Revelation 8

¹NINGĨ aamethũra gatembe ka mũhũra karĩa ka mũgwanja, thutha ũcio kũu Igũrũ gũgĩkirũo ki ihinda ta rĩa nuthu ya thaa.

²Na ngĩona araika arĩa mũgwanja arĩa marũgamaga mbere ya Ngai; nao makĩnengerũo macoro mũgwanja.

³Ningĩ mũraika ũngĩ agĩũka akĩrũgama kĩgongona-inĩ e na gacuuri ga thahabu ga gũcinĩra ũbumba; nake akĩnengerũo ũbumba mũingĩ, nĩguo awonganĩrĩrie na mahoya ma arĩa aamũre othe igũrũ rĩa kĩgongona gĩa thahabu kĩrĩa kĩarĩ mbere ya gĩtĩ gĩa ũthamaki.

⁴Nayo ndogo ya ũbumba ũcio, hamwe na mahoya ma arĩa aamũre, ĩkĩambatĩra mbere ya Ngai ĩkiumaga guoko-inĩ kwa mũraika ũcio.

⁵Nake mũraika agĩcoka akĩoya gacuuri kau, agĩkaiyũria mwaki wa kĩgongona-inĩ, akĩũita thĩ igũrũ; gũgĩkĩgĩa marurumĩ, na mĩgambo, na heni, o na gĩthingithia gĩa thĩ.

⁶Nao araika arĩa mũgwanja maarĩ ma macoro marĩa mũgwanja makĩĩhaarĩria mamagambie.

⁷Ũrĩa wa mbere akĩgambia, gũgĩkĩgĩa na mbura ya mbembe na mwaki, itukaine na thakame, ikĩrekio thĩ igũrũ; nayo thĩ gĩcunjĩ gĩa ithatũ ĩkĩhĩa, o na mĩtĩ nayo ĩkĩhĩa gĩcunjĩ gĩa ithatũ kĩayo, nayo nyeki ĩrĩa njigũ ĩkĩhĩa yothe.

⁸Mũraika wa kerĩ nake akĩgambia, na no ta kĩrĩma kĩnene gĩakanĩte mwaki gĩaikirio thĩinĩ wa iria rĩrĩa inene; narĩo iria gĩcunjĩ gĩa ithatũ rĩgĩtuĩka thakame;

⁹nacio nyamũ iria ciarĩ thĩinĩ wa iria, iria irĩ muoyo, igĩkua gĩcunjĩ gĩa ithatũ; o na marikabu gĩcunjĩ gĩacio gĩa ithatũ o nacio ikĩanangĩka.

¹⁰Mũraika wa gatatũ nake akĩgambia, nakuo igũrũ gũgĩkiuma njata nene mũno, yaakanaga ta kĩmũrĩ, ĩkĩgũĩra njũĩ gĩcunjĩ gĩa ithatũ, o na ithima cia maĩ,

¹¹narĩo rĩĩtwa rĩa njata ĩo nĩ Kũrũra; namo maĩ gĩcunjĩ gĩa ithatũ magĩtuĩka ũrũrũ; andũ magĩgĩkua aingĩ nĩ ũndũ wa maĩ macio, tondũ wa ũrĩa maarũrĩte.

¹²Mũraika wa kana nake akĩgambia coro, narĩo riũa rĩkĩringwo gĩcunjĩ gĩa ithatũ, o na mweri naguo gĩcunjĩ gĩa ithatũ, o na njata nacio gĩcunjĩ gĩa ithatũ, nĩguo igĩe nduma gĩcunjĩ gĩa ithatũ gĩacio, naguo mũthenya wage ũtheri gĩcunjĩ kĩaguo gĩa ithatũ, na ũtukũ naguo o ũndũ ũmwe.

¹³Ningĩ ngĩrora, ngĩigua nderi o ĩmwe ĩrerete rĩera-inĩ gatagatĩ ĩkiuga atĩrĩ, na mũgambo mũnene, Ĩya-ĩ, ĩya-ĩ, ĩya, arĩa matũire thĩ-ĩ, nĩ ũndũ wa mĩgambo ya macoro ĩrĩa ĩtigarĩte ya araika arĩa atatũ, arĩa megũcoka kũgambia!