Revelation 14

¹NGĨCOKA ngĩrora, ngĩona atĩrĩ, nĩ Gatũrũme, arũngiĩ kĩrĩma gĩa Sayuni igũrũ, e na andũ ngiri igana rĩa ngiri mĩrongo ĩna na inya, me na rĩĩtwa rĩake, na rĩĩtwa rĩa Ithe, maandĩkĩtwo mathiithi mao.

²Ningĩ ngĩigua mũgambo woima Igũrũ, ta mũrurumo wa maĩ maingĩ, ningĩ ta mũgambĩre wa ngwa nene; naguo mũgambo ũcio ndaiguire watariĩ ta wa ainia a inanda cia mũgeto makĩinia inanda ciao;

³nao nĩ ta rũĩmbo rũerũ maainaga me mbere-inĩ ya gĩtĩ kĩrĩa gĩa ũthamaki, na mbere ya ciũmbe iria inya ii muoyo, na athuri. Na gũtirĩ mũndũ ũngĩhota kwĩruta rũĩmbo rũu, tiga acio ngiri igana rĩa ngiri mĩrongo ĩna na inya, arĩa maagũrĩtwo thĩ makaamũranio nayo.

⁴Acio nĩo arĩa matarĩ methũkia na andũ-a-nja, amu nĩ thingi. Nĩo marũmagĩrĩra Gatũrũme o kũrĩa guothe athiaga. Nĩo maagũrirũo makĩamũranio na andũ arĩa angĩ, matuĩke maciaro ma mbere ma kũgetherũo Ngai o na Gatũrũme.

⁵Na matiarĩ hĩndĩ marĩ maakorũo maarĩtie maheni na tũnua twao; o, matirĩ na kaũũgũ.

⁶Ningĩ ngĩona mũraika ũngĩ arerete rĩera-inĩ o gatagatĩ, arĩ na Ũhoro-Mwega ũtagathira o na tene wa kũũmĩrĩria andũ arĩa matũire gũkũ thĩ, auumĩrĩrie ndũrĩrĩ ciothe na mĩhĩrĩga yothe na andũ a mĩario yothe na iruka ciothe;

⁷akiuga atĩrĩ, na mũgambo mũnene, Wĩtigĩrei Ngai, na mũmũgooce we, amu ihinda rĩake rĩa gũtuanĩra nĩ ikinyu; mũthathaiyei arĩ we wombire Igũrũ na thĩ na iria rĩrĩa inene o na ithima cia maĩ.

⁸Agĩcoka agĩũka mũraika ũngĩ, wa kerĩ, akiuga atĩrĩ, Nĩ igũu! Babuloni-rĩ, itũũra rĩrĩa inene-rĩ, nĩ igũu, o rĩrĩa rĩnyuithĩtie ndũrĩrĩ ciothe ndibei ya marakara ma ũmaraya warĩo.

⁹Ningĩ mũraika ũngĩ, wa gatatũ, akĩrũmĩrĩra acio, akiuga atĩrĩ, na mũgambo mũnene, Mũndũ aainamĩrĩra nyamũ ĩo na mũhianano wayo, na etĩkĩra gwĩkĩrũo ruoro thiithi kana guoko,

¹⁰we nake-rĩ, nĩakanyua ndibei ya marakara ma Ngai, ĩrĩa ĩthondeketwo thĩinĩ wa gĩkombe kĩa marakara make manene ĩtarĩ ndukanie na maĩ, na anyarirũo na mwaki o na ũbiriti, harĩ araika arĩa atheru o na Gatũrũme;

¹¹nayo ndogo ya kĩnyarirĩko kĩao nĩyambataga hingo ciothe tene na tene, na mationaga kũhurũka mũthenya o na ũtukũ, acio mainamagĩrĩra nyamũ ĩo na mũhianano wayo, o na ũrĩa o wothe wĩtĩkĩrĩte gwĩkĩrũo ruoro rũa rĩĩtwa rĩayo.

¹²Hau nĩho harĩonekaga ũkirĩrĩria wa andũ arĩa aamũre, nĩo arĩa mamenyagĩrĩra maathani ma Ngai o naguo wĩtĩkio wa Jesu.

¹³Ngĩcoka ngĩigua mũgambo woima Igũrũ, ũkiuga, Andĩka atĩrĩ, Gũkena-rĩ, nĩ arĩa akuũ, arĩa marĩkoragwo makuĩte me thĩinĩ wa Mwathani gwata rĩu thutha ũyũ. Nake Roho ekuuga, Ĩĩ, nĩguo; makĩhurũke matiganĩte na mawĩra mao maritũ, amu maũndũ mao nĩmarũmanagĩrĩra nao, marĩa maaneka.

¹⁴Ningĩ ngĩrora, ngĩona atĩrĩ, gwĩ itu rĩerũ, na itu rĩu igũrũ ngĩona ũrĩikarĩire ahaana ta mũrũ wa mũndũ, e na thũmbĩ ya thahabu mũtwe, na guoko e na rũhiũ rũũgĩ rũa igetha.

¹⁵Na mũraika ũngĩ akiuma thĩinĩ wa hekarũ, akĩanĩrĩra ũcio waikarĩire itu na mũgambo mũnene, akĩmwĩra, Ikia rũhiũ rũaku ũgethe, tondũ ihinda rĩa kũgetha nĩ ikinyu, amu irio cia thĩ nĩirĩkĩtie kũũma buru!

¹⁶Nake ũcio waikarĩire itu agĩikia rũhiũ rũake thĩ, nayo thĩ ĩkĩgethwo.

¹⁷Ningĩ mũraika ũngĩ akiuma thĩinĩ wa hekarũ ĩo ĩrĩ Igũrũ, o nake e na rũhiũ rũũgĩ rũa igetha.

¹⁸Na mũraika ũngĩ akiuma kĩgongona-inĩ, ũrĩa wathaga mwaki; nake akĩanĩrĩra ũcio wĩ na rũhiũ rũũgĩ na mũgambo mũnene, akiuga atĩrĩ, Ikia rũhiũ rũu rũaku rũũgĩ, ũtue imanjika cia mũthabibu ũrĩa wa thĩ, tondũ thabibu ciaguo nĩirĩkĩtie kwĩrua o kwĩrua.

¹⁹Nake mũraika ũcio agĩikia rũhiũ rũake thĩ, agĩtua mũthabibu wa thĩ thabibu ciaguo, agĩciikia thĩinĩ wa ihihĩro rĩrĩa inene rĩa marakara ma Ngai.

²⁰Na ihihĩro rĩu rĩkĩhihĩrũo mwena-inĩ wa nja wa itũũra, narĩo ihihĩro rĩkiuma thakame ĩgĩkinya kũndũ kũigana ta mairo magana merĩ, ĩkinyĩte mbarathi mĩkwa ya kanua kũrika.