1 Timothy 1

¹Jyewe Pawulo Intumwa ya Kristo Yezu nk'uko byategetswe n'Imana Umukiza wacu na Kristo Yezu twiringira,

²ndakwandikiye Timoteyo mwana wanjye nibyariye muri Kristo twemera. Imana Data ikugirire ubuntu iguhe n'imbabazi n'amahoro, ifatanyije na Kristo Yezu Umwami wacu.

³Nk'uko nabigusabye igihe najyaga mu ntara ya Masedoniya, ugume Efezi kugira ngo ubuze abantu bariyo gukwiza inyigisho ziyobya.

⁴Ubabuze no kwihambira ku bitekerezo bitagira ishingiro, no ku bisekuruza bitagira iherezo. Ibyo bizana impaka gusa, aho guteza imbere imigambi y'Imana twemezwa no kwizera Kristo.

⁵Intego mfite ngushinga ibyo ni ukugira ngo bagire urukundo rukomoka ku mutima uboneye utabarega ikibi, no kwizera Kristo kuzira uburyarya.

⁶Bamwe bahushije iyo ntego, bahera mu magambo y'amahomvu.

⁷Bashaka kuba abigisha b'Amategeko, nyamara batazi neza ibyo bavuga n'ibyo bemeza abantu bihandagaje.

⁸Turabizi koko Amategeko ni meza, igihe umuntu ayakoresha uko bikwiye.

⁹N'ubundi tuzi ko Amategeko atashyiriweho intungane, ahubwo dore abo yashyiriweho: abagome n'ibigande, abatubaha Imana n'abanyabyaha, abahakana Imana n'abasuzugura ibyayo, abica ba se na ba nyina kimwe n'abicanyi bose,

¹⁰abasambanyi basanzwe n'abasambana n'abo bahuje igitsina, abacuruza abantu n'ababeshyi n'abarahira ibinyoma, mbese abakora ibintu byose binyuranye n'inyigisho zishyitse.

¹¹Izo ni zo nyigisho zihuje n'Ubutumwa nashinzwe, bwerekeye ikuzo ry'Imana nyir'ugusingizwa.

¹²Ndashimira Umwami wacu Kristo Yezu watumye mbasha kumukorera, akangirira icyizere, bityo akanshinga umurimo we.

¹³Nari umuntu ukunda gutuka Imana, ngatoteza abayoboke bayo nkaba n'umunyarugomo. Ariko Imana yarambabariye kuko ibyo nabiterwaga n'ubujiji, kubera ko ntemeraga Kristo.

¹⁴Ubuntu Umwami wacu agira bwaransābye, kimwe n'ukwizera n'urukundo tubonera muri Kristo Yezu.

¹⁵Iri jambo ni iry'ukuri kandi rikwiye kwemerwa na bose: Kristo Yezu yazanywe ku isi no gukiza abanyabyaha, kandi mu banyabyaha ni jye wa mbere.

¹⁶Ariko icyatumye Imana ingirira imbabazi, ni ukugira ngo muri jye umunyabyaha wa mbere Kristo Yezu yerekane ukwihangana kwe kuzuye, bityo mbere urugero abazamwizera bose bagahabwa ubugingo buhoraho.

¹⁷Umwami uhoraho ari we Mana imwe rukumbi, idapfa kandi itarebwa n'amaso, ahabwe icyubahiro n'ikuzo iteka ryose. Amina.

¹⁸Timoteyo mwana wanjye, dore ibyo ngushinze bihuye n'ibyabanje guhanurwa kuri wowe. Ubyiteho bitume urwana intambara nziza,

¹⁹ukomere kuri Kristo twemera ufite umutima utakurega ikibi. Uwo mutima bamwe banze kuwumvira bareka kwizera Kristo, bamera nk'abigungiye mu matongo.

²⁰Muri abo hari Himeneyo na Alegisanderi, nabeguriye Satani ngo bibigishe kutazongera gutuka Imana.