Romans 4

¹Ĩ Iburahimu-rĩ, ũrĩa warĩ ithe witũ na mũciarĩre wa mwĩrĩ-rĩ, tũkiuge atĩa ũhoro wake?

²Kũngĩgĩkorũo Iburahimu aatuirũo mũthingu nĩ ũndũ wa maũndũ marĩa ekaga-rĩ, aagĩa na ũndũ wa kwĩgoocera, no ti mbere ya Ngai.

³Nĩ ũndũ-rĩ, tũthomaga atĩa Maandĩko-inĩ? Tũthomaga ũũ, Nake Iburahimu nĩetĩkirie Ngai, naguo ũndũ ũcio agĩtuĩrũo ta arĩ ũthingu e naguo.

⁴No mũruti-wĩra-rĩ, mũcara ũrĩa agwataga ndũtuagwo atĩ nĩ wa ũtugi tiga thirĩ wa kũrĩhagwo.

⁵Nake mũndũ ũrĩa ũtehocagia harĩ maũndũ marĩa ekaga, tiga o gwĩtĩkia aikaraga etĩkĩtie ũcio mũtui andũ arĩa matatĩaga Ngai athingu-rĩ, wĩtĩkio wake nĩguo atuagĩrũo ta arĩ ũthingu e naguo.

⁶Ũguo no taguo Daudi o nake oigire akĩgana kũrathimwo kwa mũndũ ũrĩa mũtue mũthingu nĩ Ngai hatarĩ na ũhoro ũcio wa wĩki wa maũndũ,

⁷akiuga atĩrĩ, Andũ gũkena, nĩ arĩa moheirũo mawaganu mao, mehia mao magakĩhumbĩrũo.

⁸Gũkena-rĩ, nĩ mũndũ ũrĩa Mwathani atangĩtua mwĩhia.

⁹Rĩu-rĩ, kĩrathimo kĩu-rĩ, kĩarathimirũo o andũ arĩa maruaga oiki, kana andũ arĩa mataruaga nĩmaarathimirũo o nao? Amu tuugaga ũũ: Ha ũhoro wa Iburahimu, wĩtĩkio wake nĩguo aatuĩrĩirũo ta arĩ ũthingu e naguo.

¹⁰No rĩrĩ, aatuirũo mũthingu ũguo arĩ na ũhoro ũrĩkũ? Nĩ hĩndĩ ĩrĩa aarĩkĩtie kũgwata ũhoro wa kũrua, kana nĩ hĩndĩ ĩrĩa ataagwatĩte ũhoro ũcio? Ti hĩndĩ ĩrĩa aagwatĩte ũhoro wa kũrua, nĩ rĩrĩa ataaũgwatĩte.

¹¹Nake agĩcoka kũheo kĩmenyithia kĩu gĩa kũrua, gĩtuĩke rũũri rũa ũthingu ũrĩa woimanire na wĩtĩkio ũrĩa aarĩ naguo hĩndĩ ĩrĩa ataagwatĩte ũhoro wa kũrua. Gũgĩĩkwo ũguo nĩ getha atuĩke ithe wa andũ arĩa othe metĩkĩtie, o na gwatuĩka atĩ matigwatĩte ũhoro ũcio wa kũrua, nĩguo o nao matuagwo athingu;

¹²na ningĩ nĩ getha atuĩke ithe wa arĩa magwatĩte ũhoro wa kũrua, na to kũgwata ũhoro ũcio wa kũrua gwiki, no nĩ kũrũmanĩrĩra marũmanagĩrĩra na wĩtĩkio ũcio ithe witũ Iburahimu aarĩ naguo rĩrĩa ataagwatĩte ũhoro ũcio wa kũrua.

¹³Nĩ gũkorũo kĩĩrĩro gĩkĩ gĩa atĩ Iburahimu agatuĩka mũgai wa kũgaĩrũo thĩ yothe, nderĩirũo we mwene, o na kana arĩa a mbeũ yake, nĩ ũndũ wa gwathĩkĩra watho, no nĩ ũndũ wa ũthingu ũrĩa uumanaga na wĩtĩkio.

