Zechariah 4

¹Ningĩ mũraika ũcio tũraaranagĩria nake aracoka arangora o rĩngĩ, aranjũkĩria o ta ũrĩa mũndũ aarahũragwo toro.

²Nake aranjũria atĩrĩ, Nĩ kĩ ũrona? Na niĩ ndĩrakĩmũcokeria ũhoro ndĩramwĩra, Nĩ kuona ndĩrona mũtĩ wa kũrũgamia matawa, naguo wothe nĩ wa thahabu theri, na wĩ na mbakũri ya gwĩkĩrũo maguta igũrũ rĩaguo, na wĩ na matawa maguo mũgwanja; ningĩ he tũmĩberethi mũgwanja igũrũ rĩamo tũroretie maguta matawa-inĩ macio;

³ningĩ mĩena-inĩ yaguo hakagĩa mĩtamaiyũ ĩĩrĩ, ũmwe mwena wa ũrĩo wa mbakũri ĩo ya maguta, na ũrĩa ũngĩ mwena wayo wa ũmotho.

⁴Ningĩ ndĩracokeria mũraika ũcio tũraaranagĩria nake ũhoro, ndĩramũũria atĩrĩ, Ĩ Mwathi wakwa, ici nacio nĩ cia kĩ?

⁵Hĩndĩ ĩo mũraika ũcio turaaranagĩria nake arakĩnjũria atĩrĩ, Githĩ ndũũĩ ũhoro wa indo ici? Na niĩ ndĩramũcokeria atĩrĩ, Aca, Mwathi wakwa.

⁶Nake aranjokeria ũhoro aroiga atĩrĩrĩ, Ĩno nĩyo ndũmĩrĩri ya Jehova ĩkoniĩ Zerubabeli, na nĩ ya kuuga atĩrĩ, Jehova Mũnene wa Ita ekuuga ũũ: Ti ũcamba wa andũ makarau, kana hinya wao, ũkahootana, no nĩ ũhoti wa Roho wakwa!

⁷Wee kĩrĩma gĩkĩ, nĩwe ũ, o wee wĩtũũgĩrĩtie mbere ya Zerubabeli? Ndũrĩ hingo ũtakanyihio ũtuĩke ta gĩtuamba. Nake nĩwe ũkarehe ihiga rĩrĩa rĩa kũrĩkia mwako, o gũkĩanagĩrĩrũo ũhoro warĩo atĩrĩ, Thaai, thaai!

⁸O na ningĩ ndĩrakinyĩrĩrũo nĩ ndũmĩrĩri ya Jehova, ndĩrerũo atĩrĩ,

⁹Moko ma Zerubabeli nĩmo maahandire itina cia nyũmba ĩno, na nomo makamĩrĩkia, na hĩndĩ ĩo nĩmũkamenya atĩ Jehova Mũnene wa Ita nĩwe ũndũmĩte harĩ inyuĩ.

¹⁰Tondũ-rĩ, arĩa maahũire ngoro mũthĩ ũrĩa wĩra ũyũ warĩ mũnyinyi nĩmagacanjamũka ngoro mona kahiga karĩa ga gũthima ge guoko-inĩ gwa Zerubabeli. Namo matawa macio mũgwanja nĩmo maitho ma Jehova marĩa macũthangagĩrĩria gũkũ thĩ guothe.

¹¹Na niĩ ndĩracoka ndĩramũũria atĩrĩ, Mĩtamaiyũ ĩo ĩrũngiĩ hau, ũmwe mwena wa ũrĩo wa mũtĩ ũcio wa kũrũgamia matawa, na ũrĩa ũngĩ mwena wa ũmotho waguo-rĩ, nĩ ya kĩ?

¹²Ningĩ ndĩragĩcoka kũmũũria ũhoro ũcio ihinda rĩa kerĩ, ndĩroiga atĩrĩ, Honge icio igĩrĩ cia mĩtamaiyũ ĩo ĩrĩ na mĩcũrĩ ĩĩrĩ ya thahabu ya gũkerũra maguta ma cio matune ta thahabu-rĩ, nĩ cia kĩ?

¹³Nake aranjokeria ũhoro, aranjũria atĩrĩ, Kaĩ ũtoĩ ũhoro wa indo icio? Na niĩ ndĩramũcokeria atĩrĩ, Aca, mwathi wakwa, niĩ ndiũĩ.

¹⁴Nake arakiuga atĩrĩrĩ, Ici nĩcio andũ arĩa erĩ aitĩrĩrie maguta, arĩa marũgamaga harĩ Mwathi wa thĩ yothe.