũrungu ũrĩa ũrĩhanagĩria, we Mũrungu ũrĩa ũrĩhanagĩria-rĩ, cangarũrũka!

²Ĩambararie, wee mũtuanĩri wa andũ othe a thĩ, arĩa eĩkĩrĩri-rĩ, ũkĩmathukĩre o ũrĩa maagĩrĩirũo.

³Arĩa aaganu, Jehova, nĩ hingo ĩigana atĩa megũtũũra marũhagia? ĩ nĩ hingo ĩigana atĩa andũ arĩa aaganu mekũrekwo makenũrũrũkage?

⁴O nĩ andũ a mũhahĩ, kwaria maaragia o na mwĩng’ang’io; acio othe eki maũndũ ma waganu, mĩikarĩre yao no ya mwĩtĩo.

⁵Nĩ kũhehenja mahehenjaga kĩrĩndĩ gĩaku, Jehova, igai rĩaku magakĩrĩnyarira.

⁶Moragaga mũtumia wa ndigwa o na mũgeni ũrĩa ũmaakĩrĩire, na magaita ciana cia ngoriai.

⁷Makoigaga, Jehova ndangĩona! Ngai wa Jakubu-rĩ, ndangĩrũmbũria!

⁸Mũtigĩcũranie, inyuĩ inunwa ici mwĩ kĩrĩndĩ-inĩ; inyuĩ irimũ ici-rĩ, mũgakĩũhĩga rĩ?

⁹ũrĩa wahandire gũtũ, nĩwe ũtangĩigua? ũrĩa wakũmbire riitho, nĩwe ũtangĩona?

¹⁰Ũrĩa ũtaaraga ndũrĩrĩ-rĩ, nĩakĩage gũkũmana, o we ũcio ũrutaga andũ ũhoro?

¹¹Jehova nĩoĩ meciria ma andũ, atĩ nĩ kĩndũ gĩa tũhũ.

¹²Gũkena no mũndũ ũrĩa wee, Jehova, ũtaaraga, o ũcio ũrutaga ũhoro wa kĩrĩra gĩaku,

¹³Nĩ getha ũmũheage ũhurũko matukũ marĩa ma ũũru, o nginya mũndũ ũrĩa mwaganu agakorũo enjeirũo irima.

¹⁴Amu Jehova ndarĩ hĩndĩ agate kĩrĩndĩ gĩake, igai rĩake ndangĩrĩtiganĩria.

¹⁵Amu-rĩ, mũtuĩre wa cira nĩ gũcoka ũgacokerera ũthingu, nao andũ othe a ngoro nũngĩrĩru nĩguo makarũmagĩrĩra.

¹⁶Nũ ũngĩũkĩra kũndũĩrĩra harĩ arĩa mekaga ũũru? nũ ũgũkĩrũgamania na niĩ ndĩ harĩ arĩa eki waganu?

¹⁷Guca Jehova aarĩ mũteithia wakwa, ngoro yakwa nĩĩngĩathiire o narua gũtũũra ũkiri-inĩ.

¹⁸Hĩndĩ ĩrĩa ndoigĩte, Kũgũrũ gwakwa nĩgũkũhigũka-rĩ, nĩ ũtugi waku, Jehova, wandiirĩrĩire.

¹⁹Rĩrĩa nyingĩhĩirũo thĩinĩ wakwa nĩ mĩtangĩko ũhoreria waku nĩguo ũngenagia ngoro.

²⁰Atĩrĩ, gĩtĩ kĩrĩa gĩa ũthamaki wa waganu-rĩ, kĩrĩ hĩndĩ kĩngĩgĩa ngwatanĩro nawe, o gĩa acio mahaaragĩria ũũnũhu na njĩra ya gwathithia watho?

²¹Nĩ kũrũrũnganĩra marũrũnganagĩra muoyo wa mũndũ ũrĩa mũthingu, magagĩtuĩra mwene thakame ĩo ĩtehĩtie atĩ oragwo.

²²No rĩrĩ, Jehova egũtũũra e rĩangĩro rĩakwa rĩake iraya na igũrũ; Ngai wakwa-rĩ, nĩwe ndũmba yakwa ya ihiga ya kũrahĩra.

²³Nake no akamacokereria waganu wao, amanine na njĩra ya ũũru o ũcio wao ene; Jehova Ngai witũ-rĩ, akamanina, o kũmanina.