3 John 1

¹Jyewe Umukuru, ndakwandikiye Gayo ncuti yanjye nkunda kubera ukuri kw'Imana.

²Ncuti nkunda, ndakwifuriza kumererwa neza no kuba mutaraga mu mubiri, nk'uko uri mutaraga mu mutima.

³Koko narishimye cyane, igihe abavandimwe bamwe bazaga bagahamya ukuntu ukomeye ku kuri kw'Imana, kandi ukaba ugenda ukurikiza uko kuri.

⁴Nta kintu kinezeza nko kumva ko abana banjye bakurikiza ukuri.

⁵Ncuti nkunda, uri indahemuka mu byo ukorera abavandimwe byose, ndetse nubwo baba ari ab'ahandi.

⁶Bahamije iby'urukundo rwawe imbere y'umuryango wa Kristo. Nyamuneka, nk'uko bikwiriye abakozi b'Imana, ni byiza ko ubahambirira impamba bagakomeza urugendo rwabo.

⁷Bahagurutse batumwe na Kristo ntibemera kugira icyo bahabwa n'abatemera Imana yacu.

⁸Tugomba kunganira bene abo bantu rero, kugira ngo tube dufatanyije na bo kogeza ukuri kw'Imana.

⁹Nandikiye umuryango wa Kristo w'iwanyu, ariko Diyoterefe ukunda kwiha ubukuru muri mwe ntatwemera.

¹⁰Ni cyo gituma ninza nzashyira ahabona ibyo akora n'ukuntu adusebya, akatubeshyera. Si ibyo gusa, yanga no gucumbikira abavandimwe, n'abashaka kubakīra akabibabuza ndetse akanabaca mu Muryango w'Imana.

¹¹Ncuti nkunda, ntugakurikize urugero rw'ibibi abandi bakora, ahubwo ujye ukurikiza urugero rwiza. Ukora ibyiza aba ari uw'Imana, naho ukora ibibi aba atarayibona.

¹²Demeteriyo we abantu bose bamuvugaho ibyiza, yewe n'ukuri twamamaza na ko kurabihamya ndetse natwe ubwacu turabihamya, kandi uzi ko ibyo duhamya ari ukuri.

¹³Nari nshigaje byinshi nakwandikira, ariko sinifuje gukoresha wino n'ikaramu.

¹⁴Ahubwo niringiye kuzakubona bidatinze maze tuvugane imbonankubone.

¹⁵Gira amahoro. Incuti zawe ziragutashya, nawe udutahirize izacu buri muntu ku giti cye.