Song of Solomon 6

¹Mwendwa waku kaĩ agĩthiĩte kũ, wee mũthaka kũrĩ andũ-a-nja arĩa angĩ othe? mwendwa waku eyerekeirie na kũ, nĩguo tũkĩmũcarie nawe?

²Mwendwa wakwa-rĩ, nĩ mũgũnda wake aikũrũkĩrĩire, harĩa he mĩhonia ya mahuti manungi wega, athiĩte kũrĩithia kũu mĩgũnda, na gũtua mahũa.

³Niĩ-rĩ, ndĩ wa mwendwa wakwa, nake nĩ wakwa: nĩ kũrĩithia ararĩithia mahũa-inĩ.

⁴Ĩ mũrata wakwa, kaĩ ũrĩ mũthaka o ta kũrĩa gwĩtagwo Tiriza-ĩ! kwagĩra nĩwagĩrĩte o ta Jerusalemu, ũgakĩgĩa itua-nda o ta ita ii na ibebero!

⁵Hũgũra maitho ũtige kũndora, amu-rĩ, nĩ kũ’hoota mekũ’hoota. Njuĩrĩ ciaku no ta rũũru rũa mbũri, ikomete ciĩaraganĩtie hũgũrũrũ-inĩ cia Gileadi.

⁶Magego maku namo mahaana karũũru ka mĩatĩ, rĩrĩa yumĩte kĩanda gũthambio; nayo-rĩ, gũtirĩ ũtarĩ wa mahatha, na gũtirĩ o na ũmwe ũkuĩrĩirũo nĩ mũiruwe.

⁷Thiithi waku ũhaana o ta gĩatũ gĩa itunda rĩĩtagwo ikomamanga ũkĩonerũo hau tama-inĩ ũcio wĩhumbĩte ũthiũ naguo.

⁸Atumia a mũthamaki me kuo mĩrongo ĩtandatũ, ningĩ aka arĩa a thuriya mĩrongo ĩnana, o na airĩtu matangĩtarĩka.

⁹Gatutura gaka gakwa-rĩ, ũyũ wakwa ũtarĩ gocuke-rĩ, we nowe wiki; nĩ mwana wa mũmwe wa nyina; nĩwe gĩtũnio gĩa ũcio mũmũciari. Andũ-a-nja maamuona, makĩmwĩta gakenia; ĩĩ-ni, atumia acio a mũthamaki na aka acio a thuriya maamuona magĩkĩmũkumia.

¹⁰Mwarĩ ũyũ nĩ ũrĩkũ ũraikia maitho ta riũa gũgĩkĩa, na gũthakara athakarĩte ta mweri, na agakembũka ta riũa, na e na itua-nda o ta ita ii na ibebero?

¹¹Ndaikũrũkĩrĩire mũgũnda wa mĩkombokombo, ngarore tũmĩtĩ tũrĩa tũruru kũu gĩtuamba, nyone kana mũthabibu nĩũthundũrĩte, na kana mĩkomamanga nĩ mĩrutu kĩro.

¹²O itaanamenya atĩ nĩ atĩa kũrĩ, ngoro yakwa ĩkĩ’menyithia atĩ ndĩ o gatagatĩ ka ngari cia makang’ũ ma kĩrĩndĩ giitũ.

¹³Coka! coka, wee Mũshulamu ũyũ! coka! coka tũkwĩrorere! Mũkwenda kwĩrorera Mũshulamu ũyũ nĩkĩ, o ta arĩ rũĩmbo rũrĩa rũa Mahanaimu mũkwĩrorera?