Revelation 17

¹NINGĨ araika acio mũgwanja, acio maarĩ na mbakũri icio mũgwanja, ũmwe agĩũka, akĩnjarĩria, akiuga, Ũka na gũkũ, ngakuonie gũtuĩrũo kwa mũmaraya ũrĩa mũnene ũikarĩte igũrũ rĩa maĩ maingĩ;

²na nĩwe athamaki a thĩ marahũraga maraya nake, na andũ arĩa matũire gũkũ thĩ magakĩrĩagwo nĩ ndibei ya ũmaraya ũcio wake.

³Akĩnjoya ndĩ thĩinĩ wa Roho akĩndwara werũ-inĩ, ngĩkĩona mũndũ mũka ũikarĩire nyamũ ndune ta gakarakũ, ĩiyũire marĩĩtwa ma irumi mwĩrĩ wayo, cia kũruma Ngai, na ĩĩ na mĩtwe mũgwanja na hĩa ikũmi.

⁴Nake mũndũ mũka ũcio nĩehumbĩte nguo cia rangi wa ndaathi na wa gakarakũ, na akegemia na thahabu na tũhiga twĩ goro na tũrĩa twĩtagwo ruru, na guoko akanyita gĩkombe gĩa thahabu kĩiyũire maũndũ ma ũmaramari, o marĩa mathũku ma ũmaraya wake,

⁵na thiithi akaandĩkwo rĩĩtwa rĩa hitho, ũũ: BABULONI ŨRĨA MŨNENE, NYINA WA MARAYA NA WA MAŨNDŨ MARĨA MA ŨMARAMARI MA MABŨRŨRI.

⁶Ngĩona mũndũ mũka ũcio e mũrĩu, akarĩwo nĩ thakame ya andũ arĩa aamũre, na thakame ya aira a Jesu. Na ndamuona, ngĩgega o kũgega.

⁷Nake mũraika akĩnjĩra atĩrĩ, Wagegio nĩ kĩ? Nĩngũkwĩra hitho ĩo ya mũndũ mũka ũcio, na ya nyamũ ĩo ĩmũkuuĩte, ĩo ĩĩ na mĩtwe mũgwanja na hĩa ikũmi.

⁸Nyamũ ĩo wona-rĩ, yarĩ ho, na rĩu ndĩrĩ ho; na nĩĩkiriĩ kwambata yume irima rĩrĩa rĩtarĩ gĩturi, na ĩcoke ĩthiĩ rĩũrĩro-inĩ. Nao andũ arĩa matũire gũkũ thĩ, arĩa mataandĩkĩtwo marĩĩtwa mao ibuku-inĩ rĩa muoyo gwata rĩrĩa thĩ yaambĩrĩirie kũũmbwo, nĩ kũgega makagega mona nyamũ ĩo ũrĩa yarĩ ho, na rĩu ndĩrĩ ho, na no gũũka ĩrĩũka.

⁹Haha-rĩ, nĩ ha gwĩcirio na ũũgĩ. Atĩrĩrĩ, mĩtwe ĩo mũgwanja nĩ irĩma mũgwanja, iria mũndũ mũka ũcio aikarĩire;

¹⁰ningi nĩyo athamaki mũgwanja; atano nĩmarĩkĩtie kũgũa, ũmwe e ho, na ũrĩa ũngĩ ndarĩ aroka; oka, no mũhaka aikare o ihinda inyinyi.

¹¹Nayo nyamũ ĩo yarĩ ho, na rĩu ndĩrĩ ho, yo nyene nĩ wa anana, o na no wa acio mũgwanja; nayo nĩ ya gũgathiĩ rĩũrĩro-inĩ.

¹²Nacio hĩa icio wona ikũmi nĩ athamaki ikũmi matarĩ maraheo gwa gũthamakĩra; no nĩ a kũheo wathani o ta athamaki maikare naguo thaa ĩmwe, hamwe na nyamũ ĩo.

¹³Acio me karĩko kamwe, na makahe nyamũ ĩo ũhoti wao o na wathani wao.

¹⁴O nĩmakarutĩra Gatũrũme mbaara, nake Gatũrũme amatorie, nĩ gũkorũo nĩwe Mwathani wa aathani o na Mũthamaki wa athamaki; na arĩa me nake, arĩa metirũo, arĩa maathurirũo, o ro arĩa ehokeku, magatorania o nao.

¹⁵Agĩcoka akĩnjĩra atĩrĩ, Maĩ namo, macio wona, hau mũmaraya ũcio aikaire, nĩ iruka cia andũ, na irĩndĩ, na ndũrĩrĩ, na mĩario.

¹⁶Nacio hĩa icio wona ikũmi, o na nyamũ nyene, acio nĩ gũthũũra magathũũra mũmaraya ũcio, mamũtige akirĩte ihooru na e njaga, na marĩe nyama cia mwĩrĩ wake, na mamũcine na mwaki athire biũ!

¹⁷Amu Ngai nĩamataarĩte ngoro-inĩ ciao meke ũrĩa we atuĩte, na magĩe karĩko kamwe, na mahe nyamũ ĩo ũthamaki wao, kinya mauuge ma Ngai marĩkie gwĩkĩka.

¹⁸Nake mũndũ mũka ũcio wona, nĩwe itũũra rĩrĩa inene rĩtũire rĩthamakagĩra athamaki a thĩ.