Acts 14

¹Ni ko byagenze bageze Ikoniyo, Pawulo na Barinaba binjiye mu rusengero rw'Abayahudi, maze bavugana na bo ku buryo Abayahudi n'abatari Abayahudi benshi cyane bemeye Kristo.

²Ariko Abayahudi bari banze kumwemera bateye imidugararo mu batari Abayahudi, babatera kumerera nabi abo bavandimwe.

³Nuko Pawulo na Barinaba bahamara igihe kitari gito bavuga ibya Nyagasani bashize amanga, na we abaha gukora ibitangaza no gutanga ibimenyetso byemeza ibyo bavugaga byerekeye ubuntu bw'Imana.

⁴Abatuye uwo mujyi bicamo ibice, bamwe bajya ku ruhande rw'Abayahudi, abandi ku rw'Intumwa za Kristo.

⁵Nuko Abayahudi n'abatari bo bajya inama n'abatware babo, kugira ngo bagirire nabi Pawulo na Barinaba babatere amabuye.

⁶Abo babimenye bahungira mu mijyi ya Lisitira na Derube yo muri Likawoniya, no mu karere gahereranye na yo.

⁷Aho ngaho bakomeza kuhatangaza inkuru nziza ya Kristo.

⁸I Lisitira hari umugabo wari waravutse aremaye ibirenge, ntiyigera abasha gutambuka.

⁹Yicaye aho atega Pawulo amatwi. Pawulo amwitegereje abona yizeye gukira indwara,

¹⁰amubwira mu ijwi riranguruye ati: “Haguruka uhagarare wemye!” Arabaduka aragenda.

¹¹Aho hari imbaga nyamwinshi y'abantu, babonye icyo Pawulo yakoze barangurura amajwi, bavuga mu rurimi rwo muri Likawoniya bati: “Imana zifite ishusho y'abantu zatumanukiye!”

¹²Barinaba bamwita Zewu, na Pawulo bamwita Herume, kuko ari we wakundaga gufata ijambo.

¹³Ingoro ya ya mana yabo Zewu yari inyuma y'umujyi. Nuko umutambyi wayo azana ku irembo ibimasa bitatse indabyo, kubera ko we na rubanda bashakaga gutura ibitambo izo Ntumwa za Yezu.

¹⁴Ariko Barinaba na Pawulo bumvise ibyo bashaka kubakorera, bahita bashishimura imyambaro yabo kubera umubabaro, biroha muri iyo nteko y'abantu bakōmēra bati:

¹⁵“Mwa bagabo mwe, ibyo ni ibiki mushaka gukora? Natwe turi abantu nkamwe. Tubazaniye Ubutumwa bwiza ngo mureke ibyo bintu bitagira akamaro, muhindukirire Imana nzima yaremye ijuru n'isi n'inyanja n'ibirimo byose.

¹⁶Mu bihe byashize yaretse amahanga yose akora ibyo yishakiye.

¹⁷Nyamara ntiyareka gutanga ibimenyetso bihamya ukugira neza kwayo: kubavubira imvura no kubaha umusaruro mu gihe gikwiriye, no kubahaza ibibatunga n'ibibashimisha.”

¹⁸Nubwo izo Ntumwa za Kristo zavuze zityo, ntibyazoroheye kubuza iyo mbaga y'abantu kuzitura ibitambo.

¹⁹Bigeze aho haza Abayahudi bamwe bavuye muri Antiyokiya no muri Ikoniyo, bigarurira abo bantu bose, batera Pawulo amabuye ngo bamwice. Nyuma bamukururira inyuma y'umujyi batekereza ko yapfuye.

²⁰Ariko igihe abigishwa ba Kristo bamukikije, arahaguruka asubira mu mujyi. Bukeye ajyana na Barinaba i Derube.

²¹Pawulo na Barinaba bamamaza inkuru nziza ya Yezu i Derube, maze bahabona abigishwa benshi. Hanyuma basubira i Lisitira na Ikoniyo na Antiyokiya ho muri Pisidiya.

²²Bakomeza abigishwa ba Kristo baho, babatera umwete kugira ngo bakomere ku kwizera Kristo bababwira bati: “Ni ngombwa ko tunyura mu makuba menshi ngo tubone kwinjira mu bwami bw'Imana.”

²³Batoranya abakuru muri buri koraniro ry'Umuryango wa Kristo, bamaze gusenga no kwigomwa kurya babaragiza Nyagasani bari baremeye.

²⁴Bambukiranya akarere kose ka Pisidiya, bagera mu ntara ya Pamfiliya.

²⁵Bamaze kubwira ab'i Periga Ijambo ry'Imana, baramanuka bagera ahitwa Ataliya,

²⁶bavayo bafata ubwato bagana Antiyokiya ho muri Siriya, aho ba bavandimwe bari barabaragirije Imana, ngo ibagirire ubuntu bwo kubashoboza gukora uwo murimo bari barangije.

²⁷Bagezeyo bakoranya itorero rya Kristo ryaho ryose, baritekerereza ibyo Imana yabakoresheje byose, n'uburyo yugururiye irembo abatari Abayahudi ngo binjire mu bemera Kristo.

²⁸Nuko bamarana igihe kitari gito n'abigishwa ba Kristo.