Revelation 5

¹NINGĨ guoko-inĩ kwa ũrĩo gwa ũcio waikarĩire gĩtĩ kĩu gĩa ũthamaki ngĩona mbuku yaandĩkĩtwo mwena wa thĩinĩ o na igũrũ, na ĩkahingwo nĩ gũcinĩrĩrũo tũtembe mũgwanja twa mũhũra.

²Ngĩcoka ngĩona mũraika wĩ hinya akĩanĩrĩra na mũgambo mũnene akoria atĩrĩ, Nũ mwagĩrĩru ahingũre mbuku ĩo, amethũre tũtembe tũu twayo?

³Na gũkĩaga mũndũ Igũrũ, o na kana thĩ, kana o ruungu rũa thĩ, ũngĩhota kũhingũra mbuku ĩo, o na kana amĩbare.

⁴Na niĩ ngĩrĩra mũno, nĩ ũndũ gũtirĩ mũndũ wakorirũo e mwagĩrĩru ahingũre mbuku ĩo, o na kana amĩbare.

⁵Nao athuri arĩa, ũmwe akĩnjĩra, Tiga kũrĩra; atĩrĩrĩ, Mũrũthi ũrĩa wa mũhĩrĩga wa Juda, Thuuna ĩrĩa ya Daudi-rĩ, we nĩatoranĩtie, agakĩhota kũhingũra mbuku ĩo amethũre tũtembe tũu mũgwanja twayo.

⁶Na harĩa gatagatĩ ga gĩtĩ gĩa ũthamaki, na ga ciũmbe iria inya ii muoyo, na ga athuri acio, ngĩona Gatũrũme karũngiĩ, kahaana ta kaanathĩnjwo, na ke na hĩa mũgwanja, na maitho mũgwanja, na nĩmo Maroho marĩa mũgwanja ma Ngai, marĩa matũmĩtwo mathiangage thĩ yothe.

⁷Nake ũcio Gatũrũme agĩthiĩ, akĩoya mbuku ĩo akĩmĩruta guoko-inĩ kwa ũrĩo gwa ũcio waikarĩire gĩtĩ gĩa ũthamaki.

⁸Na aarĩkia kũiyũkia mbuku, ciũmbe icio inya ii muoyo na athuri acio mĩrongo ĩĩrĩ na ana makĩĩgũithia thĩ harĩ ũcio Gatũrũme, o mũndũ e na kĩnanda kĩa mũgeto, na me na tũbakũri twa thahabu tũiyũire ũbumba, na nĩguo mahoya ma andũ arĩa aamũre.

⁹Na hĩndĩ ĩo makĩina rũĩmbo rũerũ, makiuga atĩrĩ, Wee-rĩ, nĩwe mwagĩrĩru wa kũiyũkia mbuku, ũmethũre tũtembe tũu twayo, amu nĩwathĩnjirũo, ũkĩgũrĩra Ngai andũ na thakame yaku a mĩhĩrĩga yothe na mĩario yothe na nduka ciothe na ndũrĩrĩ ciothe,

¹⁰ũkĩmatua kĩrĩndĩ gĩa gũthamakagĩrũo nĩ Ngai witũ na ũkĩmatua amũthĩnjagĩri; nao nĩo a gũthamakaga thĩ.

¹¹Ngĩcoka ngĩrora, ngĩigua mũgambo wa araika aingĩ mathiũrũrũkĩirie gĩtĩ kĩrĩa gĩa ũthamaki na ciũmbe icio ii muoyo o na athuri, na ũrĩa maaiganaga nĩ ngiri ikũmi maita ngiri ikũmi, na ngiri cia ngiri;

¹²makoigaga atĩrĩ na mũgambo mũnene, Gatũrũme karĩa gaathĩnjirũo nĩwe mwagĩrĩru wa kũgwata ũhoti, o na ũtonga, na ũũgĩ, na hinya, na gĩtĩo, na riri o na kĩrathimo.

¹³Na kĩndũ kĩũmbe o gĩothe, kĩrĩa kĩĩ Igũrũ, na kĩrĩa kĩrĩ thĩ, na kĩrĩa kĩrĩ ruungu rũa thĩ, na kĩrĩa kĩrĩ iria rĩrĩa inene igũrũ, o na indo ciothe iria irĩ kuo, ngĩigua ikiuga atĩrĩ, Ũcio ũikarĩire gĩtĩ gĩa ũthamaki, o nake Gatũrũme, marotũũra na kĩrathimo, o na gĩtĩo, na riri, o na wathani, nginya tene o na tene.

¹⁴Nacio ciũmbe icio inya ii muoyo ikiuga, Amen. Nao athuri makĩĩgũithia thĩ magĩthathaiya.