Zechariah 9

¹ŨYŨ NĨGUO ũhoro mũritũ wa ndũmĩrĩri ya Jehova ĩkoniĩ bũrũri wa Hadaraka, naguo ũgakorerera itũũra rĩa Dameski, nĩ gũkorũo riitho rĩa Jehova nĩrĩo rĩonaga mũndũ o mũndũ, o na rĩkabara mĩhĩrĩga yothe ya Isiraeli;

²o na ningĩ ũgakorerera itũũra rĩa Hamathu rĩrĩa rĩkuhanĩrĩirie na itũũra rĩu rĩa Dameski, o na ningĩ ũkorerere matũũra ma Turo na Zidoni o namo, o na harĩa andũ amo marĩ ogĩ mũno.

³Andũ a Turo nĩ gwaka meyakĩire kĩhingo kĩrũmu, na makehaĩra hĩba cia betha nyingĩ o ta rũkũngũ rũa thĩ, o na thahabu ĩrĩa njega ĩingĩhĩte o ta ndaka ya njĩra-inĩ.

⁴Atĩrĩrĩ, Jehova nĩakamatunya indo icio, naruo rũirigo rũarĩo rũa hinya arũgũithie iria-inĩ thĩinĩ, narĩo itũũra rĩo rĩene rĩninwo na mwaki.

⁵Andũ a Ashikeloni nĩmakeonera ũndũ ũcio, metigĩre, o na andũ a Gaza mawĩyonere na maikare ta magwatĩtwo nĩ ruo rũnene mũno, ningĩ andũ a Ekironi o taguo, nĩ ũndũ kĩĩrĩgĩrĩro kĩao gĩgakorũo kĩrĩ gĩa tũhũ. Andũ a Gaza nĩmakaagithio mũthamaki, narĩo Ashikeloni rĩage gũcoka gũtũũrũo nĩ andũ.

⁶Mwana wa mũhingũria nĩwe ũgatũũra Ashikeloni, naguo mwĩtĩo wa Afilisiti nĩngaũnina o kũũnina biũ.

⁷Ningĩ nĩngeheria thakame ĩmoime kanua, na njeherie maũndũ mao marĩa mekaga ma thahu ta arĩ nyama ĩkũhurio ĩrutwo magego-inĩ mao; nao andũ ao arĩa magatigara no matuĩke a Ngai witũ, na matuĩke ta mũhĩrĩga ũmwe wa kũu Juda, nao Aekironi matuĩke ta Ajebusi.

⁸Ningĩ nĩngaamba hema irigicĩrie nyũmba yakwa ta ndĩmĩrangĩire na mbũtũ cia ita, o nginya gũkaaga mũndũ ũngĩtuĩkania atonye kuo, o na kana acoke ahũndũke oime kuo; na gũtirĩ mũhinyanĩrĩria ũgacoka gũtuĩkania kuo o na rĩ; nĩ ũndũ rĩu nĩndĩĩyoneire na maitho makwa ũrĩa gwĩkĩtwo ũũru.

⁹Atĩrĩrĩ, wee mwarĩ wa Zayuni, kenũrũrũka mũno; uugĩrĩrie mũno, wee mwarĩ wa Jerusalemu; atĩrĩrĩ, mũthamaki waku nĩaroka harĩ wee, na nĩ mũthingu, na nĩwe ũkũhonokania, ningĩ nĩ mũhoreri, nake aroka ahaicĩte ndigiri, o aikarĩire njaũ ya ndigiri.

¹⁰Niĩ na niĩ nĩnganina ngari cia ita ciehere kũu Efiraimu, o na mbarathi ndĩcinine kũu Jerusalemu, o naguo ũta wa mbaara nĩũkoinangwo; nake nĩakahunjanĩria ũhoro wa thayũ ndũrĩrĩ-inĩ, naguo wathani wake ũrutio o gĩturi-inĩ kĩa iria rĩmwe, o nginya gĩturi-inĩ kĩa iria rĩrĩa rĩngĩ, o na ũrutio Rũũĩ-inĩ rũa Farati, ũkinye o ituri cia thĩ.

¹¹O naho ha ũhoro waku-rĩ, tondũ wa thakame ya kĩrĩkanĩro gĩaku, nĩndutithĩtie andũ aku arĩa ohe irima-inĩ rĩrĩa rĩtarĩ maĩ.

¹²Hũgũkĩrai kĩhingo kĩrĩa kĩrũmu, inyuĩ andũ ohe, mũhingĩrio kĩĩrĩgĩrĩro kĩanyu, amu ũmũthĩ nĩguo nguuga atĩ nĩngakũrĩha thĩna waku maita merĩ.

¹³Nĩ ũndũ nĩndĩĩhacĩire Juda ta arĩ ũta, o na Efiraimu ngamũgereka ta arĩ mĩguĩ ĩrĩ rũrigi-inĩ rũa ũta nao ariũ aku, wee Zayuni, ndũme maambarũrũke, mokĩrĩre ihĩĩ ciaku, wee Mũyunani, na ndũme ũtuĩke o ta rũhiũ rũa njora rũkũhiũrio nĩ mũndũ karau.

¹⁴Nake Jehova nĩakonwo arĩ igũrũ rĩao, nayo mĩguĩ yake ĩthiage ta rũheni; nake Mwathani Jehova ahuhithie karumbeta, athiage arĩ kĩhuhũkanio-inĩ kĩa rũhuho rũa mwena wa gũthini.

¹⁵Ningĩ Jehova Mũnene wa Ita nĩwe ũkamagitĩra; nao maninane biũ, na marangĩrĩrie mahiga ma kĩgũtha thĩ; nĩ kũnyua makanyua thakame yao, na macoke maronje ta arĩ ndibei manyuĩte, na maiyũrĩrĩrio ta mbakũri, o mbakũri iria irĩ mĩthia-inĩ ya kĩgongona.

¹⁶Nake Jehova Ngai wao nĩakamahonokia mũthenya ũcio ta marĩ mbũri cia rũũru rũa andũ ake; nĩ ũndũ magatuĩka o ta tũhiga twa goro tũthecereirũo tanji-inĩ, tũkũhenahenia bũrũri-inĩ wake.

¹⁷Kaĩ wega wao nĩ mũnene-ĩ! Na ningĩ kaĩ ũthaka wao nĩ mũnene-ĩ! Ngano nĩyo ĩkagaacĩria andũ a muumo, o nayo ndibei ya mũthondekano ĩgaacĩrie airĩtu.