1 Corinthians 16

¹Ibyerekeye imfashanyo zo kunganira intore z'Imana, mugenze nk'uko nategetse amatorero ya Kristo yo muri Galati.

²Ku munsi wa mbere ari ho ku cyumweru, buri muntu wese muri mwe ajye agira icyo azigama akurikije amikoro ye agishyire iruhande, kugira ngo igihe nzaba nje mutazaba ari bwo muhugira mu byo guterateranya imfashanyo.

³Ningera iwanyu rero nzaha abantu mwatoranyije inzandiko zo kubasohoza, bajyane imfashanyo zanyu i Yeruzalemu.

⁴Nibiba ngombwa ko nanjye ngenda tuzajyana.

⁵Nzaza iwanyu nyuze muri Masedoniya, kuko ari ho nzanyura.

⁶Birashoboka ko natinda iwanyu wenda nkaba naharangiriza amezi y'imbeho, kugira ngo mumfashe gukomeza urugendo rwanjye aho nzajya hose.

⁷Sinifuza kubonana namwe huti huti ngo nkomeze urugendo. Nizeye kuzamara iwanyu iminsi, Nyagasani nabishaka.

⁸Nzaguma ino muri Efezi kugeza mu gihe cya Pentekote.

⁹Hano nugururiwe amarembo kugira ngo mpakore umurimo munini w'ingirakamaro, icyakora abandwanya ni benshi.

¹⁰Timoteyo naza muzamwakire ku buryo atagira icyo yishisha ari iwanyu, kuko na we akorera Nyagasani nkanjye.

¹¹Nuko rero ntihazagire umusuzugura, ahubwo muzamufashe akomeze urugendo rwe amahoro angereho, kuko jye n'abandi bavandimwe tumutegereje.

¹²Ibyerekeye umuvandimwe Apolo, namusabye nkomeje ngo azazane iwanyu n'abandi bavandimwe ariko ntashaka na busa kuza ubungubu, icyakora nabona uburyo azaza.

¹³Mube maso mwishingikirije ku uwo twemera, mube abagabo b'intwari kandi mukomere.

¹⁴Icyo mukora cyose mugikorane urukundo.

¹⁵Ikindi bavandimwe, muzi ko ab'urugo rwa Sitefana ari bo babimburiye abandi bo muri Akaya kwemera Kristo, bakitangira kunganira intore z'Imana. Ndabinginze mwemere kugengwa na bene abo, kimwe n'abandi bafatanyije umurimo n'umuruho.

¹⁶[...]

¹⁷Byaranshimishije kubona Sitefana na Foritunato na Akayiku baje, bankoreye icyo mwajyaga gukora iyo muhaba.

¹⁸Ari jye ari namwe baturemye agatima. Mujye mushima abameze batyo.

¹⁹Abo mu matorero ya Kristo yo muri Aziya barabaramutsa. Akwila na Purisila hamwe n'itorero rikoranira mu rugo rwabo, barabaramutsa mu izina rya Nyagasani.

²⁰Abavandimwe bose barabaramutsa. Namwe muramukanye muhoberana ku buryo butagira amakemwa.

²¹Jyewe Pawulo ndabatashya. Ibi ni jye ubyiyandikiye n'ukwanjye kuboko.

²²Nihagira udakunda Nyagasani avumwe! “Marana ta”, ni ukuvuga ngo: “Ngwino Nyagasani.”

²³Nyagasani Yezu nagumye kubagirira ubuntu.

²⁴Ni jye ubakunda mwese ku bwa Kristo Yezu.