Zechariah 12

¹ŨYŨ NĨGUO ũhoro mũritũ wa Jehova ũrĩa ũkoniĩ Isiraeli. Jehova ekuuga ũũ, o we ũrĩa watambũrũkirie matu-mairũ, o na akĩhanda gĩtina kĩrĩa kĩrũmu gĩa thĩ ĩno, o na akĩũmba roho ũrĩa ũtũũragia mũndũ muoyo.

²Atĩrĩrĩ, Jerusalemu ngarĩtua ta gĩkombe kĩa ndibei ĩrĩa ĩtũmaga andũ othe arĩa marĩrigicĩirie matũgũge, namo maũndũ macio makahingĩrio Juda hĩndĩ ĩrĩa Jerusalemu rĩgatharĩkĩrũo rĩtunyanwo.

³Na nĩgũgakinya atĩrĩ, mũthenya ũcio, atĩ nĩngatũma Jerusalemu rĩtuĩke o ta rũaro rũa ihiga harĩ ndũrĩrĩ ciothe rũtangĩoeka; nao andũ othe arĩa makageria kũruoya nĩmakeguraria mũno; o nacio ndũrĩrĩ ciothe cia thĩ igakorũo irĩũnganĩire.

⁴Ningĩ Jehova ekuuga atĩrĩ, Mũthenya ũcio ngamakia mbarathi ciothe ndĩcihahũrithie, o nao andũ arĩa mathiaga macihaicĩte ndũme magwatwo nĩ mbũgũigũ; nayo nyũmba ya Juda ndĩmĩkũũrĩre maitho, no mbarathi ciothe cia ndũrĩrĩ ndĩcitue ndumumu.

⁵Nao atongoria a Juda meĩre na ngoro ciao atĩrĩ, Andũ arĩa matũũraga Jerusalemu nĩo hinya witũ, nĩ ũndũ wa Jehova Mũnene wa Ita, Ngai wao.

⁶Ningĩ mũthenya ũcio-rĩ, nĩngatũma atongoria acio a Juda matuĩke o ta rũgĩo rũiyũire mwaki rũigĩtwo ngũ-inĩ thĩinĩ, o na matuĩke o ta gĩcinga kĩa mwaki gĩĩ thĩinĩ wa itĩa cia ngano nao nĩmakarĩa ndũrĩrĩ ciothe iria imarigicĩirie na ndwere ciothe macinine, o mwena-inĩ wa guoko kwa ũrĩo, o na wa kwa ũmotho; narĩo Jerusalemu rĩtũũre rĩĩikarĩtie o handũ harĩo kĩũmbe, o kũu Jerusalemu.

⁷O na ningĩ Jehova akaamba kũhonokia andũ arĩa matũire hema-inĩ cia Juda, nĩ getha andũ a Juda matigetĩĩrũo nĩ andũ a nyũmba ya Daudi, o na arĩa matũire Jerusalemu.

⁸Mũthenya ũcio-rĩ, Jehova nĩakagitĩra andũ arĩa matũũraga Jerusalemu, o nake mũndũ ũrĩa mũhĩnge thĩinĩ wao-rĩ, agatuĩka o ta Daudi we mwene, o nayo nyũmba ya Daudi ĩtuĩke o ta Ngai, ĩgĩtuĩke ta mũraika wa Jehova ũrĩa ũmatongoragia.

⁹Na nĩgũgakinya atĩrĩ, mũthenya ũcio, atĩ ndũrĩrĩ ciothe iria igokĩrĩra Jerusalemu nĩngacitua cia kũninwo.

¹⁰O na ningĩ nĩngekĩra nyũmba ya Daudi, o na andũ arĩa matũũraga Jerusalemu, ngoro ya gũtugana, o na ya gũthaithana; nao makarora mũndũ ũrĩa maathecire, na mamũrĩrĩre o ta ũrĩa mũndũ arĩragĩra mũriũ wa mũmwe; ningĩ nĩmagethikĩra na ngoro nĩ ũndũ wake, o ta ũrĩa mũndũ ethikagĩra na ngoro nĩ ũndũ wa mwana wa irigithathi.

¹¹Mũthenya ũcio-rĩ, nĩgũkagĩa kĩrĩro gĩa kĩeha kĩnene mũno Jerusalemu, o ta ũrĩa kwarĩrirũo Hadadi-rimoni, o kũu kĩanda-inĩ kĩa Megidoni.

¹²Na nĩgũkarĩragwo na kĩeha bũrũri wothe, o mbarĩ o mbarĩ ĩrĩrage ĩrĩ iiki; mbarĩ ya nyũmba ya Daudi ĩrĩrage ĩrĩ iiki, o na andũ-a-nja ayo marĩ oiki; nayo mbarĩ ya nyũmba ya Nathani ĩrĩ iiki, o na andũ-a-nja ayo marĩ oiki;

¹³nayo mbarĩ ya nyũmba ya Lawii ĩrĩ iiki, o na andũ-a-nja ayo marĩ oiki; nayo mbarĩ ya nyũmba ya Shimei ĩrĩ iiki, o na andũ-a-nja ayo marĩ oiki;

¹⁴o nacio mbarĩ iria ingĩ ciothe itigarĩte, o mbarĩ o mbarĩ ĩrĩ iiki, o na andũ-a-nja ayo marĩ oiki.