¹⁴Amu-rĩ, kũngĩkorũo atĩ arĩa maaheirũo ũhoro wa watho nĩo ene igai rĩu-rĩ, wĩtĩkio nĩ mwagie kĩene, nakĩo kĩĩranĩro kĩu gĩgagĩtuĩka gĩa tũhũ.

¹⁵Nĩ gũkorũo watho ũrehagĩrĩre andũ marakara, no rĩrĩ, kũrĩa gũtarĩ gũtue watho-rĩ, kwagarara watho o nakuo gũtingĩgĩa.

¹⁶Nĩ ũndũ wa ũguo, ũthingu ũcio uumanaga na wĩtĩkio, nĩ getha wonekage no ũndũ wa Wega wa Ngai; nĩguo ũndũ ũrĩa mwĩranĩre wonekage hatarĩ nganja nĩ andũ othe a mbeũ ya Iburahimu, to arĩa maaheirũo ũhoro wa watho oiki no ningĩ arĩa o nao metĩkĩtie wĩtĩkio ta ũcio wake.

¹⁷Amu Iburahimu ũcio-rĩ, o ta ũrĩa ũhoro wake wandĩkĩtwo, atĩ, Nĩngũtuĩte ithe wa ndũrĩrĩ nyingĩ-rĩ, maitho-inĩ ma Ũcio etĩkĩtie nĩwe ithe witũ ithuothe, o maitho-inĩ ma Ngai, we ũriũkagia arĩa makuĩte, na aaragia ũhoro wa maũndũ marĩa matarĩ ho o ta marĩ ho.

¹⁸Nake Iburahimu, o na kũngĩtuĩka ũndũ ũcio erĩirũo ndũngĩĩrĩgĩrĩrĩka-rĩ, nĩaawĩtĩkirie, agĩgĩtũũra erĩgĩrĩire atĩ nĩagatuĩka ithe wa ndũrĩrĩ nyingĩ, kũringana o na ũhoro ũrĩa aaheirũo akĩĩrũo ũũ, Ũguo noguo a mbeũ yaku makaigana.

¹⁹Na rĩrĩa eciririe ũhoro wa mwĩrĩ wake akĩmenyaga atĩ no ta ũrĩ mũkuũ (nĩ ũndũ mĩaka ĩrĩa aaikarĩte yarĩ ta mĩaka igana), ningĩ eciria ũrĩa nda ya Sara yathirĩte hinya wa gũciara-rĩ, ndaigana kũnyihanyihĩrũo nĩ wĩtĩkio:

²⁰no rĩrĩ, aaroragia maitho o na harĩ wĩranĩro ũcio wa Ngai, na ndathanganie nĩ kwaga wĩtĩkio; agĩkĩgĩa na hinya nĩ ũndũ wa gwĩtĩkia, na akagoocaga Ngai,

²¹akĩmenyaga o mũno atĩ ũguo aamwĩrĩire o na kũũhingia ndarĩ hĩndĩ atangĩhota kũũhingia.

²²Naguo ũhoro ũcio agĩgĩtuĩrũo ta arĩ ũthingu e naguo.

²³Na rĩrĩ, ũhoro ũcio, atĩ ũguo ekire ũgĩtũma atuwo mũthingu-rĩ, ndwandĩkirũo no ũndũ wake wiki:

²⁴no nĩwaandĩkirũo nĩ ũndũ witũ o na ithuĩ, amu tũrĩtuagwo athingu o na ithuĩ, arĩa tũrĩkoragwo twĩhokete Ũcio wariũkirie Jesu, Mwathani witũ, oime kũrĩ arĩa akuũ,

²⁵o we waneanirũo nĩ ũndũ wa mehia maitũ, na akĩriũkio nĩ getha tũtuwo athingu.