1 Timothy 6

¹Abagizwe inkoreragahato bose nibemere ko ba shebuja bakwiye kubahwa rwose, kugira ngo hatagira utuka Imana cyangwa inyigisho zacu.

²Abafite ba shebuja bemera Kristo ntibakabasuzugure, bitwaza ko ari abavandimwe babo muri Kristo. Ahubwo barusheho gukora bavunika, kuko abafashwa n'umurimo wabo mwiza ari abo bakunda bahuje kwemera Kristo. Dore ibyo ugomba kwigisha no kugiramo abandi inama:

³nihagira uwigisha ibindi bidahuje n'amagambo ashyitse y'Umwami wacu Yezu Kristo n'inyigisho zinogeye Imana,

⁴uwo ni umwirasi utagira icyo azi, urwaye indwara yo kujya impaka no guterana amagambo. Ibyo ni byo bibyara ishyari n'amakimbirane, gusebanya no gukekera abandi ibibi,

⁵n'impaka z'urudaca mu bantu bafite ubwenge bwononekaye bakamyemo ukuri. Bibwira ko uwubaha Imana aba yikurikiraniye inyungu.

⁶Icyakora koko kubaha Imana iyo gufatanyije no kunyurwa n'ibyo ufite, bizana inyungu ikomeye.

⁷Erega nta cyo twazanye ku isi, kandi nta n'icyo tuzabasha kuyivanaho!

⁸Ariko ubwo dufite ibyokurya n'ibyo kwambara nitunyurwe na byo.

⁹Naho abararikira ubukungu bagwa mu mutego, bagashukwa n'irari ryinshi ry'ubupfu rikabangiza. Ni cyo gituma bahomba byose bakarimbuka.

¹⁰Koko gukunda amafaranga ni yo nkomoko y'ibibi byose. Kuyararikira kwatumye bamwe bateshuka bareka Kristo twemera, bakubitana n'ububabare bwinshi.

¹¹Naho wowe muntu w'Imana, ibyo byose ujye ubigendera kure. Uharanire gutunganira Imana no kuyubaha, kuba indahemuka no kugira urukundo, kudacogora no kwiyoroshya.

¹²Ujye urwana intambara nziza, urwanire Kristo twemera maze usingire ubugingo buhoraho. Ngibyo ibyo wahamagariwe ukabyemeza neza mu ruhame, abantu benshi bakabibera abagabo.

¹³Imana ibeshaho byose ni yo ntanze ho umugabo, na Kristo Yezu wabaye umugabo w'iby'ukuri yemera imbere ya Ponsiyo Pilato, na we mutanze ho umugabo yuko ngushinze ibi ngibi:

¹⁴ujye ukurikiza ibyo wategetswe nta makemwa, nta n'umugayo kugeza igihe Umwami wacu Yezu Kristo azaba aje.

¹⁵Imana nyir'ugusingizwa kandi ishobora byose, yo Mwami ugenga abami ikaba n'Umutegetsi ugenga abategetsi, izabikora igihe cyabyo kigeze.

¹⁶Ni yo yonyine ihoraho ituye mu mucyo utegerwa, nta muntu wigeze ayibona kandi ntawe ubasha kuyibona. Ikuzo n'ububasha buhoraho bibe ibyayo. Amina.

¹⁷Abakungu b'iki gihe cya none ubihanangirize, kugira ngo birinde gusuzugura no kwiringira ubukungu bushira vuba. Ahubwo biringire Imana yo iduhundazaho ibintu byose ngo tubikoreshe tubyishimira.

¹⁸Ubihanangirize kandi bajye bakora neza, ubukungu bwabo bube ibikorwa byiza, bahore biteguye gutanga ku byabo batitangiriye itama.

¹⁹Bityo bazaba bafite ifatizo ry'ubukungu bwiza babikiye igihe kizaza, kugira ngo basingire ubugingo nyakuri.

²⁰Nuko rero Timoteyo, urinde icyo washinzwe, ugendere kure y'amagambo y'amanjwe y'abatitaye ku Mana na kure y'impaka z'ingirwabumenyi.

²¹Bamwe bitwaje ubwo bumenyi bituma bateshuka kuri Kristo twemera. Nyagasani nagumye kubagirira ubuntu.